Qorqyt ata atyndaǧy Qyzylorda universitetınde Adam qūqyqtary jönındegı uäkıl Artur Lastaevtyŋ konstitusiialyq reformalar aiasyndaǧy adam qūqyqtary men bostandyqtaryn qorǧau mäselelerıne arnalǧan därısı öttı.

 Söz söileu barysynda Ombudsmen studentterge adam qūqyqtary salasyndaǧy negızgı halyqaralyq standarttar, Ombudsmen institutynyŋ qyzmetı, sondai-aq azaptaular men qatygez qarym-qatynastyŋ aldyn alu jönındegı Ūlttyq aldyn alu tetıgınıŋ rölı turaly aityp berdı.

Qazaqstan Respublikasynyŋ jaŋa Konstitusiiasyndaǧy adam qūqyqtaryn qorǧauǧa qatysty erejelerge erekşe nazar audaryldy. Artur Lastaev Ata zaŋda adam qūqyqtary men bostandyqtarynyŋ memlekettıŋ eŋ joǧary qūndylyǧy retınde bekıtılgenın, sondai-aq sot arqyly qorǧalu, jeke basyna qol sūǧylmauşylyq kepıldıkterı men azaptauǧa tyiym salu normalarynyŋ küşeitılgenın atap öttı.

Is-şara soŋynda aşyq pıkırtalas ötıp, onyŋ aiasynda studentter özderın qyzyqtyrǧan sūraqtaryn qoiyp, adam qūqyqtaryn qorǧaudyŋ özektı mäselelerın talqylady.