AR تەحنولوگياسىنا نەگىزدەلگەن قوسىمشا بولاشاقتا قۇرىلىس جۇمىستارىن از شىعىنمەن جۇزەگە اسىرۋعا مۇمكىندىك بەرەدى. پايدالانۋشىلار ءموبيلدى قۇرىلعىلار ارقىلى جوبالاردىڭ 3D-مودەلدەرىن قاراپ، QR-كودتى سكانەرلەۋ ارقىلى بولاشاق عيماراتتاردىڭ نەمەسە ەسكەرتكىشتەردىڭ ۇشولشەمدى مودەلىن شىنايى ورتادا كورە الادى. سونىمەن قاتار ولار نىسانداردىڭ ءاربىر ەلەمەنتىن بارلىق جاعىنان باعالاي الادى. ول ارقىلى تۇرعىندار قالا قۇرىلىسى شەشىمدەرىنە قاتىسا الادى. مىسالى، ەسكەرتكىشتەر مەن عيماراتتاردىڭ قۇرىلىسىن قولداپ، داۋىس بەرۋگە جانە ولاردى جۇزەگە اسىرۋعا قارجىلاي قولداۋ كورسەتۋگە مۇمكىندىكتەرى بار.

«مەن بۇل جوبانى تەك تەحنولوگيالاردى دامىتۋ ءۇشىن ەمەس، ادامداردىڭ ءومىرىن جاقسارتۋ ءۇشىن دە جاسادىم. قالا تۇرعىندارىنىڭ ءوز قالاسىمەن تىعىز بايلانىس ورناتىپ، ونىڭ دامۋىنا قاتىسۋى وتە ماڭىزدى دەپ سانايمىن. قوسىمشادا قالانىڭ كورىكتى جەرلەرى تۋرالى اقپاراتتىق جانە ويىن-ساۋىق مازمۇنداعى ۆيرتۋالدى گيد-چات-بوت بار. بۇل فۋنكتسيا قالالىق ينفراقۇرىلىممەن ءوزارا ارەكەتتەسۋدى جەڭىلدەتەدى: قولدانۋشىلار كافەلەردە الدىن الا ورىن الىپ، ەمحانالارعا جازىلا الادى جانە تۋريستىك نىسانداردى تاماشالاۋ مۇمكىندىگىنە يە بولادى. سونىمەن بىرگە قوسىمشا اۋا رايى بولجامىن، جول قوزعالىسى تۋرالى وزەكتى اقپاراتتى ۇسىنادى»، - دەيدى نۇرلىحان.

نۇرلىحاننىڭ جوباسى ءالى دە دامۋ ۇستىندە. جاقىن ارادا «اقىلدى كولىك» جۇيەسىمەن ينتەگراتسيالانۋ جانە قوسىمشانى قازاقستاننىڭ باسقا قالالارىندا قولدانۋ مۇمكىندىكتەرى كەڭەيتىلەدى. سونىمەن قاتار ساۋلەت، ديزاين جانە قالالىق جوسپارلاۋ سالالارىنا ارنالعان ءبىلىم بەرۋ قۇرالدارىنا قوسىمشانى ەنگىزۋ جوسپارلانىپ وتىر.

ايتا كەتۋ كەرەك، نۇرلىحان بۇعان دەيىن QEFO.KZ, TableTech جوبالارىنىڭ جانە Discover Abai تۋريستىك قوسىمشاسىنىڭ اۆتورى رەتىندە تانىلدى.