جيىن بارىسىندا نۇرا اۋدانىنىڭ اكىمى ريشات تۇردىبەكوۆ اتقارىلعان جۇمىستار تۋرالى ەسەپ بەرىپ، اۋماقتىڭ دامۋ باعىتتارىنا توقتالدى.

باستى باعىتتاردىڭ ءبىرى – قوعامدىق كەڭىستىكتەردى اباتتاندىرۋ، جاسىل ايماقتاردى كوبەيتۋ جانە الەۋمەتتىك نىساندار سالۋ.

ماسەلەن، «GreenLine» ساياباعى – بيىل قالادا سالىنعان ءىرى جوبالاردىڭ ءبىرى. ساياباقتىڭ ۇزىندىعى 3,7 شاقىرىمدى، اۋماعى 18 گەكتاردى قۇرايدى.

بيىل جوبانىڭ العاشقى كەزەڭى – انەت بابا كوشەسىنەن كۇلتەگىن كوشەسىنە دەيىنگى بولىگى اياقتالدى. بۇرىنعى قۇرىلىس الاڭىنىڭ ورنىندا اعاشتار، گۇلباقتار مەن دەمالىس ايماقتارى بار جاسىل جەلەكجول سالىندى. مۇندا مىڭداعان اعاش پەن ونداعان مىڭ كوپجىلدىق وسىمدىك وتىرعىزىلىپ، ناتيجەسىندە اۋماعى جانداندى.

تاعى ءبىر ءساتتى جوبا – ايتەكە بي كوشەسىندەگى ساياباق. بۇرىن بوس جاتقان جەر بۇگىندە تۇرعىندارعا ارنالعان جايلى ورتاعا اينالدى: جاياۋ جۇرگىنشى ايماقتارى جاڭارتىلدى، مىڭنان استام اعاش وتىرعىزىلدى، زاماناۋي جارىقتاندىرۋ ورناتىلدى.

قازىر بۇل ورىن جاقىن ماڭداعى تۇرعىندار ءجيى باراتىن سۇيىكتى دەمالىس ورنىنا اينالعان.

ورتالىق ساياباق تا جاڭارتىلدى: جاياۋ جۇرگىنشىلەر جولاعى رەتتەلىپ، جاڭا ورىندىقتار مەن قوقىس جاشىكتەرى ورناتىلدى. ساياباقتارداعى قوعامدىق كەڭىستىكتەر زاماناۋي سيپات الىپ، جايلىلىعى ارتا ءتۇستى.

قوعامدىق كەڭىستىكتەر «Samruk Towers»، «Highvill Park» تۇرعىن ۇيلەرىنىڭ ماڭىندا جانە ۇركەر تۇرعىن الابىنداعى رابيعا ەسىمجانوۆا كوشەسىندە دە اباتتاندىرىلدى. قازىرگى ۋاقىتتا «Madrid»، «Copenhagen»، «Inju City»، «التىن شار» تۇرعىن ءۇي كەشەندەرىنىڭ جانىندا دا جۇمىس جالعاسىپ جاتىر. ماقسات – ءاربىر اۋماقتا جاياۋ جۇرۋگە ىڭعايلى كوگالداندىرىلعان دەمالىس ايماقتارىن كوبەيتۋ.

اۋلادا ورنالاسقان اۋماقتارعا دا ەرەكشە كوڭىل ءبولىنىپ وتىر. 2025 جىلى 19 مەكەنجاي بويىنشا كەشەندى اباتتاندىرۋ جۇرگىزىلدى، ونىڭ ىشىندە 10 اۋلا «حالىق قاتىساتىن بيۋدجەت» باعدارلاماسى بويىنشا جوندەلدى. سونىمەن قاتار 50 اۋلادا قالپىنا كەلتىرۋ جۇمىسى جۇرگىزىلدى.

سوڭعى ەكى جىلدا اۋداندا 10 مەملەكەتتىك مەكتەپ، ونىڭ ىشىندە پرەزيدەنت باستاماسىمەن سالىنعان 8 «كەلەشەك مەكتەبى»، سونداي-اق 4 جەكە مەكتەپ، 2 مەديتسينالىق ورتالىق، بالاباقشا، سپورت كەشەنى جانە ۇركەر تۇرعىن الابىندا ءورت دەپوسى پايدالانۋعا بەرىلدى. جىل سوڭىنا دەيىن تاعى 2 مەكتەپ، ال 2026 جىلى جاڭا بالاباقشا اشۋ جوسپارلانىپ وتىر.

سونىمەن قاتار الەۋمەتتىك ماڭىزى بار جوبالار جۇزەگە اسىپ جاتىر: «بوچچا» ينكليۋزيۆتى سپورت ورتالىعى، كوپفۋنكتسيونالدى كەشەن، «BI ART» مۋزىكالىق ونەر ورتالىعى جانە ورتالىق ساياباقتاعى شاڭعى-روللەر بازاسى سالىنىپ جاتىر.

اۋداندى كوگالداندىرۋ جۇمىسى دا قارقىندى ءجۇرىپ جاتىر. بيىل 7 مىڭعا جۋىق اعاش، 85 مىڭ بۇتا وتىرعىزىلدى. جاسىل جەلەكتەر تەك ورتالىق كوشەلەردە عانا ەمەس، اۋلالاردا دا وتىرعىزىلىپ جاتىر. سونىمەن بىرگە بيىل اۋداندا 11 كوشەدە جول سالىندى.

نۇرا اۋدانىنىڭ دامۋى مەن اباتتاندىرىلۋى تۇرعىنداردىڭ ۇسىنىستارىن ەسكەرە وتىرىپ، جۇيەلى تۇردە جالعاسىپ جاتىر.