وقۋشىلار دەنە شىنىقتىرۋ نورماتيۆتەرىن ورىنداپ، ءارتۇرلى قاشىقتىققا جۇگىرۋ جاتتىعۋلارىن جاسادى، اۆتوماتتى بولشەكتەۋ جانە جيناقتاۋ داعدىلارىن مەڭگەردى، سونداي-اق دالالىق دايىندىق ەلەمەنتتەرىن پىسىقتادى.

قاتىسۋشىلاردىڭ تۇرۋى مەكتەپتەر بازاسىندا ۇيىمداستىرىلىپ، قولايلى جاعدايلار مەن ءتورت مەزگىل تاماقتانۋ قامتاماسىز ەتىلدى. دەنساۋلىق ساقتاۋ ماسەلەلەرىنە ەرەكشە كوڭىل ءبولىنىپ، مەديتسينالىق قىزمەتكەرلەر ۇنەمى باقىلاۋ جۇرگىزىپ، قاجەتتى جاعدايلاردا جەدەل كومەك كورسەتتى.

جالپى اقتوبە وبلىسى بويىنشا جيىندارعا 3800-دەن استام وقۋشى قاتىستى، ولاردىڭ 1986-سى — اقتوبە قالاسىنىڭ وقۋشىلارى، 1814-ءى — اۋدان مەكتەپتەرىنىڭ وقۋشىلارى.

بۇگىن №77 جالپى ءبىلىم بەرەتىن ورتا مەكتەپ بازاسىندا سالتاناتتى جابىلۋ ءراسىمى ءوتتى.

اقتوبە وبلىسى ءبىلىم باسقارماسى باسشىسىنىڭ ورىنباسارى اسحات ءىزباسار وسىنداي ءىس-شارالاردى وتكىزۋدىڭ ماڭىزدىلىعىن اتاپ ءوتتى:

«وقۋ-دالالىق جيىنداردى وتكىزۋ – جاس ۇرپاقتى اسكەري-پاتريوتتىق تاربيەلەۋدىڭ ماڭىزدى قۇرامداس بولىگى بولىپ تابىلادى. اتا-انالارعا وقۋشىلاردىڭ قاتىسۋىن قولداپ، ۇيىمداستىرۋعا كورسەتكەن كومەگى ءۇشىن العىس بىلدىرەمىز. بۇل جيىن بارىسىندا الىنعان ءبىلىم مەن داعدىلار جاس بۋىننىڭ جاۋاپتى ءارى ەلجاندى ازامات بولىپ قالىپتاسۋىنا بەرىك نەگىز بولادى دەپ سەنەمىز».

ءىس-شارا بارىسىندا بەلسەندىلىك، ءتارتىپ جانە ۇيىمشىلدىق تانىتقان وقۋشىلاردى ماراپاتتاۋ ءراسىمى ءوتتى. وقۋشىلارعا گراموتالاردى اقتوبە وبلىسى قورعانىس ىستەرى دەپارتامەنتى شتابىنىڭ باستىعى اليبەك كوشەرباەۆ تابىستادى.

ءىس-شارا اياسىندا مۋزىكالىق نومىرلەر ۇسىنىلىپ، ساپتىق جۇرىسپەن سالتاناتتى مارش ۇيىمداستىرىلدى جانە ساپتىق ءان ورىندالدى، سونداي-اق وقۋ-جاتتىعۋ جاتتىعۋلارى كورسەتىلدى.