بۇگىن وبلىس كولەمىندە مەملەكەت باسشىسىنىڭ باستاماسىمەن جۇزەگە اسىرىلىپ جاتقان «تازا قازاقستان» رەسپۋبليكالىق ەكولوگيالىق باعدارلاماسى اياسىندا جالپىحالىقتىق سەنبىلىك ۇيىمداستىرىلدى. قورشاعان ورتانىڭ تازالىعىن ساقتاۋ، ەلدى مەكەندەردىڭ سانيتارلىق جاعدايىن جاقسارتۋ، سونداي-اق تۇرعىندار اراسىندا ەكولوگيالىق مادەنيەت پەن جاۋاپكەرشىلىكتى قالىپتاستىرۋدى ماقسات ەتكەن يگى شاراعا ءوڭىر جۇرتشىلىعى بەلسەندى قاتىستى.
تازالىق اكتسيالارىنا قالا جانە اۋدان تۇرعىندارى، مەملەكەتتىك مەكەمە قىزمەتكەرلەرى، ەڭبەك ۇجىمدارى، جاستار جانە ەرىكتىلەر ات سالىستى. سەنبىلىك بارىسىندا كوشەلەر، اۋلالار، ساياباقتار مەن قوعامدىق ورىندار تازارتىلىپ، اۋماقتاردى اباتتاندىرۋ جۇمىستارى جۇرگىزىلدى. سونداي-اق تۇرمىستىق قالدىقتار جينالىپ، قورشاعان ورتانىڭ سانيتارلىق جاعدايىن جاقسارتۋعا باعىتتالعان جۇمىستار اتقارىلدى.
تازالىق شاراسى – تەك اينالانى كۇل-قوقىستان ارىلتۋ عانا ەمەس، قوعامنىڭ ەكولوگيالىق جاۋاپكەرشىلىگىن ارتتىرىپ، تابيعاتقا دەگەن جاناشىرلىقتى قالىپتاستىرۋدىڭ ماڭىزدى تەتىگى. ويتكەنى تۋعان جەردىڭ كوركەيۋى مەن قورشاعان ورتانىڭ تازا بولۋى – بارشاعا ورتاق مىندەت.
ايتا كەتۋ كەرەك، «تازا قازاقستان» ەكولوگيالىق باعدارلاماسى اياسىندا وبلىستىڭ بارلىق ەلدى مەكەندەرىندە سانيتارلىق تازارتۋ، ابباتتاندىرۋ جانە كوركەيتۋ-كوگالداندىرۋ جۇمىستارى جۇرگىزىلۋدە.
جىل باسىنان بەرى تازالىق شارالارىنا بارلىعى 450 499 وبلىس تۇرعىندارى، ارداگەرلەر، ەرىكتىلەر جانە مەملەكەتتىك مەكەمە قىزمەتكەرلەرى قاتىستى.
ناتيجەسىندە 12 508 توننا قوقىس قالدىقتارى شىعارىلىپ، ەلدى مەكەندەردەگى 510 سكۆەرلەر مەن پاركتەر، 256 تاريحي-مادەني ەسكەرتكىشتەر، 1019 الەۋمەتتىك نىساندار، 3002 ونەركاسىپ جانە بيزنەس نىساندارى، 332 سۋ وبەكتىلەرى مەن 33488 كوشەلەردىڭ بويى تازارتىلدى. وعان 548 تەحنيكا جۇمىلدىرىلدى.
تازالىق پەن ءتارتىپ – قورشاعان ورتاعا دەگەن جاۋاپكەرشىلىكتىڭ، قوعامنىڭ مادەنيەتى مەن ورتاق ىسكە دەگەن جاناشىرلىعىنىڭ كورىنىسى. تۋعان ولكەنىڭ كوركەيۋى تەك ءبىر رەتتىك ناۋقانمەن شەكتەلمەي، ءاربىر ازاماتتىڭ كۇندەلىكتى ءومىر سالتىنا اينالۋى ماڭىزدى.
«تازا قازاقستان» باعدارلاماسى اياسىنداعى جۇمىستار الداعى ۋاقىتتا دا جالعاسىپ، ءوڭىردىڭ ەكولوگيالىق احۋالىن جاقسارتۋ، ەلدى مەكەندەردىڭ تازالىعى مەن كوركىن ارتتىرۋ باعىتىندا جۇيەلى شارالار قابىلداناتىن بولادى.