N.Bekejanov atyndaǧy drama teatrda Temırjol kölıgı qyzmetkerlerı künıne arnalǧan saltanatty şara öttı. Oǧan oblys äkımı Mūrat Ergeşbaev qatysyp, sala ardagerlerı men qyzmetkerlerın käsıbi merekemen qūttyqtady.
Memleket basşysynyŋ kölık-logistika infraqūrylymyn damytu jönındegı tapsyrmalaryna toqtalyp, temırjol salasynyŋ el ekonomikasyndaǧy strategiialyq maŋyzyn atap öttı.
«Prezident Qasym-Jomart Kemelūly: «Jol - tırşılık közı. Temırjol bolmasa, ekonomika damymaidy. Bız kölık-logistika infraqūrylymyn damytuǧa erekşe män beremız», - dep salany örkendetudı strategiialyq basymdyq retınde aiqyndaǧan bolatyn.
Bügınde elımızde myŋdaǧan şaqyrym jaŋa temırjol jelılerı salynyp, ötkızu mümkındıgı artuda. Syr boiyndaǧy bolat joldyŋ tarihy tereŋde jatyr.
Bügınde oblystyŋ temırjol keşenı zaman talabyna sai jaŋaryp keledı. Stansiialar men jol boiyndaǧy nysandar avtomattandyrylyp, sifrlyq jüiege köşude. 2024 jyly 600 mln. teŋgeden astam qarjyǧa Qyzylorda temırjol vokzaly ǧimaraty kürdelı jöndelıp, ırgeles aumaǧy abattandyryldy.
Prezidentımızdıŋ tapsyrmasyna säikes, respublika boiynşa 124 temırjol vokzaly qaita jaŋǧyrtudan ötude.
Sonyŋ ışınde 10 joba bızdıŋ oblysymyzda ıske asyp jatyr.
Jaqynda ǧana Qazaly, Şielı, Jaŋaqorǧan, Sekseuıl temırjol vokzaldary men Talap beketındegı jolauşylar platformasy halyq igılıgıne tabystaldy.
Aral, Töretam, Josaly temırjol vokzaldaryndaǧy, Tereŋözek pen Jalaǧaş qyzmet körsetu punktterındegı jūmys kezeŋ-kezeŋımen aiaqtalyp keledı.
Biyl öŋırımızde 80 şaqyrymnan astam temırjolǧa kürdelı jöndeu jürgızılıp jatyr.
Temırjol - eŋ aldymen, joǧary jauapkerşılık pen temırdei tärtıptı talap etetın sala. Jazdyŋ ystyǧy men qystyŋ aiazyna qaramastan, bolat joldyŋ boiynda üzdıksız qyzmet etıp jürgen ärbır qyzmetkerdıŋ eŋbegı zor qūrmetke laiyq. Sızderge barşa Syr jūrtşylyǧynyŋ atynan şynaiy alǧysymdy bıldıremın. Barşaŋyzǧa myqty densaulyq, otbasylaryŋyzǧa amandyq, jauapty da märtebelı jūmystaryŋyzǧa sättılık tıleimın», - dedı Mūrat Nälqojaūly.
Saltanatty şarada temırjol salasynyŋ bırqatar qyzmetkerı oblys äkımınıŋ Alǧys hatymen, «Qyzylorda oblysynyŋ damuyna qosqan ülesı üşın» tösbelgısımen, Kölık ministrlıgınıŋ «Qūrmettı temırjolşy», «Qazaqstan temır joly» ūlttyq kompaniiasy» aksionerlık qoǧamynyŋ «Adal eŋbegı üşın», «Käsıbı boiynşa üzdık», «Üzdık jas maman», «Üzdık jol şeberı», «Üzdık bailanysşy» tösbelgılerımen, Qūrmet gramotasymen jäne III därejelı «Temırjolşy daŋqy» medalımen marapattaldy.
Jiynda «Qazaqstan temır joly» ūlttyq kompaniiasy» aksionerlık qoǧamy Qyzylorda magistraldyq jelı bölımşesı filialynyŋ direktory Batyrhan Bazarbaev söz söilep, ärıptesterın käsıbi merekemen qūttyqtady.
Qazırgı taŋda öŋırdıŋ temırjol salasynda 7 myŋnan astam maman eŋbek etedı. Oblys arqyly ötetın jük pen jolauşylar legı, Syr öŋırınıŋ tranzittık äleuetı jyl saiyn artuda.
Aimaqtan «Batys Europa – Batys Qytai» halyqaralyq kölık dälızımen qatar, ūzyndyǧy myŋ şaqyrymnan asatyn magistraldyq temırjol jelılerı ötedı, 15 jolauşylar poiyzy qatynaidy. Jyl basynan berı 550 myŋnan astam jolauşy tasymaldanyp, 9 million tonnadan astam jük jetkızıldı.
Biyl mamyr aiynda jylyna 600-den astam vagonǧa tehnikalyq qyzmet körsetetın «Maral Nūr» jauapkerşılıgı şekteulı serıktestıgınıŋ jaŋa keşenı paidalanuǧa berılıp, 100 jaŋa jūmys orny qūryldy.
Sonymen qatar qytailyq «CRRC» kompaniiasymen bırlesıp, zamanaui jolauşylar vagondaryn qūrastyru jobasyn ıske asyru pysyqtaluda.
Qyzylorda oblysy äkımınıŋ baspasöz qyzmetı
