ۇلتتىق كىتاپ كۇنى وبلىس اكىمى نۇرلىبەك نالىباەۆ، كاسىپكەر- مەتسەنات ەدۋارد وگاي، قازاقستاننىڭ ەڭبەك ەرى ابزال ەراليەۆ، ، قۇقىق قورعاۋ ورگاندارىنىڭ باسشىلارى، زيالى قاۋىم وكىلدەرىنىڭ قاتىسۋىمەن ەلىمىزدەگى ءۇشىنشى پرەزيدەنتتىك كىتاپحانانىڭ ىرگەتاسىن قالاۋ ءراسىمى ءوتتى.
ايماق باسشىسى جينالعان جۇرتشىلىقتى 23 ءساۋىر – ۇلتتىق كىتاپ كۇنىمەن، كىتاپحاناشىلاردىڭ كاسىبي مەرەكەسىمەن جانە جاڭا كىتاپحانا قۇرىلىسىنىڭ باستالۋىمەن قۇتتىقتادى.
«وزدەرىڭىزگە بەلگىلى، مەملەكەت باسشىمىز وتكەن جىلى ايماعىمىزعا جۇمىس ساپارىمەن كەلگەندە استانا مەن الماتى قالالارىنداعىداي تاۋلىك بويى قىزمەت كورسەتەتىن ءۇشىنشى پرەزيدەنتتىك كىتاپحانانىڭ قىزىلوردا قالاسىندا اشىلاتىنىن جەتكىزگەن بولاتىن. جەرلەستەرىمىز بۇل باستامانى زور قۋانىشپەن قابىلدادى.
بۇگىن وزدەرىڭىزبەن بىرگە ايماعىمىز ءۇشىن ماڭىزدى جوبالاردىڭ ءبىرى – ءبىلىم مەن مادەنيەتتىڭ التىن دىڭگەگىنە اينالاتىن پرەزيدەنتتىك كىتاپحانانىڭ كاپسۋلاسىن سالۋ راسىمىندە باس قوستىق.
ماڭىزدى جوبانى جۇزەگە اسىرۋعا دەمەۋشىلىك كورسەتكەن ەلىمىزگە بەلگىلى كاسىپكەر-مەتسەنات وگاي ەدۋارد ۆيكتوروۆيچكە بارشا سىر جۇرتشىلىعىنىڭ اتىنان شىنايى العىسىمدى،
زور ريزاشىلىعىمدى بىلدىرەمىن.
دەمەۋشىلىكپەن 20 ملرد. تەڭگەگە سالىناتىن، اۋماعى
13 مىڭ شارشى مەتر، ساۋلەتتى، جاڭا كىتاپحانا زاماناۋي تالاپتارعا ساي بولادى. عيماراتتا وقۋ، كونفەرەنتس، باسىلىم، ارحيۆ پەن سيرەك قورعا ارنالعان زالدار، ەلەكتروندىق كىتاپحانا، الەم ادەبيەتى ءبولىمى مەن ونەر گالەرەيالارى، كورمە، كوۆوركينگ ورتالىقتارى، قالپىنا كەلتىرۋ شەبەرحاناسى قاراستىرىلعان.
بۇل – حالىقتىڭ رۋحاني دامۋىنا، كىتاپ وقۋ مادەنيەتىن جاڭا دەڭگەيگە كوتەرۋگە باعىتتالعان پرەزيدەنتىمىزدىڭ قولداۋى.
جاڭا نىسان تەك كىتاپتار جينالعان جەر ەمەس، ۇلتىمىزدىڭ تاريحىن، مادەنيەتى مەن وركەنيەتىن دارىپتەيتىن، جەرلەستەرىمىزدىڭ رۋحاني تىنىسىن اشاتىن تاربيە مەن تاعىلىم ءۇيى بولماق! جاڭا كىتاپحانانىڭ قۇرىلىسى ءساتتى اياقتالىپ، ەل يگىلىگىنە قىزمەت ەتىپ، ۇلت رۋحانياتى مەن ءبىلىمىنىڭ وركەندەۋىنە ۇلەس قوسۋىنا تىلەكتەسپىن»، – دەدى نۇرلىبەك ماشبەكۇلى.
راسىمدە ەدۋارد ۆيكتوروۆيچ، قازاقستان جازۋشىلار جانە جۋرناليستەر وداعىنىڭ مۇشەسى شاكيزادا ابدىكارىموۆ ءسوز سويلەدى.
ايتا كەتۋ كەرەك، 2022 جىلدان بەرى وڭىردە 22 مادەنيەت نىسانى جاڭادان سالىنىپ، ەل يگىلىگىنە بەرىلدى. بارلىق اۋداندا «رۋحانيات ورتالىقتارى» اشىلدى. وبلىستىڭ باس شاھارىندا «ونەر ورتالىعى»، «اناعا تاعزىم»، «وتباسى ورتالىعى»، «وقۋشىلار سارايى» بوي كوتەردى.
بىلتىر قىزىلوردانىڭ استانا بولعانىنا 100 جىل تولۋىنا وراي وبلىستىق تاريحي-ولكەتانۋ مۋزەيىنىڭ، اسسامبلەيانىڭ 30 جىلدىعىنا وراي «قازاتومونەركاسىپ» كومپانياسىنىڭ قولداۋىمەن «دوستىق ءۇيىنىڭ» جاڭا عيماراتى سالىندى.
كەيىنگى جىلدارى «سىر جۇلدىزدارى» اكادەمياسى، جالاعاش، جاڭاقورعان، شيەلى اۋداندارىندا «ونەر مەكتەبى» مەن «وقۋشىلار ءۇيى» ىسكە قوسىلدى.