اۋىل شارۋاشىلىعى ءمينيسترى ايداربەك ساپاروۆ سالا كاسىپكەرلەرىن وندىرىستىك كورسەتكىشتەرمەن عانا شەكتەلمەي، اۋىلدىق اۋماقتاردى دامىتۋعا بەلسەندى ينۆەستيتسيا سالۋعا، تۇراقتى جۇمىس ورىندارىن قۇرۋعا جانە زاماناۋي الەۋمەتتىك ينفراقۇرىلىم قالىپتاستىرۋعا شاقىردى. بۇل تۋرالى مينيستر قاراعاندى وبلىسىنا جۇمىس ساپارى بارىسىندا ءوڭىردىڭ اگرارشىلارىمەن كەزدەسۋدە جانە وبلىستاعى وزىق شارۋاشىلىقتاردىڭ ءبىرى – «شاحتەرسكوە» سەرىكتەستىگىنىڭ جۇمىسىمەن تانىسۋ كەزىندە ايتتى.
ايداربەك ساپاروۆ ەلىمىزدە ەگىن جيناۋ ناۋقانى جالپى العاندا جاقسى قارقىنمەن ءجۇرىپ جاتقانىن اتاپ ءوتتى. بۇگىندە ءداندى جانە ءداندى-بۇرشاقتى داقىلدار 10 ملن گەكتار القاپتان، ياعني جالپى ەگىس القابىنىڭ 63,9 پايىزىنان جينالدى. 14 ملن توننا استىق باستىرىلدى.
ەگىن جيناۋ قارقىنى وتكەن جىلدىڭ سايكەس كەزەڭىمەن سالىستىرعاندا جوعارى. 2025 جىلدىڭ وسى كەزەڭىندە 6,7 ملن گەكتار القاپ جينالىپ، 9,5 ملن توننا استىق باستىرىلعان بولاتىن.
قاراعاندى وبلىسىندا ءداندى جانە ءداندى-بۇرشاقتى داقىلدار 646 مىڭ گەكتاردان، ياعني جالپى القاپتىڭ 71,4 پايىزىنان جينالدى. بۇدان بولەك، 197 مىڭ توننا كارتوپ پەن 63 مىڭ توننا كوكونىس جينالدى.
كەزدەسۋدە تالقىلانعان نەگىزگى ماسەلەلەردىڭ ءبىرى – اۋىل شارۋاشىلىعى تاۋارىن وندىرۋشىلەر ءۇشىن قارجىلىق قولداۋدىڭ قولجەتىمدىلىگى بولدى.
«كەڭ دالا» باعدارلاماسى اياسىندا كوكتەمگى ەگىس جانە ەگىن جيناۋ جۇمىستارىن جۇرگىزۋگە قاراعاندى وبلىسىنداعى 233 فەرمەرگە جالپى سوماسى 15,6 ملرد تەڭگە كولەمىندە قارجىلاندىرۋ بەرىلدى. بۇل قولداۋ 182 مىڭ گەكتاردان استام ەگىس القابىن قامتىدى.
جەڭىلدەتىلگەن ليزينگ باعدارلاماسى بويىنشا جالپى قۇنى 18,2 ملرد تەڭگە بولاتىن 925 بىرلىك اۋىل شارۋاشىلىعى تەحنيكاسىن جەتكىزۋگە 866 شارت جاسالدى.
سولتۇستىك قازاقستان وبلىسىنىڭ تاجىريبەسىن تاراتۋ باعدارلاماسى اياسىندا وڭىرگە بولىنگەن 7 ملرد تەڭگە تولىق يگەرىلدى. سۋارمالى ەگىنشىلىكتى دامىتۋ جانە تاۋارلىق ءسۇت فەرمالارىن سالۋ باعىتتارى بويىنشا ءتورت جوبا قارجىلاندىرىلدى.
مينيستر اگروونەركاسىپتىك كەشەننىڭ قارقىندى دامۋى تۇراقتى جۇمىسپەن قامتۋدى قامتاماسىز ەتۋگە، الەۋمەتتىك ينفراقۇرىلىمدى دامىتۋعا جانە اۋىل تۇرعىندارىنىڭ ءومىر ءسۇرۋ ساپاسىن ارتتىرۋعا ىقپال ەتەتىنىن اتاپ ءوتتى.
وسىعان بايلانىستى ول كاسىپكەرلەردى وزدەرى جۇمىس ىستەيتىن اۋىلداردىڭ ينفراقۇرىلىمىن دامىتۋعا بەلسەندى ينۆەستيتسيا سالۋعا جانە اۋىل تۇرعىندارى ءۇشىن قولايلى ءومىر ءسۇرۋ جاعدايلارىن جاساۋعا شاقىردى.
«اگرارشىلار تەك ماۋسىمدىق جۇمىسقا ادام جالداماي، اۋىل تۇرعىندارىن جىل بويى تۇراقتى جۇمىسپەن قامتۋعا ۇمتىلۋى كەرەك. ادامنىڭ تۇراقتى جۇمىسى، لايىقتى ءومىر ءسۇرۋ جاعدايى جانە تۋعان اۋىلىندا قاجەتتى ينفراقۇرىلىمى بولعان كەزدە ونىڭ ەڭبەككە دە، جەرگە دە كوزقاراسى مۇلدە وزگەشە بولادى. بۇل تۋرالى مەملەكەت باسشىسى دا بىرنەشە رەت ايتقان»، – دەدى ايداربەك ساپاروۆ.
مينيستر ءتيىمدى شارۋاشىلىق جۇرگىزۋدىڭ جانە بيزنەستىڭ الەۋمەتتىك جاۋاپكەرشىلىگىنىڭ جارقىن ۇلگىسى رەتىندە جۇمىس ساپارى بارىسىندا بارعان «شاحتەرسكوە» سەرىكتەستىگىنىڭ قىزمەتىن اتاپ ءوتتى.
كاسىپورىن اۋىل تۇرعىندارىن جۇمىسپەن قامتىپ، اۋىلدىڭ الەۋمەتتىك-ەكونوميكالىق دامۋىنا ەلەۋلى ۇلەس قوسىپ وتىر. شارۋاشىلىق كارتوپ تۇقىمىن ءوسىرۋ بويىنشا ەليتالىق تۇقىم شارۋاشىلىعى مارتەبەسىنە يە جانە ءداندى داقىلدار تۇقىمىنىڭ باستاپقى تۇقىم ءوندىرۋشىسى بولىپ تابىلادى. سونىمەن قاتار شارۋاشىلىق بازاسىندا ەتتى باعىتتاعى انگۋس تۇقىمدى ءىرى قارا مال وسىرەتىن ءىرى رەپرودۋكتور جۇمىس ىستەيدى.
مينيستر كارتوپ قويماسىنىڭ جۇمىسىمەن، كارتوپ جيناۋ بارىسىمەن، سونداي-اق ەكى ءىرى ينۆەستيتسيالىق جوبانىڭ جۇزەگە اسىرىلۋ بارىسىمەن تانىستى. اتاپ ايتقاندا، 1 792 گەكتار سۋارمالى جەردى اۋىل شارۋاشىلىعى اينالىمىنا ەنگىزۋ جانە قۋاتى 15 مىڭ توننا بولاتىن جاڭا كوكونىس قويماسىن سالۋ جوبالارى جۇزەگە اسىرىلۋدا.
كاسىپورىن ءوندىرىستى كەڭەيتۋگە عانا ەمەس، اۋىلدىڭ الەۋمەتتىك ينفراقۇرىلىمىن دامىتۋعا دا ينۆەستيتسيا سالىپ وتىر.
ءمينيستردىڭ پىكىرىنشە، ءدال وسىنداي ءتاسىل اۋىلدىق جەرلەردەگى بيزنەس ءۇشىن نەگىزگى باعدارعا اينالۋى ءتيىس. ياعني كاسىپورىننىڭ ەكونوميكالىق تيىمدىلىگى ءوزى جۇمىس ىستەيتىن اۋماقتىڭ دامۋىنا دەگەن جاۋاپكەرشىلىكپەن قاتار ءجۇرۋى قاجەت.
«شاحتەرسكوە» سەرىكتەستىگىنىڭ باسشىسى، «ەڭبەك ەرى» اتاعىنىڭ يەگەرى گەورگي پروكوپ مەملەكەتتىك قولداۋ قازىرگى تاڭدا اۋىل شارۋاشىلىعى ءوندىرىسىن دامىتۋ مەن ونىڭ تيىمدىلىگىن ارتتىرۋدىڭ ماڭىزدى فاكتورى ەكەنىن اتاپ ءوتتى.
«بۇگىندە اۋىل شارۋاشىلىعى تاۋارىن وندىرۋشىلەردى قولداۋعا باعىتتالعان تۇتاس قۇرالدار كەشەنى ازىرلەندى. ينۆەستيتسيالىق سۋبسيديالار مەن جەڭىلدەتىلگەن نەسيەلەندىرۋدىڭ ارقاسىندا ءبىز تەحنيكانى جاڭارتىپ، سۋارمالى ەگىنشىلىكتى دامىتىپ، زاماناۋي ساقتاۋ نىساندارىن سالىپ، ءوندىرىس قۋاتىن كەزەڭ-كەزەڭىمەن ارتتىرا الامىز»، – دەدى گەورگي پروكوپ.
2025 جىلى «شاحتەرسكوە» سەرىكتەستىگىنىڭ نەگىزگى كاپيتالىنا سالعان ينۆەستيتسيا كولەمى 5 ملرد تەڭگەدەن استى.
ايداربەك ساپاروۆ ەلدىڭ ازىق-تۇلىك قاۋىپسىزدىگىن نىعايتۋ ءۇشىن سۋارمالى القاپتاردىڭ كولەمىن ۇلعايتۋ جانە اۋىل شارۋاشىلىعى ونىمدەرىن ساقتاۋدىڭ زاماناۋي نىساندارىن قۇرۋ ستراتەگيالىق ماڭىزعا يە ەكەنىن اتاپ ءوتتى.
ءوڭىردىڭ اۋىل شارۋاشىلىعى تاۋارىن وندىرۋشىلەرى مينيسترگە مەملەكەتتىك قولداۋ مەن قارجىلاندىرۋ، ءوندىرىستى دامىتۋ، ينۆەستيتسيالىق جوبالاردى ىسكە اسىرۋ جانە اگروونەركاسىپتىك كەشەندى ودان ءارى دامىتۋ ماسەلەلەرى بويىنشا وزدەرىن تولعاندىرعان سۇراقتارىن قويىپ، تۇششىمدى جاۋاپ الدى.
ءباسپاسوز قىزمەتى
