سەنەگالدىڭ داكار قالاسىندا ءوتىپ جاتقان IV جازعى جاسوسپىرىمدەر وليمپياداسىندا قازاقستاندىق ۆەلوشاباندوز انەل تاشباي شوسسەدەگى ۆەلوسپورت جارىسىندا جەڭىمپاز اتاندى. جەكە ۋاقىتقا ءجۇرۋ سايىسىندا ول 11 مينۋت 32,57 سەكۋند ناتيجەسىمەن مارەگە ءبىرىنشى بولىپ جەتتى.
انەلدىڭ جەڭىسى قازاقستان قۇراماسىنا وسى ويىندارداعى ەكىنشى التىن مەدالدى اكەلدى. بۇعان دەيىن دزيۋدوشى فاتيما سۇپىعاليەۆا جەڭىمپاز اتانعان بولاتىن. سونداي-اق ترياتلونشى رامازان ايگەنوۆ ەل قورجىنىنا قولا مەدال سالدى.
جاس سپورتشىنىڭ جەتىستىگى قازاقستاندىق ۆەلوسپورت ءداستۇرىنىڭ جالعاسى ءارى جاس بۋىن سپورتشىلارىنىڭ الەۋەتىن كورسەتەدى. قازاقستاندىق ۆەلوشاباندوزدار جازعى ازيا ويىندارىندا ەل تاريحىندا بارلىعى 31 مەدال جەڭىپ العان. 2026 جىلى ريناتا سۋلتانوۆا جەكە ۋاقىتقا ءجۇرۋ سايىسىندا التىن مەدال يەلەنسە، الەكسەي لۋتسەنكو جەكە ۋاقىتقا ءجۇرۋ جانە توپتىق جارىستاردا جەڭىسكە جەتىپ، ەكى التىن مەدال جەڭىپ الدى. ال ەۆگەني فەدوروۆ توپتىق جارىستا كۇمىس جۇلدەگەر اتاندى.
سپورت رەزەرۆىن دايارلاۋ وتاندىق سپورتتى دامىتۋدىڭ ماڭىزدى باعىتتارىنىڭ ءبىرى بولىپ قالا بەرەدى. قازاقستاندا وليمپيادالىق رەزەرۆتىڭ مامانداندىرىلعان سپورت مەكتەپتەرى مەن مەكتەپ-ينتەرنات-كوللەدجدەرى جۇمىس ىستەيدى. تۋريزم جانە سپورت مينيسترلىگىنىڭ مالىمەتىنشە، ەلىمىزدەگى 14 وبلىستىق جانە 5 رەسپۋبليكالىق مامانداندىرىلعان مەكتەپ-ينتەرنات-كوللەدجدە 6 مىڭنان استام بالا سپورتپەن شۇعىلدانادى. ۆەلوسپورت تا بەيىندى سپورت مەكتەپتەرى مەن سپورت رەزەرۆىن دايارلاۋ ۇيىمدارىندا قامتىلعان. بۇل جاس سپورتشىلاردىڭ كاسىبي دايارلىقتان ءوتىپ، ءتۇرلى دەڭگەيدەگى جارىستارعا قاتىسۋىنا مۇمكىندىك بەرەدى.
قازاقستان رەسپۋبليكاسىنىڭ تۋريزم جانە سپورت مينيسترلىگى انەل تاشباي مەن ونىڭ جاتتىقتىرۋشىلار قۇرامىن جوعارى جەتىستىگىمەن قۇتتىقتايدى. جاسوسپىرىمدەر وليمپياداسىنداعى بۇل جەڭىس – سپورتشىنىڭ ءوزى ءۇشىن دە، قازاقستاندىق ۆەلوسپورت ءۇشىن دە ماڭىزدى جەتىستىك ءارى الداعى سپورتتىق جولىنداعى ۇلكەن بەلەس.
ءباسپاسوز قىزمەتى
