ەلوردا كۇنى قارساڭىندا استانا وڭىردەگى ەڭ قارقىندى دامىپ كەلە جاتقان تۋريستىك ورتالىقتاردىڭ ءبىرى ەكەنىن تاعى ءبىر مارتە دالەلدەپ وتىر. بىلتىر باس قالاعا 1,6 ميلليون تۋريست كەلىپ، سالاعا رەكوردتىق ينۆەستيتسيا تارتىلدى. سونداي-اق حالىقارالىق دەڭگەيدەگى اۋقىمدى ءىس-شارالار ۇيىمداستىرىلدى.
2025 جىلدىڭ قورىتىندىسى بويىنشا استاناعا 1,6 ميلليون تۋريست كەلدى. ونىڭ ىشىندە 380 مىڭنان استامى – شەتەلدىك قوناقتار. 2026 جىلى دا وڭ ءۇردىس جالعاسىپ كەلەدى. جىلدىڭ العاشقى توقسانىندا ەلورداعا 352,2 مىڭ تۋريست كەلگەن. بۇل وتكەن جىلدىڭ سايكەس كەزەڭىمەن سالىستىرعاندا 12 پايىزعا كوپ. ولاردىڭ 67,9 مىڭى – شەتەلدىك ساياحاتشىلار. استاناعا ەڭ كوپ كەلەتىن تۋريستەر رەسەي، قىتاي، تۇركيا، گەرمانيا جانە اقش ەلدەرىنەن. سونىمەن قاتار وزبەكستان، بىرىككەن اراب امىرلىكتەرى جانە باسقا دا مەملەكەتتەردەن كەلۋشىلەر قاتارى ارتىپ كەلەدى.
تۋريزم سالاسىنا تارتىلعان ينۆەستيتسيا كولەمى دە تۇراقتى ءوسىپ وتىر. 2025 جىلدىڭ قورىتىندىسىندا تۋريستىك سالانىڭ نەگىزگى كاپيتالىنا سالىنعان ينۆەستيتسيا كولەمى 438,3 ميلليارد تەڭگەگە جەتىپ، قازاقستان وڭىرلەرى اراسىنداعى ەڭ جوعارى كورسەتكىش بولدى. بيىلعى قاڭتار-مامىر ايلارىندا بۇل كورسەتكىش 250 ميلليارد تەڭگەنى قۇرادى. بۇل وتكەن جىلدىڭ سايكەس كەزەڭىمەن سالىستىرعاندا ەكى ەسە كوپ.
قازىرگى تاڭدا ەلوردادا جالپى قۇنى 265,7 ميلليارد تەڭگەگە جەتەتىن 33 ينۆەستيتسيالىق جوبا جۇزەگە اسىرىلۋدا. ولاردىڭ قاتارىندا حالىقارالىق قوناقۇي جەلىلەرىن سالۋ، ەكوتۋريزمدى دامىتۋ جانە زاماناۋي تۋريستىك ينفراقۇرىلىمدى قالىپتاستىرۋ جوبالارى بار.
سالانىڭ وسىمىنە سەرپىن بەرىپ وتىرعان نەگىزگى باعىتتاردىڭ ءبىرى – وقيعالى تۋريزم. 2026 جىلدىڭ العاشقى ءۇش ايىندا استانادا 300-دەن استام ءىس-شارا ۇيىمداستىرىلدى. ونىڭ 11-ءى حالىقارالىق دەڭگەيدە ءوتتى. الداعى ۋاقىتتا BaiQymyz ەتنو-گاسترونوميالىق فەستيۆالى، Comic Con Astana فەستيۆالى، «بولاشاق ويىندارى» حالىقارالىق ءتۋرنيرى جانە ەنريكە يگلەسياستىڭ كونتسەرتى وتەدى. بۇل ءىس-شارالار قازاقستاننان جانە شەتەلدەن مىڭداعان قوناق جينايدى.
استانا حالىقارالىق تۋريستىك كەڭىستىكتەگى ورنىن دا نىعايتىپ كەلەدى. 2026 جىلى قالا گەرمانيا، قىتاي جانە وڭتۇستىك كورەيادا وتكەن ءىرى تۋريستىك كورمەلەرگە قاتىسىپ، رەسەيدە روۋد-شوۋ وتكىزدى. سونداي-اق بىردەن ءۇش حالىقارالىق تۋريستىك ۇيىمنىڭ قۇرامىنا ەندى.
قالادا تۋريستىك ينفراقۇرىلىم جۇيەلى تۇردە جاڭارتىلىپ، جاڭا مۋزەيلەر اشىلۋدا. تسيفرلىق سەرۆيستەر جەتىلدىرىلىپ، قالالىق ناۆيگاتسيا مەن تۋريستەرگە ارنالعان قولايلى جاعدايلار جاقسارىپ كەلەدى.
تۋريزم جانە سپورت مينيسترلىگى
