بۇگىن ايماق باسشىسى بەرىك ءۋالي اقىن، ادەبيەتتانۋشى عالىم، فيلولوگيا عىلىمدارىنىڭ دوكتورى، لەۆ گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى جانات اسكەربەكقىزىمەن كەزدەستى.

كەزدەسۋ بارىسىندا ءوڭىردىڭ ادەبيەتى مەن مادەنيەتىن دامىتۋ، ۇلتتىق رۋحانياتتى دارىپتەۋ، جاس قالامگەرلەردى قولداۋ جانە شىعارماشىلىق بايلانىستى نىعايتۋ ماسەلەلەرى تالقىلاندى.

وبلىس اكىمى اقىننىڭ قازاق ادەبيەتى مەن رۋحانياتىنا قوسقان ۇلەسى زور ەكەنىن اتاپ ءوتىپ، ءوڭىردىڭ مادەنيەت سالاسىندا اتقارىلىپ جاتقان جۇمىستارعا توقتالدى.

بىلتىر مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس العاش رەت 10 كۇن بويى كەڭ كولەمدە ابايدىڭ 180 جىلدىعى اتالىپ ءوتىپ، ءتۇرلى مادەني-رۋحاني، تانىمدىق جانە زياتكەرلىك ءىس-شارالار ۇيىمداستىرىلدى. سونىمەن قاتار وبلىس اكىمىنىڭ قولداۋىمەن «اباي جولى» كىتاپحاناسى جوباسى اياسىندا سەمەيلىك اقىن-جازۋشىلار مەن ونەر قايراتكەرلەرىنىڭ، ياعني، 19 اۆتوردىڭ 25 كىتابى جارىق كوردى. بيىل بۇل باعىتتاعى جۇمىستار جالعاسۋدا. «قازاقستان حالقىنا» قورىنىڭ قولداۋىمەن 30 اۋىلدىق كىتاپحانا جاڭعىرتىلىپ، تاۋەلسىزدىكتىڭ 35 جىلدىعىنا وراي الاش قايراتكەرلەرىنىڭ بالالارعا ارنالعان اۋدارمالارى العاش رەت «ميراس» سەرياسىمەن 35 كىتاپ بولىپ جارىق كورمەك.

ايماق باسشىسى جانات اسكەربەكقىزىنا شىعارماشىلىق تابىس تىلەپ، كەزدەسۋدە ايتىلعان ۇسىنىستار مەن پىكىرلەردىڭ نازارعا الىناتىنىن جەتكىزدى.