الماتىدا «دەمالىس كۇندەرى جارمەڭكەلەرىنىڭ» سانى ارتىپ كەلەدى. 16 مامىردان باستاپ جەتىسۋ اۋدانىنداعى قۇلاگەر شاعىناۋدانىندا جاڭا ساۋدا الاڭى جۇمىسىن باستايدى. «الماتى» اكك» اق-نىڭ وكىلدەرىنىڭ حابارلاۋىنشا، جاڭا جارمەڭكە تۇرعىنداردى قولجەتىمدى ازىق-تۇلىكپەن، اسىرەسە الەۋمەتتىك ماڭىزى بار ونىمدەرمەن قامتاماسىز ەتۋگە جانە قالاداعى ساۋدا الاڭدارىنىڭ جەلىسىن كەڭەيتۋگە باعىتتالعان.

جارمەڭكەگە الماتى قالاسى مەن الماتى وبلىسىنىڭ ەڭبەكشىقازاق، تالعار، ىلە، قاراساي جانە جامبىل اۋداندارىنان اۋىل شارۋاشىلىعى ونىمدەرىن وندىرۋشىلەر قاتىسادى. سونىمەن قاتار شىعىس قازاقستان وبلىسىنىڭ كاسىپكەرلەرى دە ءونىمىن ۇسىنادى. ساتىلىمعا 1000-نان استام ءتۇرلى تاۋار شىعارىلادى.

2026 جىلدىڭ باسىنان بەرى دەمالىس كۇنگى جارمەڭكەلەردە شامامەن 8,5 مىڭ توننا ازىق-تۇلىك ءونىمى ساۋدالانعان. ونىڭ ىشىندە الەۋمەتتىك ماڭىزى بار ازىق-تۇلىك تاۋارلارى دا بار.

قازىرگى تاڭدا «الماتى» اكك» بوستاندىق اۋدانىنداعى (قازاقفيلم شاعىناۋدانى) جانە اۋەزوۆ اۋدانىنداعى (وتەگەن باتىر كوشەسى - اباي داڭعىلى) جارمەڭكەلەردى كەزەڭ-كەزەڭىمەن جاڭعىرتۋ جۇمىستارى قولعا الىنعان. جوبا ساۋدا ورىندارىنىڭ جايلىلىعىن ارتتىرۋعا، ينفراقۇرىلىمدى جاڭارتۋعا جانە سانيتارلىق تالاپتارعا سايكەستەندىرۋگە باعىتتالعان.

«الماتى» اكك» مالىمەتىنشە، الداعى ۋاقىتتا جارمەڭكەلەردى كەزەڭ-كەزەڭىمەن قالانىڭ بارلىق سەگىز اۋدانىنا ىسكە قوسۋ جوسپارلانىپ وتىر.

«دەمالىس كۇنگى جارمەڭكە» ءار سەنبى جانە جەكسەنبى كۇندەرى ساعات 09:00-دەن 18:00-گە دەيىن مىنا مەكەنجايلاردا وتەدى:

— بوستاندىق اۋدانى — قازاقفيلم شاعىناۋدانى;

— اۋەزوۆ اۋدانى — رىسقۇلبەكوۆ كوشەسى، 33/2;

— مەدەۋ اۋدانى — مەندىقۇلوۆ جانە بەكتۇروۆ كوشەلەرىنىڭ قيىلىسى;

— المالى اۋدانى — ماسانچي كوشەسى، ايتەكە بي مەن گوگول كوشەلەرىنىڭ ارالىعى;

— جەتىسۋ اۋدانى — قۇلاگەر شاعىناۋدانى.