ەلوردادا قاجىمۇقان مۇڭايتپاسوۆ كوشەسىندە ورنالاسقان «Sana Sport» سپورت كەشەنىنىڭ جانىنداعى سكەيت-پاركتە «Astana Day Mass Sports: Gorilla Power Your Instinct Tour 2026 – Urban Fest» اتتى كوشە سپورت تۇرلەرىنەن اۋقىمدى سپورتتىق-جاستار فەستيۆالى ءوتتى
قالا كۇنىنە وراي جانە «زاڭ مەن ءتارتىپ» قاعيداتى اياسىندا ءوتىپ جاتقان فەستيۆالدە استانا قالاسى العاش رەت قازاقستاننىڭ تۇكپىر-تۇكپىرىنەن ۇزدىك رايدەرلەردىڭ باسىن قوسقان ەكسترەمالدى سپورت تۇرلەرىنەن Gorilla Instinct Tour ءتۋرنيرىنىڭ العاشقى كەزەڭىن قابىلدادى.
«قازاقستاندا كوشە مادەنيەتى تانىمالدىلىققا يە. اۋەسقويلار اراسىندا بولسا دا، بۇگىنگى جارىسىمىزعا 100-دەن استام قاتىسۋشى تىركەلدى. ولار سكەيتبوردينگ، روليك سپورتى، BMX جانە ساموكات سپورتى بويىنشا سايىسقا ءتۇسىپ جاتىر جانە Gorilla Style Wars Jams كورسەتىلىمدەرى، كاسىبي سپورتشىلاردىڭ شەبەرلىك ساباقتارىنا دا كۋا بولادى.
وسىنداي ءىس-شارالاردى كوپتەپ ۇيىمداستىرۋ ارقىلى جاستارعا جىگەر بەرسەك دەيمىز. بۇگىن جارىس قورىتىندىسى بويىنشا، جۇلدەگە ىلىككەن قاتىسۋشىلارعا اقشالاي جانە ەستەلىك سىيلىعىمىزدى بەرەمىز»، - دەدى ءىس-شارانىڭ ۇيىمداستىرۋشىسى پولينا پانينا.
كەشكى باعدارلاما اياسىندا سكەيتبوردينگ، روليك سپورتى، BMX جانە ساموكات سپورتىنان فينالدىق سايىستار وتكىزىلىپ، جارىس جەڭىمپازدارىنىڭ ەسىمى بەلگىلى بولدى.
«مەكتەپ كەزىندە سىنىپتاسىمنىڭ ۆەلوسيپەدپەن ءتۇرلى كەدەرگىلەر ارقىلى سەكىرگەنىنە تاڭعالىپ، وسى جولعا كەلگەن ەدىم. مىنە، سودان بەرى 19 جىل ءوتىپتى. بۇگىن قاتىسۋشى رەتىندە ەمەس، جاستارعا شەبەرلىك ءدارىسىن وتكىزەتىندەي دارەجەگە جەتىپپىز.
جارىستى تاماشالاپ، كەرەمەت اسەر الىپ جاتىرمىن. ءوزىم دە تۇراقتى تۇردە جاتتىعامىن. بىراق جارىستىڭ ورنى بولەك. ويتكەنى جاتتىعۋدا ورىنداي الماعان كەي كۇردەلى ەلەمەنتتەر وسىنداي جەردە جۇزەگە اسىپ كەتەدى. سونداي-اق جاڭا دوستار دا تابا الاسىڭ»، – دەدى ءىس-شاراعا قاتىسۋشى گەرمان كورپەنكو.
ايتا كەتەيىك، Gorilla Instinct Tour ءىس-شاراسى استانادان بولەك، قاراعاندى (6 شىلدە), اقتوبە (11 شىلدە), اتىراۋ (18 شىلدە), اقتاۋ (25 شىلدە) قالالارىندا جالعاسادى.
