سوڭعى ەكى جارىم جىلدا 205 جاسىرىن كازينو جابىلىپ، ولاردىڭ جۇمىسىنا قاتىسى بار 224 ادام قىلمىستىق جاۋاپكەرشىلىككە تارتىلدى. ەل ىشىندە زاڭسىز گەمبلينگ فاكتىلەرى تولىق دەرلىك جويىلدى.

الايدا قازىرگى تاڭدا نەگىزگى قاۋىپ شەتەلدە تىركەلگەن ونلاين-كازينولاردان تۋىنداپ وتىر. ولار ەلىمىزدىڭ ازاماتتارىن قۇمار ويىنعا تارتىپ، ولاردى لۋدومانيا قۇربانىنا اينالدىرۋدا.

ەسكەرتەمىز، قازاقستان اۋماعىندا ولاردىڭ قىزمەتىنە «ويىن بيزنەسى تۋرالى» زاڭعا سايكەس تولىقتاي تىيىم سالىنعان.

وسىعان وراي، جىل باسىنان بەرى 34 شەتەلدىك ونلاين-پلاتفورمانىڭ نەگىزىنەن «ايناسى» بولىپ تابىلاتىن 17 مىڭنان استام سىلتەمە بۇعاتتالدى.

ەرەكشە الاڭداتاتىنى – قازاقستاندىق تولەم ۇيىمدارىنىڭ قولداۋى، ولار دەپوزيتتەردى تولىقتىرۋ مەن قاراجاتتى شەشۋدى (كەشاۋت) قامتاماسىز ەتىپ وتىر. مۇنداي قارجىلىق «دەلدالداردىڭ» بىرقاتارى انىقتالدى. اگەنتتىك جاقىن ۋاقىتتا ولاردىڭ قىزمەتىنە قۇقىقتىق باعا بەرەتىن بولادى.

ونلاين-كازينولاردىڭ قولجەتىمدىلىگى، ۆەريفيكاتسيانىڭ جوقتىعى جانە تومەن ستاۆكالارى ولاردى اسا قاۋىپتى ەتەدى.

وسكەلەڭ ۇرپاق قۇمار ويىنعا تاۋەلدىلىككە ۇرىنىپ، سالدارىنان ىشىمدىك پەن ەسىرتكىگە اۋەستىك سياقتى باسقا دا جاعىمسىز قۇمارلىقتارعا بەيىم بولادى.

ايتا كەتۋ كەرەك، ونلاين-كازينولاردىڭ قىزمەتى كوبىنەسە ەسىرتكى ساۋداسىنان مەن قارجىلىق الاياقتىقتان تۇسكەن قىلمىستىق تابىسقا نەگىزدەلەدى.

جاڭا «كليەنتتەردى» تارتۋ ءۇشىن ولاردىڭ يەلەرى ميلليونداعان وقىرمانى بار وتاندىق بلوگەرلەردى پايدالانادى. ولار وڭاي پايدا تابۋدى كوزدەپ، قاراپايىم ازاماتتاردى قارجىلىق تۇزاققا تۇسىرۋدە.

جىل باسىنان بەرى اگەنتتىك 34 بلوگەردىڭ ونلاين-ويىنداردى جارنامالاۋعا قاتىسى بارىن انىقتادى.

ولاردىڭ ىشىندە: قايسار قامزا، شىڭعىسحان كوپباەۆ، ايتماحانوۆ ءتاۋىرجان، تۇرعانوۆ نايل، ديليارا امانقوسقىزى جانە باسقالار بار.

ولاردىڭ 11-ءى اكىمشىلىك جاۋاپكەرشىلىككە تارتىلدى، ال 23 كونتەنت جاساۋشىعا قاتىستى ماتەريالدار مادەنيەت مينيسترلىگىنە شارا قابىلداۋ ءۇشىن جولداندى.

كوپشىلىگى زاڭدى ءبىر رەتتىك ەمەس، جۇيەلى تۇردە بۇزادى.

ماسەلەن، حيپ-حوپ ورىنداۋشى «Baller» (شىن اتى – شىڭعىسحان كوپباەۆ) جىل باسىنان بەرى اتالعان باپ بويىنشا بەس رەت جاۋاپقا تارتىلدى.

600 مىڭنان استام جازىلۋشىسى بار مۋزىكانت-بلوگەر رينات شامشىراققا قاتىستى دا ونلاين-كازينو جارنامالاعانى ءۇشىن اكىمشىلىك ءىس قوزعالعان.

سونىمەن قاتار بلوگەر «Niko_nett» پەن ينفليۋەنسەر قايسار قامزا دا ەرەكشە نازاردا. سوڭعىسى ءوزىنىڭ تەلەگرام-ارناسىندا زاڭسىز ويىنداردى ۇنەمى ناسيحاتتاپ، جالعان جەڭىمپازداردىڭ ۆيدەولارىن جاريالاپ كەلەدى.

سول سياقتى، نايل تۇرعانوۆ ونلاين-كازينو جارناماسى ءۇشىن 8 ملن تەڭگەدەن استام قارجى العان.

ال نۇرعازى توقتاروۆ («Nakonay Qarapaiym») الەۋمەتتىك جەلىلەرىندە ازاماتتاردى زاڭسىز ويىندارعا تارتۋ ماقساتىندا اگرەسسيۆتى ناۋقان جۇرگىزىپ، جارناما ءۇشىن 15,8 ملن تەڭگە الىپ، ونىڭ جارتىسىنا جۋىعىن سول پلاتفورمالاردىڭ وزىندە ويناپ ۇتىلىپ قالعان.

وكىنىشكە قاراي، بۇل ىستە قىزدار دا بەلسەندى. ماسەلەن، ماريام قۇلجاباەۆا («@oomariko») ينتەرنەت-كازينودا تىركەلۋگە شاقىرعان قاراپايىم ستوريستەرىن نەبارى 350 مىڭ تەڭگەگە باعالاعان. ال ونىڭ قۇربانى بولعان وتباسىلار ميلليونداعان قارجىسىنان ايىرىلىپ جاتىر.

وعان قوسا، زۋحرا حاكيەۆا، ديانا حالمەتوۆا، اسەم اۋباكيروۆا، ارينا بايكوۆا، كۇمىساي ايىمبەتوۆا جانە باسقا دا بلوگەرلەردىڭ اتى بەلگىلى.

وسىلايشا، ونلاين-كازينو جارناماسى ويىنعا تاۋەلدىلىككە باستايتىن نەگىزگى ارنا ەكەنىن بىلە تۇرا، اتالعان تۇلعالار ءوز ىستەرىن جالعاستىرۋدا. ولار ادامداردىڭ تاعدىرىنا نەمقۇرايلى قاراپ، وتباسىلاردىڭ كۇيرەۋىنە سەبەپ بولۋدا.

ميلليونداعان تابىسقا كەنەلگەن بلوگەرلەر ايىپپۇلدارىن تولەپ، زاڭسىز ارەكەتىن قايتا جالعاستىرىپ ءجۇر.

وسىعان بايلانىستى اگەنتتىك مۇنداي ارەكەتتەردى قر قك-ءنىڭ 28-بابىنىڭ 5-تارماعى اياسىندا – زاڭسىز ويىن بيزنەسىنە كومەكتەسۋ رەتىندە قاراستىرۋعا نيەتتى.

سونىمەن قاتار، قارجى پيراميدالارىن جارنامالاعانداعىداي، ونلاين-كازينو جارناماسى ءۇشىن دە قىلمىستىق جاۋاپكەرشىلىك ەنگىزۋ باستاماسى كوتەرىلدى.

بلوگەرلەرگە ۇندەۋ: جارناما تۇرىندەگى كونتەنت تاراتۋمەن اينالىساتىن ءاربىر تۇلعا زاڭدى قاتاڭ ساقتاۋى ءتيىس.

اگەنتتىك زاڭسىز ويىنداردى ناسيحاتتاۋدان باس تارتىپ، ادامدار الدىنداعى جاۋاپكەرشىلىكتى سەزىنۋگە شاقىرادى.

كۇدىكتى ۇسىنىستار تۇسكەن جاعدايدا ولاردى دەرەۋ «افم Insider» تەلەگرام-بوتىنا حابارلاۋدى سۇرايمىز. انونيمدىك كەپىلدەندىرىلگەن.

قر قما ءباسپاسوز قىزمەتى