Бұл туралы Ras.kz Kazinform-ға сілтеме жасап хабарлайды.

Нұрасыл Болатттың Алматыда түнде тойда жүрген видеосы әлеуметтік желіде тарады.

Заң бойынша ол бостандығын шектеу режиміне байланысты бұл уақытта үйінде болуы тиіс.

Қылмыстық атқару жүйесі комитетінің мәліметінше, Нұрасыл Болат Алматы қаласының пробация қызметінде есепте тұр.

«Пробациялық бақылауды бұзу фактісі бойынша сотталған адамға ескерту жасалды, жазаны бас бостандығынан айыруға ауыстыру туралы мәселені шешу үшін сотқа материал дайындалып жатыр», - деп хабарлады қылмыстық-атқару жүйесі комитетінен.

Осыған дейін әлеуметтік желіде Мәжіліс депутаты Дәулет Тұрлыхановтың бостандығы шектелген ұлы Нұрасыл Болаттың түнгі уақытта емін-еркін жүрген видеосы тараған еді.

Еске сала кетейік, 2023 жылы ақпанда Нұрасыл Болат Алматыда заңгер Анна Дмитриевич пен оның жұбайы Олег Черновты соққыға жыққан еді.

Кейін спорт қайраткері Дәулет Тұрлыханов баласының бұзақылық әрекетіне байланысты пікір білдіріп, ұлының ісіне араласпайтынын айтты.

Ал былтыр 2 шілде күні ол мерзімді әскери борышын өтеп жатқан жері – Қонаев гарнизоны әскери бөлімдерінің бірінен қашып кеткен болатын.

Кейін көп өтпей табылып, қызмет атқаратын орнына жеткізілді.

Алматы гарнизоны бөлім бастығының бұйрығына бағынбағаны және орындамағаны үшін әкімшілік жауапкершілікке тартылды.

2023 жылы 9 қазанда Дәулет Тұрлыхановтың ұлына сот үкімі шықты.

Прокурор сотталушы Б-ға 1 жыл 6 ай бас бостандығын шектеу түрінде жаза тағайындауды сұрады.

Биыл мамырда Жоғарғы сот Дәулет Тұрлыхановтың ұлына кесілген үкімді өзгертті. Содан соң Дәулет Тұрлыханов ұлының сот үкіміне қатысты пікір білдірді. 

«Сот шешімі бар, бірақ әке ретінде әрқашан ұлым үшін алаңдаймын», - деп жауап берді Дәулет Тұрлыханов Мәжіліс алаңында БАҚ өкілдерінің сауалына жауап беріп.