6 ماۋسىم- قۇربان ايت مەرەكەسىنىڭ ءبىرىنشى كۇنى
قازاقستان مۇسىلماندارى ءدىني باسقارماسى 2025 جىلدىڭ 6 ماۋسىمىن قۇربان ايتتىڭ ءبىرىنشى كۇنى دەپ جاريالادى، - دەپ حابارلايدى Ras.kz اقپاراتتىق پورتالى
بۇگىن ھيجري جىل ساناۋى بويىنشا زۋل-حيججا ايى باستالدى. ياعني اراپا كۇنى بيىل 5 ماۋسىمعا سايكەس كەلەدى. 6 ماۋسىم - قۇربان ايت مەرەكەسىنىڭ ءبىرىنشى كۇنى.
يسلام دىنىندە قاسيەتتى كۇندەر، تۇندەر جانە ايلار قاماري جىل ساناۋى نەگىزىندە انىقتالادى. مۇنداي جىل ساناق اي فازاسىنىڭ وزگەرۋىنە قاراي ەسەپتەلەدى. جاڭا ايدىڭ ء(ھيلالدىڭ) كورىنۋىمەن جاڭا اي باستالادى. قاماري اي كەيدە 29 نە 30 كۇن بولادى.
زۋلحيججا ايىن انىقتاۋ ءۇشىن زۋل-قاعدا ايىنىڭ 29-ندا ايدى باقىلايدى. كۇن باتقان كەزدە جاڭا اي كورىنسە، كەلەسى كۇنى زۋل-حيججا ايى باستالعان بولىپ سانالادى. ەگەر اۋا بۇلتتى بولىپ، اي كورىنبەسە، زۋل-قاعدا ايىن 30 كۇنگە تولىقتىرادى. وسىعان وراي، 2025 جىلى 27 مامىردا جاڭا ايدىڭ كورىنۋىنە بايلانىستى بيىل زۇلحيججا ايى 28 مامىردا باستالىپ، اراپا 5 ماۋسىمعا، ال قۇربان ايت 6 ماۋسىمعا ساي كەلەدى.
زۋلحيججا ايىنىڭ العاشقى ون كۇنىندە بارىنشا ىقىلاسپەن عيبادات ەتىپ، كوبىرەك ىزگى ىستەر مەن جاقسى امالدار جاساۋعا تىرىسۋ كەرەك. ويتكەنى، حاديستەردە سول ۋاقىتتا ورىندالعان يگى ىستەردىڭ ساۋابى ەسەلەنىپ جازىلاتىنى ايتىلعان.
ال اراپا كۇنى ورازا تۇتۋ – سۇننەت. ارداقتى پايعامبارىمىز مۇحاممەد (وعان اللانىڭ سالاۋاتى مەن سالەمى بولسىن): «اراپا كۇنى ورازا ۇستاۋ ارقىلى اللادان وتكەن جانە كەلەسى جىلدىڭ كۇناسىن كەشىرۋدى ءۇمىت ەتەمىن»، – دەگەن.
قۇربان ايت نامازىنان كەيىن ءۇش كۇن ىشىندە جاعدايى كەلگەن مۇسىلمانعا قۇرباندىق شالۋ – مىندەت. اللا تاعالا قاسيەتتى قۇراندا: "راببىڭنىڭ رازىلىعى ءۇشىن ناماز وقى جانە قۇرباندىق شال" («كاۋسار» سۇرەسى، 2-ايات) دەپ بۇيىرعان.
اللا تاعالا ەلىمىزگە اماندىق، جۇرتىمىزعا تىنىشتىق بەرگەي. ىزگى نيەتپەن شالاتىن قۇرباندىعىمىز، قاجىلىق ساپارىندا جۇرگەن وتانداستىرىمىزدىڭ قاجىلىعى قابىل بولعاي. ءامين!
