Kezdesuge öŋırdıŋ ısker ortasy, memlekettık organdar men biudjettık ūiymdardyŋ qyzmetkerlerı, sondai-aq ŞOB pen «Atameken» ŪKP öŋırlık filialynyŋ ökılderı qatysty.
Vedomstvo basşysy aitqandai, atalǧan zaŋ satyp alu prosesınıŋ räsımderın jeŋıldetıp, memleket esebınen satyp alynatyn tauarlardyŋ, jūmystar men körsetıletın qyzmetterdıŋ sapasyn arttyrumen bırge satypalym qatysuşylarynyŋ jauapkerşılıgın küşeitıp, bäsekelestıktı damytuǧa baǧyttalǧan.
«Aitalyq, zaŋnyŋ bırınşı bölımı satyp alu proseduralaryn jeŋıldetıp, ony qysqartudy közdeidı. Osy arqyly satyp aludy jedel jürgızıp, tapsyrys beruşılerge ülken ökılettıkter beru, sondai-aq satyp alu räsımderınıŋ ūzaqqa sozyluynyŋ aldyn alu maqsatynda şaǧymdardy endı satypalymdy ūiymdastyruşynyŋ özı tıkelei qaraityn bolady. Satyp alu qorytyndylaryna şaǧymdanu veb-portal arqyly jäne konkurstyq komissiiamen aiqyndalǧan jeŋımpazdyŋ satyp alular boiynşa ǧana jüzege asyrylady», - degen Mädi Tökeşūly reformadaǧy özge de özgerıster turaly ärıptesterı jan-jaqty tüsındırıp beretının jetkızdı.
Qarjy vise-ministrı Däuren Keŋbeiıldıŋ aituynşa, atalǧan qūjattaǧy jaŋaşyldyqtardyŋ bırı bäsekelestıktı damytuǧa arnalǧan. Mäselen, memlekettık satyp aludyŋ bıryŋǧai operatory – Elektrondyq qarjy ortalyǧynyŋ bazasynda Bıryŋǧai satyp alu platformasy zaŋnamalyq türde engızılıp otyr. Būl arqyly memlekettık ärı kvazimemlekettık sektor subektılerınıŋ satyp alularynyŋ elektrondy qyzmetterınıŋ qoljetımdılıgı arta tüsedı.
«Qazırdıŋ özınde «Elektrondyq memlekettık satyp alu» aqparat jüiesınde naqty uaqyt rejımınde satyp alu räsımderın ötkızu turaly aqparat, jetkızuşıler men jasalǧan kelısımşarttar, sol sekıldı olardy oryndau nätijelerı turaly mälımetter jariialanyp keledı. Byltyr osy jüiede 602 myŋ äleuettı önım beruşıge arnalǧan 1,7 mln habarlandyru ornalastyryldy. Barlyǧy 1,8 mln kelısımşart jasalyp, ötkızılgen memlekettık satyp aludyŋ qarajat kölemı 6,6 trln teŋge boldy», - dedı Däuren Maratūly.
Būdan bölek tenderlerdı ötkızu merzımı 2 aidan 10 jūmys künıne deiın qysqartyldy. Sonymen qatar memlekettık satyp alu nätijelerıne şaǧymdanu tärtıbı qaita qaralyp, jeŋıldei tüsedı. Memlekettık mekemelerge memleket esebınen alynatyn tauarlardy, jūmystar men körsetıletın qyzmetterdı 100 ailyq eseptık körsetkışten (AEK) 500 AEK-ke deiın, al auyldyq okrugter üşın konkurstyq räsımderdı ötkızbesten bır önım beruşıden 4000 AEK-ke deiın (memleket esebınen tauarlardy, jūmystar men körsetıletın qyzmetterdı) satyp alu mümkındıgı engızıldı.
«Būl öŋırlerdegı jekelegen mäselelerdı jedel şeşuge mümkındık beredı. Jergılıktı öndıruşılerdı qoldau maqsatynda jūmys oryndalatyn mekende tırkelgen merdıgerler üşın şartty diskont 1 paiyzdan 2 paiyzǧa deiın ūlǧaityldy. Būl şaǧyn jäne orta biznestı damytuǧa jäne qoldauǧa, sondai-aq tiıstı öŋırlerde salyq tüsımderın ūlǧaituǧa oŋ äser etedı», - dedı Qarjy ministrınıŋ orynbasary.
Jiynnyŋ soŋynda jergılıktı tūrǧyndar kökeikestı saualdaryn joldap, vedomstvo ökılderı qoldanystaǧy zaŋǧa süiene otyryp, tūşymdy jauap berdı.
