بۇل باستاما پرەزيدەنت قاسىم-جومارت كەمەلۇلى توقاەۆتىڭ ءبىلىم ساپاسىن ارتتىرۋ ءۇشىن الەمدەگى وزىق جوعارى وقۋ ورىندارىنىڭ فيليالدارىن ەلىمىزدە اشۋ تاپسىرماسىنا وراي قولعا الىنعان. تۇركىستان وبلىسىنىڭ اكىمى نۇرالحان كوشەروۆ قۇرىلىس بارىسىن قاداعالاپ، نىساننىڭ قازىرگى جاي-كۇيىمەن تانىستى. جاۋاپتى باسشىلار مەن مەردىگەر كومپانيا باسشىسىمەن پىكىر الماسىپ، اتقارىلىپ جاتقان جۇمىستار تۋرالى ەسەپتەرىن تىڭدادى.
عيمارات بيىل اياقتالىپ، وقۋ جىلىنا تولىق دايىن بولۋى ءتيىس. ۇيىمداستىرۋ، ۇيلەستىرۋ جۇمىستارىمەن دە ءبىراز ۋاقىت كەتەدى. سوندىقتان قۇرىلىس قارقىنىن تومەندەتپەي، ساپالى ءارى جۇيەلى اتقارىڭىزدار، – دەگەن نۇرالحان كوشەروۆ 18 قاباتتى عيماراتتى ارالاپ كوردى. ساپالى قۇرىلىس ماتەريالدارىن قولدانۋدى تاپسىردى.
بۇگىندە عيماراتتىڭ قۇرىلىسى قارقىندى. سىرتىن قاپتاۋ، تەرەزەلەرىن ورناتۋ جۇمىستارى جۇرۋدە. نىسان تامىز ايىندا تاپسىرىلادى دەپ جوسپارلانعان. بىراق مامىر ايىنا دەيىن اياقتاپ، تاپسىرۋ كوزدەلىپ وتىر. جۇمىسشىلار سانى دا جەتكىلىكتى، قۇرىلىس قارقىندى.
ايتا كەتەيىك، بىلتىر جاۋاپتى مينيسترلىك جانە تۇركىستان وبلىسى اكىمدىگى تاراپىنان كورەيانىڭ 70 جىلدىق تاريحى بار Woosong ۋنيۆەرسيتەتى باسشىلىعىمەن كەلىسسوزدەر جرگىزىلگەن بولاتىن. ناتيجەسىندە تۇركىستاندا اتالعان وقۋ ورداسىنىڭ فيليالىن اشۋ تۋرالى كەلىسىمگە قول قويىلدى. بۇل جوعارى وقۋ ورنىندا ءىت جانە وزگە دە تەحنيكالىق مامانداردى دايارلاۋ جوسپارلانىپ وتىر. وندىرىسكە، اۋىل شارۋاشىلىعىن جاڭاشا باعىتتا دامىتۋعا قاجەتتى مامانداردى دايارلاۋ دا جوسپارعا ەنگىزىلگەن.