30 ماۋسىم كۇنى باس پروكۋراتۋرادا ماڭىزدى كەزدەسۋ ءوتتى. قازاقستان رەسپۋبليكاسىنىڭ باس پروكۋرورى بەرىك اسىلوۆ جاساندى ينتەللەكت سالاسىنداعى الەمگە تانىمال ساراپشى، 01.AI كومپانياسىنىڭ باس اتقارۋشى ديرەكتورى، قازاقستان رەسپۋبليكاسى پرەزيدەنتىنىڭ كەڭەسشىسى، دوكتور كاي-فۋ ءليدى قابىلدادى.
كەزدەسۋ قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ جاريالاعان تسيفرلاندىرۋ جانە جاساندى ينتەللەكت جىلى اياسىندا ءوتتى.
2026 جىلى قازاقستاندا العاش رەت تسيفرلىق كودەكس پەن «جاساندى ينتەللەكت تۋرالى» زاڭ قابىلداندى. بولاشاقتىڭ تسيفرلىق قالاسى – الاتاۋ سالىنۋدا. مەملەكەت باسشىسى ەلدى ءاربىر شەشىم اشىق، ءاربىر ارەكەت ەسەپ بەرۋگە مىندەتتى، ال ءاربىر ازامات زاڭ مەن تەحنولوگيالاردىڭ كۇشىمەن قورعالاتىن مەملەكەتتىك باسقارۋ مودەلىنە كەزەڭ-كەزەڭىمەن باستاپ كەلەدى.
مەملەكەتتىك ورگاندار ەل باسشىلىعىنىڭ باعىتىن جۇيەلى تۇردە جۇزەگە اسىرۋدا. بۇل باعىتتان پروكۋراتۋرا ورگاندارى دا تىس قالعان جوق.
كەزدەسۋ بارىسىندا بەرىك اسىلوۆ قاداعالاۋ ورگانىندا جيناقتالعان اۋقىمدى دەرەكتەر قورى تسيفرلىق ەسەپكە الۋدان جاساندى ينتەللەكت پەن Alem.Cloud سۋپەركومپيۋتەرىنىڭ مۇمكىندىكتەرىن پايدالانا وتىرىپ، زياتكەرلىك تالداۋ مەن تاۋەكەلدەردى بولجاۋ دەڭگەيىنە كوشۋگە مۇمكىندىك بەرگەنىن اتاپ ءوتتى.
قوناققا پروكۋراتۋرا ورگاندارىنداعى تسيفرلىق ترانسفورماتسيانىڭ اۋقىمى جانە تسيفرلىق ەسەپكە الۋدان بولجام جاساۋعا، اناليتيكا مەن تاۋەكەلدەردىڭ الدىن الۋعا كوشۋگە مۇمكىندىك بەرگەن نەگىزگى جەتىستىكتەر تانىستىرىلدى.
«بۇگىندە قىلمىستىق ىستەردىڭ 94%-ى ارىز تىركەلگەن ساتتەن باستاپ ۇكىمنىڭ ورىندالۋىنا دەيىن ەلەكتروندىق فورماتتا تەرگەلەدى. بۇل – قاعاز قىلمىستىق ىستەر ءداۋىرىنىڭ اياقتالعانىن بىلدىرەدى»، – دەدى قاداعالاۋ ۆەدومستۆوسىنىڭ باسشىسى.
اكىمشىلىك ءىس جۇرگىزۋ، بيزنەستى قورعاۋ، ازاماتتاردىڭ وتىنىشتەرىن قاراۋ جانە وزگە دە باعىتتار تولىق تسيفرلاندىرىلعان.
قازىرگى تاڭدا 300-دەن استام مەملەكەتتىك ورگاننىڭ دەرەكقورلارىمەن ينتەگراتسيالانعان 7 ۆەدومستۆوارالىق اقپاراتتىق جۇيە تابىستى جۇمىس ىستەۋدە.
«قازاقتەلەكوممەن» بىرلەسىپ ەلىمىز بويىنشا الاياقتاردىڭ قوڭىراۋلارىن بۇعاتتايتىن انتيكولل-ورتالىق قۇرىلدى. ونىڭ ءبىر جىلدىق جۇمىسى بارىسىندا 1 ميلليوننان استام الاياقتىق قوڭىراۋ توقتاتىلدى.
پروكۋرورلار «تسيفرلىق قاداعالاۋ» جۇيەسى ارقىلى قوعامدىق ورىندارداعى ينتەللەكتۋالدى بەينەكامەرالارعا قوسىلعان. جاساندى ينتەللەكت نەگىزىندەگى بۇل جۇيە قۇقىق بۇزۋشىلاردىڭ تسيفرلىق ىزدەرىن انىقتايدى.
قۇقىقتىق ستاتيستيكا جانە ارنايى ەسەپكە الۋ كوميتەتىندە قىلمىستىق قاۋىپ-قاتەرلەردى بولجاۋ ورتالىعى قۇرىلىپ، كريمينوگەندىك تاۋەكەلدەردى انىقتاۋ باعىتىندا جۇمىس جۇرگىزۋدە.
وسى جانە باسقا دا قابىلدانعان شارالار قىلمىس دەڭگەيىنىڭ تومەندەۋىنە وڭ اسەرىن تيگىزۋدە.
دوكتور كاي-فۋ لي باس پروكۋراتۋرانىڭ جاساندى ينتەللەكتتى ەنگىزۋ تاجىريبەسىنە جوعارى باعا بەرىپ، مەملەكەتتىك باسقارۋ جۇيەسىنە جاساندى ينتەللەكتتى بۇگىننەن باستاپ ەنگىزىپ جاتقان مەملەكەتتەر ۇزاق مەرزىمدى تەحنولوگيالىق ارتىقشىلىققا يە بولاتىنىن اتاپ ءوتتى.
سونىمەن قاتار ول قازاقستاننىڭ جاساندى ينتەللەكتتى دامىتۋداعى بولاشاق وڭىرلىك ورتالىقتاردىڭ بىرىنە اينالۋ الەۋەتى جونىندەگى كوزقاراسىمەن ءبولىسىپ، زاماناۋي تسيفرلىق ينفراقۇرىلىم قالىپتاستىرۋ جانە زياتكەرلىك تەحنولوگيالاردى دامىتۋ باعىتىنداعى ەلىمىزدىڭ باسەكەلەستىك ارتىقشىلىقتارىن ەرەكشە اتاپ ءوتتى.
باس پروكۋرور كاي-فۋ ءليدىڭ AI 2.0, مۋلتياگەنتتىك جۇيەلەر، باسشىلاردىڭ جۇمىس تيىمدىلىگىن ارتتىرۋعا ارنالعان «Boss AI» تۇجىرىمداماسى جانە ءبىلىم بەرۋ سالاسىنداعى تۇبەگەيلى وزگەرىستەردىڭ قاجەتتىلىگى تۋرالى يدەيالارىنا جوعارى باعا بەردى.
«بۇل تاسىلدەر مەملەكەت باسشىسىنىڭ قازاقستاندى ينتەللەكت ەكسپورتتايتىن ەلگە اينالدىرۋ جونىندەگى پايىمىمەن تولىق ۇندەسەدى»، – دەپ اتاپ ءوتتى بەرىك اسىلوۆ.
كەزدەسۋ قورىتىندىسى بويىنشا تاراپتار پروكۋراتۋرا ورگاندارىنىڭ قىزمەتىنە جانە مەملەكەتتىك باسقارۋ جۇيەسىنە جاساندى ينتەللەكت تەحنولوگيالارىن ەنگىزۋ سالاسىندا تاجىريبە الماسۋدى جالعاستىرۋدىڭ ءارى ىنتىماقتاستىقتى دامىتۋدىڭ ماڭىزدىلىعىن اتاپ ءوتتى.
باس پروكۋراتۋرانىڭ ءباسپاسوز قىزمەتى