بۇل ەرەكشە شارا «تازا قازاقستان» ەكولوگيالىق اكتسياسى اياسىندا ۇيىمداستىرىلىپ، ەلوردا تۇرعىندارىن سالاۋاتتى ءومىر سالتىن ۇستانۋعا جانە تابيعاتتى قورعاۋعا ۇندەۋدى كوزدەيدى

ۆەلوشەرۋدىڭ جالپى باعىتى – 25 شاقىرىم. قاتىسۋشىلار قوسشى باعىتى بويىنداعى اينالما ۆەلوجولدان باستاۋ الىپ، ۇركەر (يلينكا) تۇرعىن الابىنداعى «جاسىل بەلدەۋ» ساياباعىندا مارەگە جەتەدى.

تىركەۋ ۆەلوشەرۋ كۇنى – 21 ماۋسىمدا تاڭعى 07:30 بەن 09:00 ارالىعىندا جۇرگىزىلەدى. شارانىڭ باستالۋى – ساعات 09:00-دە. قاتىسۋ – تەگىن. ءاربىر قاتىسۋشى ءوز ۆەلوسيپەدىمەن كەلۋى قاجەت.

استانا قالاسىنىڭ دەنە شىنىقتىرۋ جانە سپورت باسقارماسىنىڭ ءباسپاسوز حاتشىسى مادينا ايتقاليەۆا بۇل شارانىڭ جارىس ەمەس ەكەنىن، باستىسى – ازاماتتاردىڭ بەلسەندىلىگى مەن تابيعاتقا دەگەن قامقورلىعى ەكەنىن اتاپ ءوتتى.

شارا سوڭىندا ۇيىمداستىرۋشىلار تىركەۋدەن وتكەن قاتىسۋشىلار اراسىندا لوتەرەيا وتكىزىپ، باعالى سىيلىقتار ويناتاتىنىن حابارلادى.