بۇگىن قىزىلوردا قالاسىنىڭ پرەزيدەنت ساياباعىندا 5 ماۋسىم – ەكولوگ كۇنى جانە دۇنيەجۇزىلىك قورشاعان ورتانى قورعاۋ كۇنىنە وراي اشىق اسپان استىندا «ەكولوگ ساعاتى» اتتى ەكولوگيالىق تانىمدىق ءىس-شارا ۇيىمداستىرىلدى.
ءىس-شارانىڭ باستى ماقساتى – تۇرعىندار اراسىندا ەكولوگيالىق مادەنيەتتى قالىپتاستىرۋ، قورشاعان ورتانى قورعاۋدىڭ ماڭىزدىلىعىن ءتۇسىندىرۋ، تابيعي رەسۋرستاردى ۇتىمدى پايدالانۋ جانە ەكولوگيالىق جاۋاپكەرشىلىكتى ارتتىرۋ.
تابيعات اياسىندا وتكەن مازمۇندى كەزدەسۋگە سالا ماماندارى مەن ەكولوگ عالىمدار قاتىسىپ، قورشاعان ورتانى قورعاۋ باعىتىنداعى وزەكتى ماسەلەلەر توڭىرەگىندە پىكىر الماستى.
اتاپ ايتقاندا، قىزىلوردا وبلىسى بويىنشا ەكولوگيا دەپارتامەنتىنىڭ قورشاعان ورتانى قورعاۋ اعا مەنەدجەرى حاديشا ابدىبايقىزى، ءاليحان بوكەيحان اتىنداعى قازاق ورمان شارۋاشىلىعى عىلىمي-زەرتتەۋ ينستيتۋتىنىڭ قىزىلوردا فيليالىنىڭ ديرەكتورى، اۋىل شارۋاشىلىعى عىلىمدارىنىڭ كانديداتى، قاۋىمداستىرىلعان پروفەسسور سامالبەك ورازبايۇلى جانە قورقىت اتا اتىنداعى قىزىلوردا ۋنيۆەرسيتەتىنىڭ بيولوگيا عىلىمدارى بويىنشا (PhD) فيلوسوفيا دوكتورى، قاۋىمداستىرىلعان پروفەسسور مىندەتىن اتقارۋشى نۇرگۇل ساعىندىققىزى بايانداما جاساپ، ەكولوگيالىق احۋال، تابيعاتتى ساقتاۋ مادەنيەتى، جاسىل ايماقتاردى كوبەيتۋ، سۋ رەسۋرستارىن ءتيىمدى پايدالانۋ جانە قورشاعان ورتا تازالىعى جونىندە وي-پىكىرلەرىمەن ءبولىستى.
ءىس-شارا بارىسىندا قاتىسۋشىلارعا قالدىقتاردى سۇرىپتاۋ، ەنەرگيا مەن سۋدى ۇنەمدەۋ، تابيعاتقا جاناشىرلىقپەن قاراۋ جانە تازالىق ساقتاۋ ماسەلەلەرى كەڭىنەن ءتۇسىندىرىلدى. سونىمەن قاتار، ەلىمىزدە جۇزەگە اسىرىلىپ جاتقان ەكولوگيالىق باستامالاردىڭ ماڭىزدىلىعى ايتىلىپ، تۇرعىنداردى تابيعاتتى قورعاۋعا بەلسەندى اتسالىسۋعا شاقىرىلدى.
تابيعاتتى قورعاۋ – بارشامىزعا ورتاق مىندەت!
#ەكولوگكۇنى #تازاقازاقستان #ەكولوگساعاتى #وزىڭنەنباستا
