قارجىلىق مونيتورينگ اگەنتتىگى باس پروكۋراتۋرانىڭ ۇيلەستىرۋىمەن اعىمداعى جىلدىڭ 8-10 اقپانى ارالىعىندا ەلىمىزدىڭ بارلىق وڭىرلەرىندە كەڭ اۋقىمدى وپەراتسيا جۇرگىزدى، ناتيجەسىندە تۇتىنۋ كووپەراتيۆىنىڭ اتىن جامىلعان "Asar Baspana" قارجى پيراميداسىنىڭ زاڭسىز قىزمەتى توقتاتىلدى.

قارجى پيراميداسىن ۇيىمداستىرۋشىلار سالىمشىلارعا جىلجىمايتىن مۇلىكتى، كولىك قۇرالدارىن، سونداي-اق تۇرمىستىق ونىمدەردى (بيولوگيالىق بەلسەندى قوسپالار، اس ءۇي ىدىستارى، كوسمەتيكا، تۇرمىستىق حيميا جانە باسقا دا تاۋارلار) ساتىپ الۋ ءۇشىن قاراجات سالۋدى ۇسىنعان، ال قارىمىنا اي سايىن سالىنعان سومانىڭ 30% - نا دەيىن پايدا تابۋعا ۋادە بەرگەن.

كومپانيالاردىڭ كەڭسەلەرىندە جانە كۇدىكتىلەردىڭ تۇرعىلىقتى جەرى بويىنشا جۇرگىزىلگەن ءتىنتۋ بارىسىندا 1,2 ملرد تەڭگەدەن استام سومادا قولما-قول اقشا جانە ىشىندە پرەميۋم كلاستى كولىكتەر بار 13 اۆتوماشينا تاركىلەندى.

ەكى قارجىلىق پيراميدا ۇيىمداستىرۋشى ۇستالىپ، ولارعا قاتىستى سوت ەكى اي مەرزىمگە قاماۋعا الۋ تۇرىندەگى ءىس-شارا سانكتسيالادى.

سوتقا دەيىنگى تەرگەۋ جالعاسۋدا.

قر قىجك-ءنىڭ 201-بابىنا سايكەس وزگە دە اقپارات جاريا ەتۋگە جاتپايدى.

ەگەر سىزگە ەكونوميكالىق قۇقىق بۇزۋشىلىق جاساۋ فاكتىلەرى بەلگىلى بولسا، بۇل تۋرالى "افم Insider" تەلەگرام بوتىنا حابارلاۋىڭىزدى سۇرايمىز.

انونيمدىلىككە كەپىلدىك بەرىلەدى