بۇگىن الماتى وبلىسىنىڭ تالعار اۋدانىندا 26 وتباسى باسپانا باقىتىنا كەنەلدى. تۇزدىباستاۋ اۋىلىندا بوي كوتەرگەن تۇرعىن ۇيلەر الەۋمەتتىك از قامتىلعان وتباسىلارعا بەرىلدى. سالتاناتتى راسىمگە الماتى وبلىسىنىڭ اكىمى شىڭعىس ءارىنوۆ قاتىسىپ، ازاماتتارعا پاتەر كىلتىن تابىستادى، – دەپ حابارلايدى الماتى وبلىسى اكىمىنىڭ ءباسپاسوز قىزمەتى.

قازىرگى تاڭدا تالعار اۋدانىندا 9 مىڭنان استام ازامات ءۇي كەزەگىنە تىركەلگەن. جىل باسىنان بەرى اۋداندا 259 ازامات قونىس تويىن اتاپ ءوتتى. ودان بولەك 72 وتباسى بيۋدجەت ەسەبىنەن جەڭىلدەتىلگەن نەسيەلىك باسپاناعا قول جەتكىزدى.

شارادا شىڭعىس سايرانۇلى العاشقى بولىپ قۇتتىقتاۋ ءسوز سويلەپ، قونىس يەلەرىنە ىزگى تىلەگىن ارنادى. 

«ءوز شاڭىراعىنىڭ استىندا بالا-شاعانىڭ شاتتىعىنا بولەنىپ، جاقىندارىنىڭ ورتاسىندا الاڭسىز عۇمىر كەشۋ – ادامنىڭ ەڭ ۇلكەن باقىتى. سوندىقتان حالىقتى قولجەتىمدى تۇرعىن ۇيمەن قامتاماسىز ەتۋ – الدىمىزدا تۇرعان ماڭىزدى مىندەتتەردىڭ ءبىرى. بۇل باعىتتاعى جۇمىستىڭ جۇگى دە اۋىر ەكەنىن جاقسى تۇسىنەمىز. ازاماتتاردىڭ ۋاقىتىلى باسپانالى بولۋى بىزگە جۇكتەلگەن ۇلكەن جاۋاپكەرشىلىك دەپ بىلەمىز. سول سەبەپتى بۇل جۇمىستى ءبىر ساتكە دە باسەڭدەتپەيمىز»، – دەدى ايماق باسشىسى. 

جاڭا پاتەردىڭ يەسى اتانعان تۇرعىننىڭ ءبىرى – جالعىزباستى انا جاننا قۇرمانبەكوۆا. 

«بۇگىن كوپتەن كۇتكەن باسپاناعا قول جەتكىزىپ، قۋانىشىمىز قوينىمىزعا سىيماي تۇر. بۇل ءساتتى 20 جىل بويى كۇتتىك. باسپانامىزدىڭ ءىشىن ارالاپ، كوردىك. 2 بولمەلى پاتەر كەڭ ءارى ادەمى. ساپاسى تولىق كوڭىلىمىزدەن شىقتى. ءوزىم مەديتسينا سالاسىندا قىزمەت ەتەمىن. ءۇش بالانى تاربيەلەپ وتىرعان انامىن. وسىنداي مۇمكىندىك سىيلاعان وبلىس، اۋدان اكىمدىگىنە العىس ايتامىن»، – دەدى تۇرعىن.

ءباسپاسوز قىزمەتى