استانا كۇنىنە وراي قالانىڭ بارلىق التى اۋدانىندا جاڭادان اباتتاندىرىلعان نىساندار پايدالانۋعا بەرىلدى. قالا تۇرعىندارى ءۇشىن جاڭا اۋلالار، قوعامدىق كەڭىستىكتەر، گۇلزارلار، سپورت جانە بالالارعا ارنالعان الاڭدار اشىلدى.

سارىارقا اۋدانىندا ي.قۇتپانوۆ كوشەسى مەن سارىارقا داڭعىلىندا اباتتاندىرىلعان ەكى اۋلا پايدالانۋعا بەرىلدى. مۇندا قاۋىپسىز رەزەڭكە جابىن توسەلىپ، ويىن كەشەندەرى، سپورت الاڭدارى مەن شاعىن فۋتبول الاڭدارى ورناتىلدى. جوبالار تۇرعىنداردىڭ ۇسىنىستارى مەن وتىنىشتەرى نەگىزىندە ورىندالدى. سونىمەن قاتار كوكتال تۇرعىن الابىنداعى ا. ءۇلىمجىۇلى كوشەسىندە جانە اگروقالاشىق تۇرعىن الابىنداعى راۋان كوشەسىندە جاڭا ەكى قوعامدىق كەڭىستىك اشىلدى. وندا سپورت ايماقتارى، فۋتبول الاڭدارى، بالالار ويىن الاڭدارى مەن ورىندىقتار سالىندى.

قۇرىلىس ماۋسىمى باستالعالى اۋداندا 15 اۋلاعا كۇردەلى جوندەۋ جۇرگىزىلدى.

نۇرا اۋدانىندا ءتورت جاڭارتىلعان اۋلا، ەكى گۇلزار جانە زاماناۋي فۋتبول الاڭى ەل يگىلىگىنە بەرىلدى. اۋماعى شامامەن ءبىر گەكتار بولاتىن «التىن شار-1» تۇرعىن ءۇي كەشەنى جانىنداعى گۇلزار ينۆەستور قاراجاتى ەسەبىنەن سالىندى. مۇندا سەرۋەندەۋ جولدارى جاسالىپ، اعاشتار، بۇتالار مەن گۇلدەر وتىرعىزىلىپ، ورىندىقتار مەن قوقىس جاشىكتەرى ورناتىلدى. سونداي-اق BI Group كومپانياسىمەن بىرلەسىپ جۇزەگە اسقان «4 ماۋسىم» گۇلزارى اشىلدى. وندا جىل بويى ءسانىن جوعالتپايتىن وسىمدىكتەر وتىرعىزىلىپ، 400-دەن استام اعاش پەن 14 مىڭنان استام بۇتا ەگىلدى، سەرۋەندەۋ جولدارى، اتكەنشەكتەر مەن شاحمات ۇستەلدەرى ورناتىلدى.

«حالىق قاتىساتىن بيۋدجەت» باعدارلاماسى اياسىندا شىڭعىس ايتماتوۆ كوشەسىندەگى 41, 41ا، 41ب جانە سىعاناق كوشەسىندەگى 16, 16/1 مەكەنجايلارىنداعى اۋلالار اباتتاندىرىلدى. سونىمەن قاتار «ۇركەر City» جانە «Boston Comfort House» تۇرعىن ءۇي كەشەندەرىنىڭ جانىندا كولەمى 15×30 مەتر بولاتىن فۋتبول الاڭى پايدالانۋعا بەرىلدى.

بايقوڭىر اۋدانىندا اباتتاندىرىلعان ءۇش اۋلا مەن ەكى قوعامدىق كەڭىستىك اشىلدى. قوعامدىق كەڭىستىكتىڭ ءبىرى ش. يمانباەۆ كوشەسىندە، عۇمار قاراش پەن ا. يمانوۆ كوشەلەرىنىڭ ارالىعىندا ورنالاسقان. ونىڭ اۋماعى 2 مىڭ شارشى مەتردى قۇرايدى.

تاعى ءبىر قوعامدىق كەڭىستىك پۋشكين كوشەسىندەگى №2, №4 جانە №6 تۇرعىن ۇيلەردىڭ ماڭىندا پايدالانۋعا بەرىلدى.

سونىمەن قاتار عابدۋللين كوشەسى، 17/1 جانە اباي داڭعىلى، 49 جانە 51 مەكەنجايلارىنداعى اۋلالار «حالىق قاتىساتىن بيۋدجەت» باعدارلاماسى اياسىندا جاڭارتىلدى. بۇل اۋماقتا مىڭنان استام تۇرعىن تۇرادى.

جوبا اياسىندا تۇرعىنداردىڭ جايلى دەمالىسى مەن بوس ۋاقىتىن قولايلى وتكىزۋىنە ارنالعان زاماناۋي اۋلا كەڭىستىگى جاسالدى.

سارايشىق اۋدانىندا «حالىق قاتىساتىن بيۋدجەت» باعدارلاماسى اياسىندا جەتى اباتتاندىرىلعان اۋلا اشىلدى. ونىڭ ەكەۋى احمەت بايتۇرسىنۇلى كوشەسىندەگى №17 جانە №19 ۇيلەردە ورنالاسقان. قالعان بەس اۋلا ك. ازىرباەۆ كوشەسىندەگى 6/1, 6/2, 6/3, 6/4 جانە بايتۇرسىنۇلى كوشەسىندەگى №27 مەكەنجايىندا جاڭارتىلدى.

كەشەندى اباتتاندىرۋ بارىسىندا بالالار ويىن الاڭدارى جاڭارتىلىپ، زاماناۋي ويىن كەشەندەرى، اتكەنشەكتەر جانە شاعىن ساۋلەت نىساندارى ورناتىلدى. جاڭارتىلعان اۋلالار بالالار مەن ەرەسەكتەردىڭ قاۋىپسىز ءارى جايلى دەمالۋىنا مۇمكىندىك بەرەدى.

الماتى اۋدانىندا استانا كۇنى قارساڭىندا جەتى اباتتاندىرىلعان اۋلا پايدالانۋعا بەرىلدى. ولار ع. مۇسىرەپوۆ كوشەسى، 10/2, ش. قۇدايبەردىۇلى كوشەسى، 38, ماناس كوشەسى، 11/3, ق. ساتباەۆ كوشەسى، 4/1, ع. مۇستافين كوشەسى، 9, سونداي-اق ب. مومىشۇلى داڭعىلى، 2 جانە ابىلاي حان داڭعىلى، 25/1 مەكەنجايلارىندا ورنالاسقان. مۇندا بالالار جانە سپورت الاڭدارى، ۆوركاۋت ايماقتارى ورناتىلىپ، فۋتبول مەن باسكەتبول الاڭدارى جاڭارتىلدى، اۆتوتۇراقتار رەتكە كەلتىرىلىپ، ويىن الاڭدارىنىڭ جابىنى اۋىستىرىلدى، ورىندىقتار مەن قوقىس جاشىكتەرى قويىلىپ، كوگالداندىرۋ جۇمىسى جۇرگىزىلدى. بۇدان بولەك، ش. قۇدايبەردىۇلى داڭعىلى بويىنداعى №23 جانە №36 ۇيلەردىڭ جانىندا ەكى قوعامدىق كەڭىستىك اشىلدى.

№36 ءۇيدىڭ ماڭىندا تىنىش دەمالىس ايماعى جاسالسا، №23 ءۇيدىڭ جانىندا ۆوركاۋت الاڭى، ۆولەيبول جانە باسكەتبول الاڭدارى، جاتتىعۋ قۇرىلعىلارى مەن ۇلتتىق سپورت تۇرلەرىنە ارنالعان ايماقتارى بار كوپفۋنكتسيونالدى كەڭىستىك سالىندى. جىل باسىنان بەرى اۋداندا 26 اۋلا جاڭارتىلدى.

ەسىل اۋدانىندا استانا كۇنىنە وراي جايسان كوشەسى، 18 مەكەنجايىنداعى «ادينا» تۇرعىن ءۇي كەشەنىنىڭ اۋلاسىندا اباتتاندىرۋ جۇمىسى اياقتالىپ، جاڭا اۋلا پايدالانۋعا بەرىلدى.

ەلوردادا اۋدانداردى كەشەندى اباتتاندىرۋ جۇمىسى جالعاسىپ جاتىر. قالادا اۋلالار جاڭارتىلىپ، قوعامدىق كەڭىستىكتەر كوبەيتىلۋدە، كوشە جيھازدارى ورناتىلىپ، جارىقتاندىرۋ جۇيەسى جاڭعىرتىلىپ، تۇرعىنداردىڭ جايلى دەمالىسىنا ارنالعان جاڭا ورىندار اشىلىپ جاتىر.