الماتىدا رەسپۋبليكالىق «تازا قازاقستان» باعدارلاماسى اياسىندا ەكولوگيالىق مادەنيەتتى قالىپتاستىرۋعا، سانالى تۇتىنۋ قاعيداتتارىن دامىتۋعا جانە قالدىقتاردى بولەك جيناۋ جۇيەسىن جەتىلدىرۋگە باعىتتالعان جاڭا تسيفرلىق شەشىمدەر تانىستىرىلدى.

جوبا الماتى قالاسى اكىمدىگىنىڭ قولداۋىمەن، الماتى قالاسى ەكولوگيا جانە قورشاعان ورتا باسقارماسىنىڭ باستاماسىمەن ەكولوگيالىق سەرىكتەستەرمەن بىرلەسىپ جۇزەگە اسىرىلۋدا.

ECO Network تسيفرلىق پلاتفورماسىنىڭ تانىستىرىلىمى ارباتتا وتكەن ەكولوگيالىق فەستيۆال اياسىندا ءوتتى. ءىس-شارانى الماتى قالاسى ەكولوگيا جانە قورشاعان ورتا باسقارماسى ءبىرىنشى ەكو-حابپەن جانە ECO Network جوباسىمەن بىرلەسىپ ۇيىمداستىردى. ءبىر جىل بۇرىن ءدال وسى جەردە قايتا وڭدەلگەن پلاستيكتەن جاسالعان قالاداعى العاشقى ورىندىق ورناتىلعان.

ءىس-شاراعا مەملەكەتتىك مەكەمەلەردىڭ وكىلدەرى قاتىسىپ، جاڭا تسيفرلىق پلاتفورمانىڭ مۇمكىندىكتەرىمەن تانىستى. سونىمەن قاتار ەكولوگيالىق باستاماعا قاتىسۋ تەتىكتەرى ءتۇسىندىرىلدى. 3 تامىزدان باستاپ مەملەكەتتىك ۇيىمداردىڭ قىزمەتكەرلەرى تۇرمىستىق قالدىقتاردى سۇرىپتاپ، ولاردى تۇراقتى تۇردە قايتا وڭدەۋگە وتكىزۋ ارقىلى باستاماعا قاتىسا الادى. ال تسيفرلىق پلاتفورما ۇيىمداردىڭ ەكولوگيالىق جوبالارعا قاتىسۋ بەلسەندىلىگىن ناقتى ۋاقىت رەجيمىندە باقىلاۋعا مۇمكىندىك بەرەدى.

الداعى ۋاقىتتا پلاتفورمانىڭ مۇمكىندىكتەرى كەزەڭ-كەزەڭىمەن كەڭەيتىلەدى. جاساندى ينتەللەكت نەگىزىندەگى جاڭا سەرۆيستەر ەنگىزىلىپ، جۇيەگە بيزنەس وكىلدەرىن، ءبىلىم بەرۋ ۇيىمدارىن، كوللەدجدەر مەن جوعارى وقۋ ورىندارىن قوسۋ جوسپارلانىپ وتىر.

ءىس-شارا بارىسىندا قالا تۇرعىندارىنا ارنالعان ەكى جاڭا ەكولوگيالىق جوبا دا تانىستىرىلدى. ولار الماتى قالاسى ەكولوگيا جانە قورشاعان ورتا باسقارماسىنىڭ قولداۋىمەن ەكولوگيالىق سەرىكتەستەرمەن بىرلەسىپ جۇزەگە اسىرىلىپ، قالدىقتاردى بولەك جيناۋ مادەنيەتىن قالىپتاستىرۋعا، قايتا وڭدەلەتىن شيكىزات كولەمىن ارتتىرۋعا جانە تۇرعىنداردىڭ ەكولوگيالىق جاۋاپكەرشىلىگىن كۇشەيتۋگە باعىتتالعان.

العاشقى جوبا - «قايتا وڭدەلگەن پلاستيكتەن جاسالعان جيھاز». جوبا اياسىندا تۇرعىندار ماركوۆ كوشەسى، 44 مەكەنجايىنداعى جانە Satbayev University اۋماعىنداعى ەكو-حابتارعا پلاستيكتىڭ جەكەلەگەن تۇرلەرىن، سونىڭ ىشىندە جەمىس-جيدەك جاشىكتەرىن وتكىزە الادى. جينالعان شيكىزات تۋرالى مالىمەتتەر econetwork.me پلاتفورماسىندا تىركەلەدى. بەلگىلەنگەن كولەمگە قول جەتكىزگەن قاتىسۋشىلار قايتا وڭدەلگەن پلاستيكتەن جاسالعان بۇيىمدارعا تاپسىرىس بەرە الادى.

ەكىنشى جوبا - «تۋعان جەرىمنىڭ جاناشىرىمىن». بۇل جوبا اياسىندا تۇرعىندار ۇيالى تەلەفونداردان، پلانشەتتەردەن، ەلەكترلى ساموكاتتاردان، درونداردان جانە باسقا دا قۇرىلعىلاردان الىنعان ليتي-يوندى اككۋمۋلياتورلاردى قايتا وڭدەۋگە تاپسىرا الادى. قابىلداۋ ەكو-حابتاردا جۇزەگە اسىرىلادى. قابىلداناتىن بۇيىمداردىڭ تولىق ءتىزىمى econetwork.me پلاتفورماسىندا جاريالانادى. ەڭ بەلسەندى قاتىسۋشىلار باعالى سىيلىقتارمەن ماراپاتتالادى.

«تازا قازاقستان» رەسپۋبليكالىق ەكو-اكتسياسى ەكولوگيالىق مادەنيەتتى قالىپتاستىرۋعا تىڭ سەرپىن بەردى. بۇگىندە قالدىقتاردى بولەك جيناۋ جۇيەسىن دامىتۋعا، زاماناۋي تەحنولوگيالاردى ەنگىزۋگە جانە تۇرعىنداردىڭ ەكولوگيالىق جاۋاپكەرشىلىگىن ارتتىرۋعا باعىتتالعان باستامالار سانى ارتىپ كەلەدى. الماتى قالاسىنىڭ اكىمدىگى مۇنداي جوبالاردى ءاردايىم قولدايدى جانە الداعى ۋاقىتتا دا ەكولوگيالىق باستامالاردى سەرىكتەستەرمەن جانە قالا تۇرعىندارىمەن بىرلەسىپ جۇزەگە اسىرۋ ءۇشىن قولايلى جاعداي جاساۋدى جالعاستىرا بەرەدى»، – دەدى الماتى قالاسى ەكولوگيا جانە قورشاعان ورتا باسقارماسىنىڭ باسشىسى سەرىك ادىلباەۆ.