قادىرلى جاماعات!
بارشاڭىزدى شاراپاتى مول شاعبان ايىنىڭ كەلۋىمەن شىن جۇرەكتەن قۇتتىقتايمىن!
قاسيەتتى رامازان ايىنىڭ كەلگەنىن سۇيىنشىلەيتىن شاعباندا ءار شاڭىراققا شاتتىق، باقىت پەن بەرەكە تىلەيمىن. اللا تاعالا وسى ايدا جاسايتىن دۇعا-تىلەكتەرىمىزدى، قۇلشىلىق-عيباداتتارىمىزدى قابىل ەتكەي!
ارداقتى پايعامبارىمىز (وعان اللانىڭ سالاۋاتى مەن سالەمى بولسىن) ءوز ۇمبەتىنە شاعبان ايى كىرگەندە تازالانىپ، نيەتىمىزدى دۇرىستاۋدى وسيەت ەتكەن.
اللا ەلشىسىنىڭ تاعى ءبىر حاديس-شاريفىندە ايتىلعانداي، شاعبان ايىندا جاسالعان دۇعا كەرى قايتارىلمايدى. ەندەشە، شاراپاتى مول شاعبان ايىندا شىنايى نيەتپەن ەلىمىز بەن جەرىمىزدىڭ يگىلىگى ءۇشىن كوپ دۇعا جاسايىق.
ىزگى عۇلامالاردىڭ ءبىرى: «ەرەجەپ – جەلگە، شاعبان – بۇلتقا، رامازان جاڭبىرعا ۇقسايدى. ەرەجەپ ايىندا ءدان ەگىلمەسە، شاعباندا سۋارىلماسا، رامازاندا قانداي ەگىن كۇتۋگە بولادى؟» دەگەن.
وسى ايدا نيەتىمىزدى تۇزەپ، مۇمكىندىگىنشە ءناپىل ورازا ۇستاپ، دۇعا جاساپ، كوپ جاقسىلىق جاساۋعا تىرىسايىق. قۇران وقىپ، قينالعان جاندارعا، ناۋقاستارعا، قيىندىققا تاپ بولعان مۇسىلماندارعا اللادان جەڭىلدىك، شيپا تىلەيىك.
اللا تاعالا ەلىمىزگە اماندىق، جەرىمىزگە تىنىشتىق، حالقىمىزعا بەرەكە ءناسىپ ەتكەي! ەل ىرگەسىن بەرىك ەتىپ، شاعباننىڭ شاراپاتىنا بولەنۋدى، قاسيەتتى رامازان ايىنا امان-ەسەن جەتۋدى جازعاي! امين!قازاقستان مۇسىلماندارى
ناۋرىزباي قاجى تاعانۇلى
قازاقستان مۇسىلماندارى ءدىني باسقارماسىنىڭ توراعاسى، باس ءمۇفتي
