ەندى ەلوردا تۇرعىندارى اتالمىش مارافونعا قاتىسىپ، ءبىلىم دەڭگەيى مەن كوكجيەگىن ارتتىرىپ قانا قويماي، بۇل ءۇشىن اقشالاي سىيلىق تا الا الادى، دەپ حابارلايدى ەلوردا اكىمدىگىنىڭ رەسمي سايتى.

استانا قىركۇيەك ايىندا باستالاتىن «كىتاپ وقيتىن ۇلت» مارافونىنا رەسمي تۇردە قوسىلدى. بۇعان دەيىن ەلوردا اكىمدىگى مەن «كىتاپ وقيتىن ۇلت – چيتايۋششايا ناتسيا» قوعامدىق قورى ءتيىستى مەموراندۋمعا قول قويعان بولاتىن.

جوبا قازاقستان رەسپۋبليكاسىنىڭ پرەزيدەنتى قول قويعان وقۋ مادەنيەتىن دامىتۋ تۋرالى جارلىقتى ىسكە اسىرۋ ماقساتىندا جۇزەگە اسىرىلىپ جاتىر.

مارافونعا قاتىسۋشىلار التى اي ىشىندە 15 كىتاپ وقىپ، كەيىن تەستىلەۋ مەن بىرقاتار زياتكەرلىك كۋيزدەن وتەدى.

سىناق قورىتىندىسى بويىنشا قاتىسۋشىلاردىڭ ءار ساناتىنداعى ۇزدىك كوماندالار انىقتالادى.

ءبىرىنشى ورىنعا – 600 مىڭ تەڭگە، ەكىنشى ورىنعا – 450 مىڭ تەڭگە، ءۇشىنشى ورىنعا 300 مىڭ تەڭگە اقشالاي سىيلىق قاراستىرىلعان.

«كىتاپ وقيتىن ۇلت» مارافونىنا كىمدەر قاتىسا الادى:

6-10 سىنىپ وقۋشىلارى;

كوللەدجدەر مەن جوعارى وقۋ ورىندارىنىڭ ستۋدەنتتەرى;

پەداگوگتەر;

مەملەكەتتىك قىزمەتشىلەر;

اتا-انالار;

ماماندىعى مەن قىزمەت تۇرىنە قاراماستان، بارلىق نيەت ءبىلدىرۋشى.

مارافون قازاق جانە ورىس تىلدەرىندە وتەدى.

قاتىسۋشىلاردى تىركەۋ بيىل قىركۇيەك ايىندا جوبانىڭ www.reading-nation.kz⁠ رەسمي سايتىندا باستالادى.

ايتا كەتەيىك، جوبا اياسىندا بيىل كۇزدە ەلوردادا ادەبي كەزدەسۋلەر، جالپىحالىقتىق كىتاپ وقۋلار، كىتاپ جوبالارى، اعارتۋشىلىق اكتسيالار جانە باسقا دا ءىس-شارالار سەرياسى باستالادى.

بۇل جۇمىستاردىڭ ماقساتى – كىتاپ وقۋعا دەگەن قىزىعۋشىلىقتى ارتتىرۋ، وتاندىق ادەبيەتتى قولداۋ جانە توقتاۋسىز ءوز ءبىلىمىن جەتىلدىرۋ مادەنيەتىن قالىپتاستىرۋ.

ءباسپاسوز قىزمەتى