جەڭىستىڭ 81 جىلدىعىنا وراي، استانا قالاسىنىڭ ءا.مامبەتوۆ اتىنداعى مەملەكەتتىك دراما جانە كومەديا تەاترى «ار ادامى. باۋىرجان» دەرەكتى دراماسىن كەزەكتى رەت ۇسىندى
«ار ادامى. باۋىرجان» دەرەكتى دراماسى – ادامزات تاريحىنداعى ەڭ اۋىر ەكىنشى دۇنيەجۇزى سوعىسى جىلدارىنداعى قاسىرەت پەن ەرلىكتىڭ، ار-نامىستىڭ جانە وتانسۇيگىشتىكتىڭ كوركەم شەجىرەسى. تۋىندىدا، داڭقتى قولباسشى، حالىق قاھارمانى باۋىرجان مومىشۇلىنىڭ قايراتكەرلىك تۇلعاسى، جاۋىنگەرلىك رۋحى، ادىلەت پەن ادامگەرشىلىككە دەگەن بيىك مۇراتى ساحنالىق تىلمەن بەينەلەندى.
«بۇل ءىس-شارا ۇلى جەڭىستىڭ 81 جىلدىعىنا وراي ۇيىمداستىرىلدى. «ار ادامى. باۋىرجان» اتتى سپەكتاكل ەرەكشە ساحنالاندى.
كورەرمەندەر دە ءدان ريزا بولدى. قويۋشى رەجيسسەرى، قر ەڭبەك سىڭىرگەن قايراتكەرى – جۇلدىزبەك جۇمانباي، اۆتورى – باقىتبەك قادىر. باۋىرجان مومىشۇلىنىڭ سوعىس كەزىندەگى بەينەسىن دارىندى اكتەر – ءامىرحان ورازباق، ال زەينەتكەرلىك شاعىن مادەنيەت سالاسىنىڭ ۇزدىگى ايبول شاكىرجانوۆ سومدادى. بيىل ەكىنشى رەت ساحنالانىپ وتىر.
اڭىز ادام، باتىر باۋىرجان مومىشۇلىنىڭ بالالىق شاعى، سوعىستاعى ەرلىكتەرى، ومىرلىك ۇستانىمى كورسەتىلدى»، – دەدى ءا.مامبەتوۆ اتىنداعى دراما جانە كومەديا تەاترىنىڭ ۇيىمداستىرۋ ءبولىمىنىڭ مەنەدجەرى نۇرعابدين ءبيبىسارا.
استانا اكىمدىگى
