«مەملەكەت باسشىسى «تازا قازاقستان» رەسپۋبليكالىق ەكولوگيالىق اكتسياسىنا قاتىسىپ، ەكوبەلسەندىلەرمەن بىرگە جاڭا «سامال» ساياباعى اۋماعىندا اعاش وتىرعىزدى.

پرەزيدەنتكە اباتتاندىرۋ جوسپارى تۋرالى باياندادىم. بيىل ەلوردادا شامامەن 173 قوعامدىق جانە اۋلا اۋماعىن اباتتاندىرۋدى، سونداي-اق 1,1 ميلليوننان استام جاسىل جەلەك (كوشەتتەر، بۇتالار، گۇلدەر، اعاشتار) وتىرعىزۋدى جوسپارلاپ وتىرمىز.

نەگىزگى جوبالاردىڭ ءبىرى – «سامال» ساياباعى اۋماعىن جايلى ەتۋ. مۇندا سپورت الاڭدارى، سۋ ايدىنى، سەرۋەندەۋ ورىندارى، جاياۋ جۇرگىنشىلەر كوپىرى، بالالارعا ارنالعان ويىن الاڭدارى، بەلسەندى دەمالىس ورناتۋعا ارنالعان ورىندار جانە باسقا دا نىساندار قاراستىرىلعان.

ساياباق وتباسىلىق، سپورت جانە مادەني دەمالىس وتكىزۋگە ارنالعان كوپفۋنكتسيونالدى اۋماق رەتىندە جوبالانىپ وتىر. ول قالا تۇرعىندارى ءۇشىن جاڭا تارتىمدى ورتالىققا اينالادى.

«مىڭجىلدىق» اللەياسىندا ءۇش جوبا ىسكە اسىرىلادى: قۋانىشباەۆ اتىنداعى تەاتر الدىندا ورنالاسقان سكۆەر، ۆوكزال ماڭىنداعى ساياباق جانە «نۇرلى جول» ۆوكزالىنىڭ اۋماعى. جۇمىس اياسىندا زاماناۋي جاياۋ جۇرگىنشىلەر مارشرۋتى، كوگالداندىرىلعان كەڭىستىكتەر جانە قالانىڭ جاڭا تارتىمدى ورىندارى اشىلادى.

Greenline جاياۋ جۇرگىنشىلەر جەلەكجولىنىڭ ەكىنشى كەزەڭىنىڭ قۇرىلىسى تولە بي كوشەسىنەن انەت بابا كوشەسىنە دەيىن جانە كۇلتەگىن كوشەسىنەن ايتماتوۆ كوشەسىنە دەيىن جالعاسادى. جوبا اياسىندا كەشەندى كوگالداندىرۋ، توعاندار جۇيەسى، ويىن جانە سپورت ايماقتارىن سالۋ قاراستىرىلعان.

سول سياقتى كوشەلەر مەن داڭعىلداردى اباتتاندىرۋ بويىنشا جەرگىلىكتى جوبالار دا جۇزەگە اسىرىلىپ جاتىر.

كەنەسارى كوشەسىنىڭ ۇزىندىعى 1,25 كم بولاتىن اۋماعى اباتتاندىرىلادى، ال ق.مۇڭايتپاسوۆ اتىنداعى ستاديون الدىنداعى جاڭا اللەيا دەمالىس ورنى بار زاماناۋي قوعامدىق كەڭىستىككە اينالادى. مومىشۇلى داڭعىلىنداعى ۇزىندىعى 1,5 كم بولاتىن اۋماقتا پرومەناد سالىنىپ، وندا جاياۋ جۇرگىنشىلەر مارشرۋتى، كوگالداندىرۋ جانە زاماناۋي اباتتاندىرۋ قاراستىرىلعان.

اباتتاندىرۋ جۇمىسى قالانىڭ بارلىق اۋدانىندا جۇرگىزىلىپ جاتىر»، – دەپ جازدى جەڭىس قاسىمبەك.