جامبىل وبلىسىندا مال شارۋاشىلىعىن قىسقى كەزەڭگە دايىنداۋ جۇمىستارى جالعاسۋدا. بۇل ماسەلە وبلىس اكىمى ەربول قاراشوكەەۆتىڭ توراعالىعىمەن وتكەن اپپاراتتىق كەڭەستە قارالدى. جيىندا مال ازىعىنىڭ قورى، قىستاۋلاردىڭ دايىندىعى جانە ۆەتەريناريالىق قاۋىپسىزدىك ماسەلەلەرى تالقىلاندى.
وبلىستىق اۋىل شارۋاشىلىعى باسقارماسىنىڭ باسشىسى ءابدىراسىل جەلەۋباەۆتىڭ مالىمەتىنشە، بيىلعى 9 ايدىڭ قورىتىندىسى بويىنشا وڭىردەگى مال باسى 3,8 ميلليوننان 4,1 ميلليونعا دەيىن وسكەن. وسىلايشا، وتكەن كەزەڭمەن سالىستىرعاندا 300 مىڭ باسقا ارتقان.
الداعى قىسقى ماۋسىمدا وبلىس بويىنشا 484,9 مىڭ باس ءىرى قارا، 3,5 ميلليون باس قوي مەن ەشكى، 204,2 مىڭ باس جىلقى جانە 8,6 مىڭ باس تۇيە قىستاتىلادى.
ءتورت تۇلىكتى قاجەتتى ازىقپەن قامتاماسىز ەتۋ ءۇشىن بيىل 3,3 ميلليون توننا مال ازىعىن دايىنداۋ جوسپارلانعان. ونىڭ ىشىندە 2 ملن 211 مىڭ توننا پىشەن، 141,2 مىڭ توننا پىشەندەمە، 484 مىڭ توننا سابان، 117 مىڭ توننا سۇرلەم جانە 364 مىڭ توننا قۇنارلى جەم بار.
بۇگىنگى تاڭدا جوسپارلانعان كولەمنەن 3,365 ميلليون توننا نەمەسە 101,4 پايىزى دايىندالدى. اتاپ ايتقاندا، 2 ملن 284,6 مىڭ توننا پىشەن (103,3%), 134,7 مىڭ توننا پىشەندەمە (95,4%), 491,9 مىڭ توننا سابان (101,6%), 117,1 مىڭ توننا سۇرلەم (100,1%) جانە 337,9 مىڭ توننا قۇنارلى جەم (92,8%) جينالعان.
سونىمەن قاتار بىرقاتار اۋداندا جەكەلەگەن ازىق تۇرلەرىن دايىنداۋ جۇمىستارى تولىق ورىندالماعان. اتاپ ايتقاندا، پىشەندەمە دايىنداۋ بويىنشا مويىنقۇم جانە ت.رىسقۇلوۆ اۋداندارىندا، ال قۇنارلى جەم ازىرلەۋدە جامبىل، مويىنقۇم جانە تالاس اۋداندارىندا جوسپارلى كورسەتكىشكە قول جەتكىزىلمەگەن.
جەكە قوسالقى شارۋاشىلىقتاردى قولداۋ ماقساتىندا دا ءتيىستى جۇمىستار جۇرگىزىلۋدە. وبلىس بويىنشا بۇل ساناتتاعى شارۋاشىلىقتارعا 1 485,8 توننا مال ازىعىن دايىنداۋ جوسپارلانىپ، ناقتى 1 519,7 توننا جينالدى.
بۇدان بولەك، اۋىل شارۋاشىلىعى قۇرىلىمدارىمەن ءوزارا ىنتىماقتاستىق ورناتۋ ارقىلى جەكە قوسالقى شارۋاشىلىقتاردى قولجەتىمدى ازىقپەن قامتۋ كوزدەلگەن. وسى باعىتتا وڭىردە 98 مەموراندۋمعا قول قويىلدى.
قازىرگى ۋاقىتتا وبلىستا ءبىر تۇك پىشەننىڭ باعاسى 600-700 تەڭگە، جوڭىشقانىڭ باعاسى 1 000-1 200 تەڭگە، ال قۇنارلى جەمنىڭ ءبىر كەلىسى 110-120 تەڭگە ارالىعىندا قالىپتاسقان.
وڭىردە بارلىعى 5 862 مال قىستاتۋ ورنى بار. ونىڭ 1 020-سى شالعايداعى جايىلىمدىق اۋماقتاردا ورنالاسقان.
كەڭەستە وبلىس اكىمى مال ازىعى باعاسىنا تۇراقتى مونيتورينگ جۇرگىزۋدى جانە باعانىڭ نەگىزسىز وسۋىنە جول بەرمەۋ ءۇشىن رەزەرۆتىك ازىق قورىن قالىپتاستىرۋ ماسەلەسىن پىسىقتاۋدى جۇكتەدى.
– قىسقى ناۋقان كەزىندە شارۋالار ەشقانداي قيىندىققا تاپ بولماۋى ءتيىس. شالعايداعى 1 020 قىستاۋدىڭ ارقايسىسى بويىنشا جولدىڭ، بايلانىستىڭ، سۋ كوزىنىڭ، وتىن مەن ازىق قورىنىڭ جەتكىلىكتىلىگىن قازىردەن باستاپ تەكسەرۋ قاجەت. ۆاكتسيناتسيالاۋ جۇمىستارىن قىستاتۋ ماۋسىمىنا دەيىن تولىق اياقتاۋ كەرەك. شالعايداعى قىستاۋلارعا قىزمەت كورسەتەتىن جىلجىمالى ۆەتەريناريالىق توپتار جاساقتالىپ، بيوتەرميالىق شۇڭقىرلار تالاپقا ساي كەلتىرىلسىن.
قىس مەزگىلىندە شالعايداعى قىستاۋلاردا مال ۇرلىعىنىڭ الدىن الۋ شارالارىن كۇشەيتۋ ماڭىزدى. پروفيلاكتيكالىق رەيدتەر ۇيىمداستىرىپ، ۆەتەريناريا قىزمەتتەرىمەن بىرلەسىپ مال تاسىمالىنا باقىلاۋدى كۇشەيتۋ قاجەت، – دەدى ەربول قاراشوكەەۆ.
جيىن قورىتىندىسى بويىنشا وبلىس اكىمى قىسقى ماۋسىمعا دايىندىقتى تولىق اياقتاۋ جونىندە جاۋاپتى تۇلعالارعا بىرقاتار تاپسىرما بەردى.
اتاپ ايتقاندا، مال ازىعىن دايىنداۋ جوسپارى ورىندالماعان باعىتتار بويىنشا جۇمىستى جانداندىرۋ، جەكە قوسالقى شارۋاشىلىقتاردىڭ ناقتى قاجەتتىلىگىن قايتا ەسەپتەپ، مەموراندۋمدار سانىن ارتتىرۋ مىندەتتەلدى. سونداي-اق قىستاۋلارعا اپاراتىن جولداردى قاردان تازارتۋعا قاجەتتى تەحنيكانى انىقتاپ، مەردىگەرلەردى الدىن الا بەكىتۋ تاپسىرىلدى.
ءباسپاسوز قىزمەتى