Atalǧan qylmystyq ıstı QMA Almaty qalasy boiynşa departamentı jürgızdı. Anyqtalǧandai, Almaty qalasy äkımdıgınıŋ qaulysymen uaqytşa paidalanu qūqyǧy negızınde «Almaty» äleumettık-käsıpkerlık korporasiiasy» AQ-ǧa Jukov köşesı, 67-uchaske (2,3 ga) jäne Jamakaev köşesı, 77-uchaske (6,3 ga) mekenjailarynda ornalasqan jer telımderı 5 jyl merzımge berılgen.

Būryn «Azamattarǧa arnalǧan ükımet» kommersiialyq emes aksionerlık qoǧamynyŋ qyzmetkerı bolyp jūmys ıstegen Äbdıjaparov jyljymaityn mülıktı tırkeu jüiesınıŋ qalai jūmys ısteitının bıle otyryp, uäkılettı organdarǧa jer telımderın uaqytşa paidalanudan bas tartu turaly jalǧan kelısımder men jer telımderı jeke menşıkke berıldı degen jalǧan äkımdık qaulylaryn tapsyrǧan.

Alaida ıs jüzınde mūndai qaulylar äkımdık tarapynan şyǧarylmaǧan.

Osynyŋ nätijesınde ol atalǧan jer telımderın zaŋsyz türde özınıŋ «Aişa Grupp» JŞS-nıŋ atyna qaita tırkegen.

Keiın būl jer telımderın üşınşı tūlǧalarǧa 1,3 mlrd teŋgege satyp jıbergen.

Sottyŋ sanksiiasymen naryqtyq qūny 13,6 mlrd teŋge bolatyn jer telımderıne tyiym salyndy.

Sot ükımımen Äbdıjaparov QR Qylmystyq kodeksınıŋ 190-baby 4-bölıgı 2-tarmaǧy (ırı mölşerdegı alaiaqtyq) boiynşa kınälı dep tanylyp, oǧan 7 jyl bas bostandyǧynan aiyru jazasy taǧaiyndaldy.

Jer telımderı memleket menşıgıne qaitaryldy, olardyŋ aumaǧynda innovasiialyq hab salu josparlanuda.

Sot ükımı zaŋdy küşıne endı.