قر پرەمەر-ءمينيسترىنىڭ ءبىرىنشى ورىنباسارى نۇرلىبەك نالىباەۆ پرەزيدەنت ساياباعى اۋماعىندا سالىنىپ جاتقان ەلىمىزدەگى ءۇشىنشى پرەزيدەنتتىك كىتاپحانا مەن دراما تەاتر قۇرىلىسىن كورىپ شىقتى.
ەسكە سالساق، مەملەكەت باسشىسى ۇلتتىق قۇرىلتايدىڭ بەسىنشى وتىرىسىندا قىزىلوردا قالاسىندا تاۋلىك بويى جۇمىس ىستەيتىن كىتاپحانا مەن جاڭا دراما تەاتر سالۋدى تاپسىرعان بولاتىن.
وسى تاپسىرماعا سايكەس ءساۋىر ايىندا ەكى نىساننىڭ ىرگەتاسى قالاندى.
كىتاپحانا قۇرىلىسىنا ينۆەستور قاراجاتى ەسەبىنەن 20 ملرد تەڭگە بولىنگەن. جالپى اۋماعى 13 مىڭ شارشى مەتر عيماراتتا ەلەكتروندى وقۋ، كونفەرەنتسيا زالدارى، ارحيۆ، باسپاحانا، باعدارلامالاۋ جانە جاساندى ينتەللەكتىنى دامىتۋ مەديازەرتحاناسى، پودكاست ستۋدياسى، وقىرماندارعا قىزمەت كورسەتۋ بولىمدەرى بولادى. مۇندا ءبىر ميلليوننان استام كىتاپ قورىن ساقتاۋعا مۇمكىندىك بار. جاڭا نىسان وڭىردەگى كىتاپحانا ينفراقۇرىلىمىن دامىتىپ، اقپاراتتىق-مادەني ورتانى نىعايتادى.
ال جاڭا دراما تەاتردىڭ جالپى اۋماعى 4 مىڭ شارشى مەتردەن اسادى، 520 كورەرمەنگە ارنالعان. وندا رەپەتيتسيالىق زالدار، ستۋديا جانە شىعارماشىلىق كەڭىستىكتەر، اكىمشىلىك كابينەتتەر ورنالاسادى. سونداي-اق، زاماناۋي ساحنالىق تەحنيكا، قۋاتتى دىبىس جۇيەسى جانە سوڭعى ۇلگىدەگى جابدىقتار ءتۇرلى جانرداعى قويىلىمداردى جوعارى دەڭگەيدە ساحنالاۋعا مۇمكىندىك بەرەدى.
ەكى نىساننىڭ قۇرىلىس بارىسىمەن تانىسقان پرەمەر-ءمينيستردىڭ ءبىرىنشى ورىنباسارى جاۋاپتى سالا باسشىلارىنا عيماراتتاردىڭ ساپالى ءارى زاماناۋي ۇلگىگە ساي بولۋىن ءجىتى قاداعالاۋدى تاپسىردى.
سىرداريا وزەنى جاعالاۋىنداعى قورعانىس بوگەتىنىڭ قۇرىلىسى دا قارقىن العان. ۇزىندىعى 3 شاقىرىم اۋماقتىڭ ەكى شاقىرىمىنا گەوبەكىتكىش تور توسەلىپ، تاسپەن تولتىرىلادى. قالعان بولىگىندە ەڭىستى قالىپتاستىرۋ جۇمىستارى جۇرگىزىلۋدە. سونىمەن قاتار، جاعالاۋدى شايىلۋدان قورعايتىن ارنايى تىرەك قۇرىلىمدارى ورناتىلۋدا. تۇرعىندارعا قاۋىپسىز ءارى قولايلى بولۋ ءۇشىن جاياۋ جۇرگىنشىلەر جولى مەن ۆەلوجولاق سالىنادى. بۇگىندە جۇمىستىڭ 50 پايىزى اياقتالعان.
بۇدان كەيىن نۇرلىبەك ماشبەكۇلىنا الداعى ۋاقىتتا وڭىردە جۇزەگە اساتىن جاڭا ينۆەستيتسيالىق جوبالار تانىستىرىلدى. ولار - سول جاعالاۋدا سالىناتىن تۇرعىن ءۇي كەشەنى، جەلدەتۋ جانە اۋا باپتاۋ قوندىرعىلارىن قۇراستىرۋ، سانيتارلىق-تەحنيكالىق بۇيىمدار قۇراستىرۋ جانە ءوندىرۋ جوبالارى، تومات پاستاسى مەن كوكونىس پيۋرەسى ءوندىرىسى، سۇيىتىلعان تابيعي گاز ءوندىرۋ، ەكى قورعاسىن-مىرىش تاۋ-كەن بايىتۋ زاۋىتى، كوپفۋنكتسيونالدى ساۋدا-ويىن-ساۋىق كەشەنى.
قىزىلوردا وبلىسى اكىمىنىڭ ءباسپاسوز قىزمەتى