2026 جىلعى 7 ساۋىردە س. سەيفۋللين اتىنداعى قازاق اگروتەحنيكالىق زەرتتەۋ ۋنيۆەرسيتەتىندە قازاقستان رەسپۋبليكاسى پرەمەر-ءمينيسترىنىڭ كەڭەسشىسى، مەملەكەت جانە قوعام قايراتكەرى ەرالى لۇقپانۇلى توعجانوۆپەن "اۋىل اماناتى" جوباسىنىڭ مۇمكىندىكتەرىنە ارنالعان كەزدەسۋ ءوتتى. ءىس-شاراعا ۋنيۆەرسيتەت ستۋدەنتتەرى، عالىمدارى جانە پروفەسسور-وقىتۋشىلار قۇرامى قاتىستى.
كەزدەسۋدى باسقارما توراعاسى – رەكتور، قر ۇعا اكادەميگى، پروفەسسور قانات تىرەۋوۆ اشىپ، مۇنداي جۇزدەسۋلەردىڭ ستۋدەنتتەر ءۇشىن ماڭىزى زور ەكەنىن اتاپ ءوتتى. ول جاستاردىڭ وزەكتى مەملەكەتتىك باستامالارمەن تىكەلەي تانىسىپ، ەل دامۋىنا قاتىستى ماڭىزدى ماسەلەلەر جونىندە جان-جاقتى اقپارات الۋىنا مۇنداي كەزدەسۋلەردىڭ ۇلكەن مۇمكىندىك بەرەتىنىن ايتتى.
كەزدەسۋ بارىسىندا ەرالى توعجانوۆ قازاقستان رەسپۋبليكاسى پرەزيدەنتىنىڭ اۋىلدى الەۋمەتتىك-ەكونوميكالىق تۇرعىدان دامىتۋعا باعىتتالعان باستامالارىن ىسكە اسىرۋدىڭ نەگىزگى تاسىلدەرى تۋرالى ايتتى. اسىرەسە، اۋىل تۇرعىندارىنىڭ تابىسىن ارتتىرۋعا، كاسىپكەرلىكتى دامىتۋعا، جاڭا جۇمىس ورىندارىن اشۋعا جانە اۋىلدىق ەلدى مەكەندەردە كووپەراتسيانى قولداۋعا باعىتتالعان «اۋىل اماناتى» باعدارلاماسىنا ەرەكشە نازار اۋدارىلدى.
ءىس-شارانىڭ باستى قورىتىندىسى – قازاقستان رەسپۋبليكاسى پرەزيدەنتىنىڭ «اۋىل اماناتى» باستاماسىن ىسكە اسىرۋ بويىنشا قازاتزۋ-مەن بىرلەسكەن جۇمىس توبىن قۇرۋ تۋرالى شەشىم بولدى. اتالعان جۇمىس توبى ۋنيۆەرسيتەتتىڭ عىلىمي، ساراپتامالىق جانە ءبىلىم بەرۋ الەۋەتىن بىرىكتىرىپ، اۋىلدىق اۋماقتاردى قولداۋ مەن دامىتۋدىڭ ءتيىمدى تەتىكتەرىن ازىرلەۋگە باعىتتالادى.
كەزدەسۋ ۋنيۆەرسيتەتتىڭ ستۋدەنتتىك جانە عىلىمي قاۋىمداستىعى ءۇشىن مازمۇندى پىكىر الماسۋ الاڭىنا اينالدى. ءىس-شارا بارىسىندا ستۋدەنتتەر ەرالى توعجانوۆقا وزدەرىن تولعاندىرعان سۇراقتارىن قويىپ، اۋىلدى دامىتۋ جانە جاستاردىڭ ماڭىزدى باستامالاردى ىسكە اسىرۋعا قاتىسۋ مۇمكىندىكتەرى جونىندە وي ءبولىستى.
