27-29 mamyr künderı Qytaidyŋ Şanhai qalasynda ötıp jatqan ITB China 2025 halyqaralyq körmesıne Qazaqstan da qatysyp jatyr. Onda elımız 162 şarşy metrdı qamtityn bıryŋǧai ūlttyq stendpen otandyq turizmdı keluşılerge tanystyruda. Körme alaŋynda ıskerlık kezdesuler, tanystyrylymdar men turistık önımderdı damytuǧa arnalǧan aimaqtar qarastyrylǧan.
Otandyq delegasiia qūramynda QR Turizm jäne sport ministrlıgınıŋ, Kazakh Tourism ŪK AQ, sondai-aq Astana, Almaty, Aqmola, Maŋǧystau jäne Almaty oblysynyŋ turizm basqarmalarynyŋ, qonaq üi biznesınıŋ jäne jetekşı turistık kompaniialardyŋ ökılderı bar.
Körmenıŋ resmi aşylu räsımıne Messe Berlin GmbH kompaniiasynyŋ aǧa vise-prezidentı David Riuts, vise-prezidentı David Aksetis, Malaiziianyŋ Turizm, öner jäne mädeniet ministrı Dato Sri Tiong King Sing, sondai-aq Düniejüzılık turistık alians (World Tourism Alliance, WTA) ūiymynyŋ töraǧa orynbasary Pen Siui qatysty. Qūrmettı qonaqtar elımızdıŋ stendımen tanysyp, dästürlı qazaq taǧamdarynan däm tatyp, elımızdıŋ qonaqjailyǧy men mädeni aluan türlılıgıne joǧary baǧa berdı.
Ūlttyq stendte Astana men Almaty qalalarynyŋ turistık äleuetıne, sondai-aq öŋırlık tabiǧi jäne mädeni baǧyttarǧa erekşe nazar audarylǧan. Keluşılerge arnaiy beinematerialdar, qytai tılındegı aqparattyq materialdar jäne ıskerlık kezdesuler ūsynyluda.
Qytai – Qazaqstan üşın negızgı turistık naryqtardyŋ bırı. QR ŪQK Şekara qyzmetınıŋ derekterıne säikes, 2024 jyly Qytaidan kelgen turister sany 650 myŋ adamnan asyp, 2019 jylmen salystyrǧanda 9 ese ösken. Tek 2024 jyly elımızdegı qonaqüilerde 173 987 qytailyq turistke qyzmet körsetılgen. Būl 2023 jylmen salystyrǧanda 66%-ǧa köp.
Turister aǧynynyŋ artuyna ekı el arasynda vizasyz rejimnıŋ engızıluı, äue reisterınıŋ köbeiuı jäne Qytai naryǧyna baǧyttalǧan aqparattyq jūmystyŋ jüielı türde jürgızıluı yqpal ettı. Qazaqstannyŋ halyqaralyq körmelerge belsendı qatysuy turister sanyn arttyruǧa jäne eldıŋ Qytai saiahatşylary arasyndaǧy tanymaldyǧyn köteruge zor mümkındık berıp otyr.
ITB China – Qytaidaǧy eŋ ırı B2B formatyndaǧy turistık körmelerdıŋ bırı. Biylǧy körmege 80 elden 600-den astam eksponent qatysuda. Is-şaraǧa 15 000-nan astam salalyq maman, onyŋ ışınde 1 000 baier men 250 BAQ ökılı qatysady dep kütılude.
