بۇگىن قىزىلوردا قالاسىندا مەملەكەت باسشىسىنىڭ قازاقستان حالقىنا جولداۋىندا ايقىندالعان باسىم باعىتتاردى كەڭىنەن ءتۇسىندىرۋ ماقساتىندا رەسپۋبليكالىق اقپاراتتىق-ءتۇسىندىرۋ توبىنىڭ كەزدەسۋلەرى ءوتتى.
الدىمەن قىزىلوردا قالاسىنداعى «دوستىق ۇيىندە» زيالى قاۋىم، ازاماتتىق قوعام جانە بۇقارالىق اقپارات قۇرالدارى وكىلدەرىمەن وتكەن كەزدەسۋگە قازاقستان حالىق كەڭەسىنىڭ مۇشەلەرى مۇرات ابەنوۆ، جانار بيمۇراتقىزى، ەڭبەك جانە حالىقتى الەۋمەتتىك قورعاۋ ءبىرىنشى ۆيتسە-ءمينيسترى ەربول تۇياقباەۆ، اۋىل شارۋاشىلىعى ۆيتسە-ءمينيسترى ەرمەك كەنجەحانۇلى جانە وبلىس اكىمىنىڭ ورىنباسارى مەيرامبەك شەرماعانبەت قاتىستى.
كەلەسى «قىزىلوردا ەلەكتر تاراتۋ توراپتارى كومپانياسىندا» ەنەرگەتيكا سالاسىنىڭ ارداگەرلەرى، جۇمىسشى ماماندارىمەن وتكەن كەزدەسۋگە قۇرىلتاي دەپۋتاتى ايداربەك قوجانازاروۆ، قازاقستان حالىق كەڭەسىنىڭ مۇشەلەرى مەيرامبەك جۇماشەۆ، ەنەرگەتيكا ۆيتسە-ءمينيسترى ەرلان اكباروۆ جانە وبلىس اكىمىنىڭ ورىنباسارى باحىت جاحانوۆ قاتىستى.
مەملەكەت باسشىسى بولاشاق ەكونوميكاسىنا كوشۋدىڭ قۇقىقتىق نەگىزىن قالىپتاستىرۋ ءۇشىن جاڭا ازاماتتىق كودەكس قابىلداۋدىڭ ماڭىزىن اتاپ ءوتتى.
بۇل باستاما ەكونوميكالىق قاتىناستاردى زامان تالابىنا ساي جاڭعىرتۋعا، كاسىپكەرلىك قىزمەتتىڭ قۇقىقتىق كەپىلدىكتەرىن نىعايتۋعا جانە ينۆەستيتسيالىق احۋالدى جاقسارتۋعا باعىتتالعان.
ەلدىڭ الەۋمەتتىك-ەكونوميكالىق تۇراقتىلىعىن قامتاماسىز ەتۋ – باستى مىندەتتەردىڭ ءبىرى. جولداۋدا الەۋمەتتىك قولداۋ جۇيەسىن قايتا قاراۋعا، ازاماتتاردىڭ ەكونوميكالىق دەربەستىگىن قالىپتاستىرۋعا باسا ءمان بەرىلگەن.
ەلەكتر ەنەرگياسىمەن تۇراقتى قامتاماسىز ەتۋ – ەلدىڭ ەكونوميكالىق دەربەستىگى مەن باسەكەگە قابىلەتىن ايقىندايتىن ماڭىزدى فاكتور. «ەلىمىز 2029 جىلعا قاراي قۋات كوزىن ارتىعىمەن وندىرەتىندەي دەڭگەيگە جەتۋ كەرەك» دەگەن ستراتەگيالىق مىندەت قويىلعانى بەلگىلى.
مەملەكەت باسشىسى قاسىم-جومارت كەمەلۇلى سىر ءوڭىرىنىڭ اۋىل شارۋاشىلىعى الەۋەتىنە ەرەكشە توقتالىپ، كۇردەلى كليماتتىق جاعدايعا قاراماستان، ديقاندار جۇگەرى مەن سويا وسىرۋدە ناتيجەلى جۇمىس اتقارىپ جاتقانىن ايتتى.
وسىعان وراي، كەزدەسۋلەردە ەكونوميكانى جاڭعىرتۋ، كاسىپكەرلىكتى قولداۋ، زاڭنامانى جەتىلدىرۋ، ەنەرگەتيكالىق قاۋىپسىزدىكتى قامتاماسىز ەتۋ جانە حالىقتىڭ ءال-اۋقاتىن ارتتىرۋ ماسەلەلەرى قوزعالدى.
سونداي-اق الەۋمەتتىك ساياساتتى جاڭعىرتۋ، اگروونەركاسىپ كەشەنىن دامىتۋ، قوعامدىق كەلىسىم مەن ۇلتتىق قۇندىلىقتاردى نىعايتۋ باعىتتارى قامتىلدى. شاعىن جانە ورتا بيزنەستى قولداۋ ماقساتىندا كاسىپكەرلىك سۋبەكتىلەرىن تەكسەرۋگە ءۇش جىلدىق موراتوري ەنگىزۋدىڭ، اكىمشىلىك كەدەرگىلەردى ازايتۋدىڭ ارتىقشىلىقتارى ءسوز بولدى.
قوعامدىق دامۋ مەن يدەولوگيالىق تۇراقتىلىق ماسەلەلەرى دە باسقوسۋلاردىڭ نەگىزگى تاقىرىپتارىنىڭ بىرىنە اينالدى.
كەزدەسۋلەردە رەسپۋبليكالىق اقپاراتتىق-ءتۇسىندىرۋ توبى سپيكەرلەرىنىڭ جولداۋدىڭ باسىم باعىتتارىن كەڭىنەن ءتۇسىندىرۋ باعىتىندا جاساعان باياندامالارىنا وراي قاتىسۋشىلار ۇسىنىس-پىكىرلەرىن ورتاعا سالدى.
ايتا كەتەيىك، مەملەكەت باسشىسىنىڭ قازاقستان حالقىنا جولداۋىن ءتۇسىندىرۋ بويىنشا رەسپۋبليكالىق اقپاراتتىق-ءتۇسىندىرۋ توبىنىڭ وڭىردەگى جۇمىسى جالعاسۋدا.
الداعى ۋاقىتتا توپ مۇشەلەرى كاسىپكەرلەرمەن، ءبىلىم سالاسىنىڭ وكىلدەرىمەن جانە اۋدان تۇرعىندارىمەن دە كەزدەسىپ، جولداۋدىڭ نەگىزگى باعىتتارىن كەڭىنەن ءتۇسىندىرۋدى جانە حالىقپەن اشىق پىكىر الماسۋدى جوسپارلاۋدا.
قىزىلوردا وبلىسى اكىمىنىڭ ءباسپاسوز قىزمەتى