تۇرمىستىق زورلىق تۋرالى ءسوز بولسا، ءبىز بىردەن زاڭدى، پوليتسيانى، جازانى ەسكە الامىز. سوڭعى جىلدارى زاڭ شىنىمەن قاتاڭدادى: ۇرىپ-سوعۋ ءۇشىن قىلمىستىق جاۋاپكەرشىلىك قايتارىلدى، قۇقىق بۇزۋشىلىقتىڭ الدىن الۋ تۋرالى جاڭا زاڭ كۇشىنە ەندى. بىراق ەشبىر زاڭ ساناداعى «وتباسىنىڭ ىسىنە ارالاسپا» دەگەن ۇستانىمدى وزدىگىنەن وزگەرتە المايدى.
زورلىق ءبىر كۇندە باستالمايدى. الدىمەن ايقاي، كەمسىتۋ، «تەلەفونىڭدى كورسەت»، «اقشانى مەن باسقارامىن»، «دوستارىڭمەن كەزدەسپە» دەگەن تىيىمدار پايدا بولادى. كوپشىلىك مۇنى زورلىق دەپ سانامايدى. كورشى ەستيدى، بىراق ارالاسپايدى. تۋىستار بىلەدى، بىراق «شىدا، وتباسىڭدى بۇزبا» دەيدى. وسىلايشا زورلىق بىرتە-بىرتە قالىپتى كورىنىسكە اينالادى.
Tatulyq.kz جوباسى اياسىنداعى ساۋالناما دا وسىنى كورسەتتى: ادامداردىڭ باسىم بولىگى قاۋىپ تونگەندە پوليتسياعا حابارلاسۋ كەرەگىن بىلەدى، بىراق پسيحولوگيالىق قىسىم پەن اقشالاي باقىلاۋدى زورلىق دەپ تاني بەرمەيدى.
سوندىقتان باستى سۇراق – «زاڭ جەتكىلىكتى مە؟» ەمەس، «ءبىز زورلىققا قالاي قارايمىز؟». قول كوتەرگەن ادامدى «قىزبا عوي» دەپ اقتاۋ، جابىرلەنۋشىدەن «ءوزى نە ىستەدى ەكەن؟» دەپ كىنا ىزدەۋ، ستالكينگتى «رومانتيكا» دەپ اتاۋ – وسىنىڭ ءبارى زورلىققا ءۇنسىز رۇقسات بەرەدى.
زورلىققا جول جوق – بۇل ۇران عانا ەمەس، كۇندەلىكتى تاڭداۋ. ول اتا-انانىڭ بالامەن قالاي سويلەسەتىنىنەن، جىگىتتىڭ قىزدان «جوق» دەگەن ءسوزدى قالاي قابىلدايتىنىنان، كورشىنىڭ ايقاي ەستىگەندە ءۇنسىز قالماۋىنان كورىنەدى. ارقايسىمىز وزىمىزدەن سۇرايىق: مەن زورلىققا قارسىمىن با، الدە ونى اقتايتىن بىرەۋمىن بە؟
بۇل تۇجىرىمدى جۋىردا وتكەن Tatulyq.kz جوباسىنىڭ بريفينگىندە تانىستىرىلعان دەرەكتەر دە راستايدى. پسيحولوگتار ءتورت ساۋالناما بويىنشا 6 935 جاۋاپتى تالدادى: قاتىسۋشىلاردىڭ شامامەن ءار ەكىنشىسى ەموتسيونالدىق شيەلەنىستى باستان كەشىرىپ ءجۇر، ءار تورتىنشىسىنە جەكە شەكاراسىن قورعاۋ قيىن. اناليتيكالىق تۇرعىدان بۇل ماڭىزدى بەلگى: شارشاعان، كۇيزەلىستەگى ادام قىسىمدى بايقاماي، وعان كونىپ كەتۋگە بەيىم. دەمەك، زورلىققا قارسى تۇرۋ تەك قۇقىقتىق ەمەس، پسيحولوگيالىق ساۋاتتىلىقتى دا تالاپ ەتەدى.
وسى ساۋاتتىلىقتى ارتتىرۋ باعىتىنداعى جۇمىس بۇگىن دە جالعاسىپ جاتىر. Tatulyq.kz پلاتفورماسىندا پسيحولوگتار، زاڭگەرلەر مەن پوليتسيا ساراپشىلارىنىڭ قىسقا تۇسىندىرمە بەينەروليكتەرى، ۆەبينارلار، پودكاستار مەن وڭىرلىك داعدارىس ورتالىقتارى تۋرالى اقپارات جاريالانىپ كەلەدى. ستالكينگ، قىز الىپ قاشۋ، جاسىرىن قىسىم، بالاداعى بۋللينگ سياقتى تاقىرىپتارعا قاراپايىم تىلدە جاۋاپ بەرىلەدى. اقپاراتتىڭ باستى اعىنى الەۋمەتتىك جەلىلەرگە اۋىسقان بۇگىنگى جاعدايدا مۇنداي سەنىمدى دەرەككوزدىڭ ماڭىزى ەرەكشە.
زورلىقتى تانۋدى ۇيرەنۋ – ونى توقتاتۋدىڭ العاشقى قادامى. Tatulyq.kz پاراقشالارىنا جازىلىڭىز، پايدالى بەينەلەردى جاقىندارىڭىزبەن ءبولىسىڭىز. سەبەبى «زورلىققا جول جوق» دەپ ارقايسىمىز ايتقاندا عانا ول شىنىمەن ازايادى.
كومەك قاجەت بولسا: 102 نەمەسە 112 – تىكەلەي قاۋىپ تونسە; 111 – وتباسى، ايەلدەر مەن بالالار قۇقىقتارى بويىنشا; 150 – بالالار مەن جاستارعا ارنالعان سەنىم تەلەفونى.