وتكەن اپتادا ءوڭىر اۋماعىندا جۇرگىزىلگەن جەدەل ءىس-شارالار بارىسىندا ءوز ەلىندە ءتۇرلى قىلمىستار جاسادى دەگەن كۇدىكپەن كورشىلەس ەلدىڭ ازاماتتارى ۇستالدى. ولاردىڭ قاتارىندا 1981 جىلى تۋعان ءبىر ايەل جانە 1980, 1989, 1990 جىلدارى تۋعان ءۇش ەر ادام بار. پوليتسيا مالىمەتىنشە، ۇستالعانداردىڭ ءبىرى اسا ءىرى كولەمدەگى الاياقتىق ءۇشىن، ەكىنشىسى ازاماتتاردى تاۋ-كەن-مەتاللۋرگيا كومبيناتىنا جۇمىسقا ورنالاستىرۋ سىلتاۋىمەن الداعانى ءۇشىن ىزدەۋدە بولعان. ايەل ادام ءموبيلدى تەلەفونداردى ساتۋ ارقىلى تۇسكەن اقشانى يەمدەنىپ العان دەگەن كۇدىككە ىلىنسە، تاعى ءبىر ەر ادام ەكونوميكالىق قىلمىستار جاساعانى ءۇشىن ىزدەۋدە بولعان. الدىن الا مالىمەت بويىنشا شەتەلدىكتەر قازاقستان اۋماعىندا جاسىرىنىپ، مۇندا دا قىلمىستىق ارەكەتتەرىن جالعاستىرۋدى كوزدەگەن بولۋى مۇمكىن. جەدەل اقپاراتتىڭ ناتيجەسىندە پوليتسيا قىزمەتكەرلەرى ولاردى قۇرىقتادى.

- قازىرگى ۋاقىتتا ولار ۋاقىتشا ۇستاۋ يزولياتورىنا قامالدى. ۇستالعانداردى ءوز ەلىنە قايتارۋ ماسەلەسى قاراستىرىلۋدا. سونىمەن قاتار ولاردىڭ وزگە دە قىلمىستارعا قاتىسى بار-جوعى تەكسەرىلىپ جاتىر، - دەپ مالىمدەدى پوليتسيا وكىلدەرى.

الماتى وبلىسى پوليتسيا دەپارتامەنتى حالىقارالىق قۇقىق قورعاۋ ورگاندارىمەن ورناتىلعان ءوزارا ءىس-قيمىل قوعامدىق قاۋىپسىزدىكتى قامتاماسىز ەتىپ، ترانسشەكارالىق قىلمىسپەن كۇرەستە ءتيىمدى ناتيجە بەرىپ وتىرعانىن اتاپ ءوتتى.

اقپارات كوزى Polisia.kz سايتىندا: https://polisia.kz/almaty-oblysynda-bir-apta-ishinde-memleketaralyq-izdeude-zhurgen-tort-sheteldik-azamat-ustaldy/