الماتى اۋدانىنىڭ اكىمدىگى ونەر مەكتەبىنىڭ نەگىزىن قالاۋشى يبراگيم ەسكەندىرمەن بىرلەسىپ، 100 جاس دومبىراشىنىڭ قاتىسۋىمەن اۋقىمدى فلەشموب ۇيىمداستىردى.

"وتان قورعاۋشىلار" مونۋمەنتى الدىندا ۇلتتىق كيىم كيگەن مەكتەپ وقۋشىلارى پاتريوتتىق اندەر -  "كوك تۋدىڭ جەلبىرەگەنى" مەن "وتان قىمبات" شىعارمالارىن ورىندادى. ۆوكالدىق قويىلىمنان كەيىن فلەشموب قاتىسۋشىلارى دومبىرامەن ءوز شەبەرلىكتەرىن كورسەتىپ، كەڭىنەن تانىمال كۇيلەر - "ەركە سىلقىم" جانە "بالبىراۋىن" تۋىندىلارىن ورىندادى.

ۇيىمداستىرۋشىلاردىڭ ايتۋىنشا، بۇل اكتسيا جاستار اراسىندا ۇلتتىق رۋحتى كۇشەيتۋگە، تاۋەلسىزدىك رامىزدەرىنە قۇرمەتپەن قاراۋعا جانە قازاق حالقىنىڭ باي مادەني مۇراسىنا باۋلۋعا باعىتتالعان.

بيىل 4 ماۋسىم – قازاقستان رەسپۋبليكاسىنىڭ مەملەكەتتىك رامىزدەر كۇنىنە وراي ەلوردادا اۋقىمدى پاتريوتتىق شارالار ۇيىمداستىرىلۋدا. "مەنىڭ رامىزدەرىم - مەنىڭ ماقتانىشىم!" اكتسياسى اياسىندا قالا اۋماعىنداعى مەملەكەتتىك ورگانداردا، اۋماقتىق دەپارتامەنتتەردە، سوت مەكەمەلەرىندە، ءبىلىم بەرۋ ۇيىمدارىندا جانە وزگە دە مەكەمەلەردە شامامەن 500-گە جۋىق پاتريوتتىق ءىس-شارا ءوتىپ جاتىر.