Aral audanynda şyǧarmaşyl ärı kreativtı jastardyŋ basyn qosqan jaidarman oiyndarynyŋ finaldyq kezeŋı öttı. Atalǧan şarany «Auyl» partiiasy Qyzylorda oblystyq filialynyŋ «Auyl jastary» jastar qanaty men «Aral-AS» şyǧarmaşylyq toby ūiymdastyrdy.

Köŋıldı tapqyrlar dodasyna audannyŋ belsendı jastary qatysyp, öz önerlerı men tapqyrlyqtaryn ortaǧa saldy. Finaldyq kezeŋ barysynda komandalar qoǧamdaǧy özektı mäselelerdı äzıl arqyly köterıp, «Zaŋ men tärtıp», «Adal azamat» taqyryptary aiasynda mazmūndy qoiylymdar körsettı. Sonymen qatar, jastar el bırlıgı, qoǧamdyq jauapkerşılık jäne adaldyq qūndylyqtaryn nasihattady.

Şara aiasynda audannyŋ belsendı jastary men komanda jetekşılerı «Auyl» partiiasynyŋ töraǧasy, QR Parlamentı Mäjılısınıŋ deputaty Egızbaev Serık Rahmetollaūly jäne «Auyl» partiiasy Qyzylorda oblystyq filialynyŋ töraǧasy, oblystyq mäslihat deputaty Mūstafa Sadyq Şoŋmūrynūly atynan arnaiy alǧys hattarmen marapattaldy.

Sonymen qatar, qatysuşylar men jeŋımpazdarǧa alǧys hattar, diplomdar jäne kuboktar tabystalyp, üzdık qūramalar aldaǧy oblystyq jaidarman chempionatyna joldama aldy.

Atalǧan şara jastardyŋ şyǧarmaşylyq qabıletın şyŋdap, olardyŋ qoǧamdyq belsendılıgın arttyruǧa baǧyttalǧan maŋyzdy alaŋǧa ainaldy.