ءىس-شاراعا ءتۇرلى ەلدەردىڭ پرەمەر-مينيسترلەرى ورىنباسارلارى - قازاقستاننان سەرىك جۇمانعارين، رەسەيدەن الەكسەي وۆەرچۋك، قىرعىزستاننان دانيار امانگەلديەۆ، وزبەكستاننان ءجامشيد حودجاەۆ، سونداي-اق اۋعانستان ونەركاسىپ جانە ساۋدا ءمينيسترىنىڭ مىندەتىن اتقارۋشى نۇريددين ازيزي قاتىستى.
قازاقستان ەۋرازيانىڭ ستراتەگيالىق كولىك حابى رەتىندە شىعىس – باتىس جانە سولتۇستىك – وڭتۇستىك باعىتى بويىنشا جاھاندىق جەتكىزۋ تىزبەگىنىڭ ايماقتىق بايلانىسى مەن ورنىقتىلىعىن قامتاماسىز ەتۋدە شەشۋشى ءرول اتقارادى. بۇگىنگى تاڭدا ەلىمىزدە 13 حالىقارالىق كولىك ءدالىزى بار. ونىڭ بەسەۋى – تەمىرجول، سەگىزى – اۆتوكولىك ءدالىزى.
ء"بىزدىڭ كولىكتىك ينفراقۇرىلىم قىتاي، ەۋروپا، رەسەي، كاسپي جاعالاۋى ەلدەرىن، پارسى شىعاناعى مەن وڭتۇستىك ازيانى بايلانىستىرادى. دەمەك، قازاقستان ەۋرازيالىق لوگيستيكالىق جۇيەدەگى ماڭىزدى بۋىن. قازاقستاندىق جەلى بارلىق نەگىزگى حالىقارالىق كولىك دالىزدەرىمەن تۇيىسەتىندىكتەن، الەمدىك نارىققا تۇراقتى تۇردە شىعۋىمىزدى قامتاماسىز ەتەدى", - دەپ اتاپ ءوتتى كولىك ۆيتسە-ءمينيسترى ماقسات قالياقپاروۆ.
تۇساۋكەسەر بارىسىندا تراسەكا، «سولتۇستىك – وڭتۇستىك» حالىقارالىق كولىك ءدالىزى، سولتۇستىك مارشرۋت، سونداي-اق اۋعانستان، پارسى شىعاناعى، وڭتۇستىك ازيا ەلدەرىمەن لوگيستيكالىق بايلانىستى كەڭەيتۋگە ىقپال ەتەتىن وڭتۇستىك جانە ورتالىق ازيا سياقتى باسىم باعىتتاردىڭ دامۋىنا ەرەكشە نازار اۋدارىلدى.
«سولتۇستىك – وڭتۇستىك» كولىك ءدالىزىن دامىتۋ، ونىڭ الەۋەتتى جالعاسى – ترانساۋعاندىق باعىتتىڭ ماڭىزدىلىعى تۋرالى ايتىلدى.
«بۇل باعىت ءۇندى مۇحيتى پورتتارىنا، سونىڭ ىشىندە گۆادار، كاراچي مەن مۋمبايعا شىعۋدى قامتاماسىز ەتەتىن پەرسپەكتيۆالىق ءدالىز. ونىڭ ەسەپتىك وتكىزۋ قابىلەتى جىلىنا 15 ملن توننا. ءبىز بۇل ۆەكتوردى ايماقتىق ءوزارا بايلانىستى نىعايتۋعا، ساۋدا اينالىمىن ۇلعايتۋ مەن جاڭا لوگيستيكالىق تىزبەكتى قالىپتاستىرۋعا ىقپال ەتەتىن قولدانىستاعى مارشرۋتتارعا ستراتەگيالىق قوسىمشا رەتىندە قاراستىرامىز»، — دەدى ماقسات قالياقپاروۆ.
كەزدەسۋگە قاتىسۋشىلار قازاقستاننىڭ قازىرگى اۆتوجول، تەمىرجول جانە اۆياتسيالىق باعىتىنىڭ نەگىزگى پارامەترلەرىن، شەكارا ماڭىنداعى ءوزارا ءىس-قيمىلدىڭ وزەكتى ماسەلەلەرىن، ايماقتىڭ نەگىزگى جۇك قۇراۋشى نۇكتەلەرىندە تەرمينالدىق ينفراقۇرىلىمدى دامىتۋ پەرسپەكتيۆاسىن تالقىلادى. تالقىلاۋ قورىتىندىسى بويىنشا تاراپتار كەلىسىلگەن كولىك ساياساتىن ازىرلەۋگە جانە لوگيستيكالىق سالاداعى ىنتىماقتاستىقتى نىعايتۋعا دايىن ەكەندىكتەرىن جەتكىزدى.
