بۇگىن سىرداريا اۋدانىندا جۇگەرى كەپتىرۋ جانە ساقتاۋ كەشەنى رەسمي تۇردە ىسكە قوسىلدى. وعان وبلىس اكىمى مۇرات ەرگەشباەۆ، وبلىس پروكۋرورىنىڭ مىندەتىن اتقارۋشى – ينۆەستيتسيالىق ومبۋدسمەن نۇربولات دۇيسەنباەۆ، «قىزىلوردا كراحمال-سىرنە زاۋىتى» سەرىكتەستىگىنىڭ قۇرىلتايشىسى زاكيرجان كۋزيەۆ، زيالى قاۋىم وكىلدەرى مەن ەل اعالارى قاتىستى.
مەملەكەت باسشىسى حالىققا ارناعان جولداۋىندا سۋ رەسۋرستارىنىڭ تاپشىلىعىن جويۋ ءۇشىن جۇيەلى ءارى باتىل شارالار قابىلداۋدى تاپسىرعانى بەلگىلى.
«ەڭ الدىمەن، سۋدى ءتيىمدى جانە ۇنەمدەپ پايدالانۋ قاعيداتتارىنىڭ جاپپاي ساقتالۋىن قامتاماسىز ەتۋ كەرەك. قازىرگى زاماندا بۇل رەسۋرستىڭ ءمان-ماڭىزى ايرىقشا.
بۇدان بولەك، اۋىل شارۋاشىلىعى ونىمدەرىن تەرەڭ وڭدەۋ ءىسىن دامىتۋعا باسا ءمان بەرگەن ءجون. قازىردىڭ وزىندە بۇل باعىتتا تابىستى جوبالار بار. ماسەلەن، قىزىلوردا وبلىسىنىڭ شارۋالارى قاتاڭ كليماتقا قاراماستان جۇگەرى مەن سويا ءوسىرىپ، ونى وڭدەۋمەن اينالىسادى»، – دەپ وڭىردەگى باستامالارعا وڭ باعا بەردى.
راسىمدە ايماق باسشىسى اۋدان تۇرعىندارىن قۇتتىقتاپ، جاڭا كەشەننىڭ جۇمىسىنا ساتتىلىك تىلەدى.
«مەملەكەت باسشىسى قاسىم-جومارت كەمەلۇلى ءوز جولداۋىندا اگروونەركاسىپ كەشەنىن جاڭعىرتۋ، اۋىل شارۋاشىلىعى ونىمدەرىن ساقتاۋ جانە تەرەڭ ءوڭدeۋ ماسەلەسىن ستراتەگيالىق ماڭىزى بار مىندەت رەتىندە ايقىندادى. بۇگىن «قىزىلوردا كراحمال-سىرنە زاۋىتىنىڭ» ءبىرىنشى كەزەڭى اياسىندا جۇگەرى كەپتىرۋ جانە ساقتاۋ كەشەنى ىسكە قوسىلۋدا. بۇل جوبا – ەگىن شارۋاشىلىعىن ارتاراپتاندىرۋعا، جۇگەرى ەگىسى كولەمىن ارتتىرۋعا باعىتتالعان بىرەگەي باستاما. وزدەرىڭىزگە بەلگىلى، ءوڭىردىڭ ەكونوميكالىق، ەكولوگيالىق جاعدايى سىرداريا وزەنىنىڭ دەڭگەيىنە تىكەلەي بايلانىستى. وسى رەتتە، ەگىستى ءارتاراپتاندىرىپ، سۋ رەسۋرستارىن ءتيىمدى پايدالانۋ – بۇگىنگى كۇننىڭ باستى تالابى.
پرەزيدەنتىمىزدىڭ سۋدى كوپ قاجەت ەتەتىن داقىلدار كولەمىن وڭتايلاندىرۋ تاپسىرماسىنا سايكەس، بيىل 70 مىڭ گەكتارعا كۇرىش ەگىلدى. جالپى سوڭعى ءۇش جىلدا كۇرىش ەگىسى 19 مىڭ گەكتارعا قىسقاردى.
الدا تۇرعان باستى مىندەتتەردىڭ ءبىرى – قالىپتاسقان ەگىنشىلىك جۇيەسىن زامان تالابىنا ساي بەيىمدەۋدى جالعاستىرۋ.
بارشاڭىزدى جاڭا كەشەننىڭ اشىلۋىمەن قۇتتىقتايمىن! ەلىمىز امان، جۇرتىمىز تىنىش بولسىن!»، – دەدى مۇرات نالقوجاۇلى.
راسىمدە نۇربولات دۇيسەنباەۆ، زاكيرجان كۋزيەۆ، ەل اعاسى سۇلتانبەك تاۋىپباەۆ ءسوز سويلەپ، جوبانى جۇزەگە اسىرعان ازاماتتار وبلىس اكىمىنىڭ العىس حاتىمەن ماراپاتتالدى.
ايتا كەتەيىك، وڭىردە سۋدى از قاجەت ەتەتىن، ونىمدىلىگى جوعارى جۇگەرى داقىلىن ەگۋ قارقىن العان. بيىل 11 مىڭ گەكتارعا ەگىلىپ، 60 مىڭ توننادان استام ءونىم جينالدى.
«تاڭ لتد» سەرىكتەستىگى سۋ ۇنەمدەۋ تەحنولوگياسىمەن، «اقتوبە جانە ك» شارۋاشىلىعى ءداستۇرلى سۋارۋ ارقىلى جۇگەرى ەگۋدە. جالاعاش اۋدانىندا شۆەيتساريالىق «Harvest Argo» كومپانياسىنىڭ 21 مىڭ گەكتارعا جۇگەرى جانە سويا ەگۋ جوباسى باستالدى. جۇگەرى القاپتارىن ۇلعايتۋ ماقساتىندا ارنايى جول كارتاسى بەكىتىلىپ، كەلەسى جىلى 28 مىڭ گەكتارعا ەگۋ جوسپارلانىپ وتىر.
قىزىلوردا وبلىسى اكىمىنىڭ ءباسپاسوز قىزمەتى