اتىراۋ وبلىستىق پوليتسيا دەپارتامەنتىنىڭ ءباسپاسوز قىزمەتىنەن ءمالىم ەتكەندەي، جول-كولىك وقيعاسى بۇگىن، 26 قازاندا تاڭعى ساعات 06:00 شاماسىندا بولعان.

«پاترۋلدىك پوليتسيا روتاسىنىڭ قىزمەتكەرلەرى ساعات تاڭعى 04:00 شاماسىندا اتىراۋ-ورال باعىتىنداعى جولدا Daewoo Nexia اۆتوكولىگىن توقتاتىپ، جۇرگىزۋشىگە جولدا ءجۇرۋ ەرەجەسىنىڭ تالاپتارىن بۇزعانى ءۇشىن حاتتاما تولتىردى. كولىكتىڭ رەسەي فەدەراتسياسىندا تىركەلگەنى انىقتالدى. جۇرگىزۋشىگە تۇنگى مەزگىلدە ساقتىق شارالارىنا مۇقيات بولۋ جونىندە ەسكەرتۋ بەردى. الايدا تاڭعى ساعات 06:00 شاماسىندا Daewoo Nexia اۆتوكولىگىنىڭ جۇرگىزۋشىسى رولگە يە بولا الماي، قاراما-قارسى باعىتتا كەلە جاتقان جۇك كولىگىمەن سوقتىعىستى. جول اپاتىنىڭ سالدارىنان Daewoo Nexia كولىگىنىڭ جۇرگىزۋشىسى مەن 3 جولاۋشى وقيعا ورنىندا كوز جۇمدى. جەڭىل كولىك ورتەنىپ كەتتى»، - دەپ حابارلادى پاترۋلدىك پوليتسيا روتاسىنىڭ كومانديرى ادىلبەك شاحمەتوۆ.

ونىڭ ايتۋىنا قاراعاندا، اتاعالعان جول-كولىك وقيعاسىنا بايلانىستى قىلمىستىق ءىس تىركەلگەن. قازىر كەشەندى تەرگەۋ امالدارى جۇرگىزىلىپ جاتىر.

«جۇرگىزۋشىلەرگە ءوزىنىڭ جانە جولاۋشىلاردىڭ ومىرىنە، دەنساۋلىعىنا قاۋىپ توندىرمەۋ ءۇشىن تۇنگى مەزگىلدە الىس ساپارعا شىقپاۋدى ەسكەرتەمىز. جول ەرەجەسىن قاتاڭ ساقتاۋ قاجەت»، - دەپ ءمالىم ەتتى ادىلبەك شاحمەتوۆ.