قوستاناي وبلىسىندا قوعام وكىلدەرىمەن، عىلىمي جانە پەداگوگيكالىق قاۋىمداستىقپەن، ەڭبەك ۇجىمدارىمەن، سونداي-اق قۇقىق قورعاۋ ورگاندارىنىڭ قىزمەتكەرلەرى جانە ونەركاسىپ كاسىپورىندارىنىڭ جۇمىسشىلارىمەن بىرقاتار كەزدەسۋلەر ءوتتى.
كەزدەسۋلەردىڭ باستى ماقساتى – قازاقستان رەسپۋبليكاسى پرەزيدەنتىنىڭ «جاڭا تاريحي كەزەڭدەگى قازاقستاننىڭ وزەكتى مىندەتتەرى» اتتى جولداۋىندا ايقىندالعان نەگىزگى باعىتتار مەن باسىمدىقتاردى ءتۇسىندىرۋ، مەملەكەتتىك ساياساتتىڭ الداعى مىندەتتەرىن جەتكىزۋ جانە ولاردىڭ وڭىرلىك دەڭگەيدە جۇزەگە اسىرىلۋ تەتىكتەرىن تانىستىرۋ بولدى.
باعدارلاما اياسىندا قاتىسۋشىلار ەكى توپقا ءبولىنىپ، ءتۇرلى سالا وكىلدەرىمەن كەزدەسۋلەر وتكىزدى.
ءبىرىنشى توپتىڭ قۇرامىندا قازاقستان رەسپۋبليكاسى قۇرىلتايىنىڭ دەپۋتاتى ە.ۆ. سمىشلياەۆا، قازاقستان حالىق كەڭەسىنىڭ مۇشەلەرى ت.ن. كۋناديلوۆ، ر.س. گادجيبالاەۆ، قر ۇلتتىق ەكونوميكا ۆيتسە-ءمينيسترى ە.ە. ساعناەۆ، قر ەڭبەك جانە حالىقتى الەۋمەتتىك قورعاۋ مينيسترلىگىنىڭ حالىقتى الەۋمەتتىك قورعاۋ سالاسىنداعى رەتتەۋ جانە باقىلاۋ كوميتەتىنىڭ توراعاسى ي.ۆ. سكۋب بولدى.
باعدارلاما «Qaz Talks» فورماتىنداعى ديالوگ الاڭىنان باستالدى. كەزدەسۋدى اشا وتىرىپ، ەكاتەرينا سمىشلياەۆا الداعى وزگەرىستەردىڭ زاڭنامالىق نەگىزدەرىنە توقتالدى. ول مەملەكەتتىڭ ستراتەگيالىق مىندەتتەرىن ىسكە اسىرۋ ءۇشىن سەنىمدى قۇقىقتىق نەگىز قالىپتاستىرۋ، زاڭنامانى جەتىلدىرۋ جانە ونىڭ قازىرگى قوعامنىڭ سۇرانىستارىنا سايكەستىگىن قامتاماسىز ەتۋ باعىتتارىنىڭ ماڭىزىن ءتۇسىندىردى.
قازاقستان حالىق كەڭەسىنىڭ مۇشەسى تولەگەن كۇنادىلوۆ ينفراقۇرىلىمدى جاڭعىرتۋ جانە «حالىقتىق قۇرىلىس» باستاماسىن ىسكە اسىرۋ جونىندەگى مىندەتتەردى باياندادى. ول ۇلتتىق قور قاراجاتىن ءتيىمدى ءارى اشىق پايدالانۋ، وتاندىق وندىرۋشىلەر مەن جەرگىلىكتى مەردىگەر ۇيىمداردى تارتۋ، جاڭا جۇمىس ورىندارىن اشۋ جانە قۇرىلىس جوبالارى قۇنىنىڭ نەگىزسىز وسۋىنە جول بەرمەۋ قاجەتتىگىن اتاپ ءوتتى. سونداي-اق باستامانىڭ نەگىزگى ماقساتى تەك ينفراقۇرىلىم نىساندارىن سالۋمەن شەكتەلمەي، وتاندىق ءوندىرىستى دامىتۋعا جانە وڭىرلەردىڭ ەكونوميكالىق الەۋەتىن ارتتىرۋعا باعىتتالۋى ءتيىس ەكەنىن جەتكىزدى.
بۇدان كەيىن پوليتسيا دەپارتامەنتىندە قۇقىق قورعاۋ ورگاندارىنىڭ قىزمەتكەرلەرىمەن كەزدەسۋ ءوتتى. كەزدەسۋ بارىسىندا «زاڭ مەن ءتارتىپ» قاعيداتىن ىسكە اسىرۋدىڭ ماڭىزى، قوعامدىق قاۋىپسىزدىكتى قامتاماسىز ەتۋ جانە قۇقىق بۇزۋشىلىقتاردىڭ الدىن الۋ باعىتىنداعى مىندەتتەر ءتۇسىندىرىلدى. اتاپ ايتقاندا، ينتەرنەت-الاياقتىق، كيبەرقىلمىس، ەسىرتكى قىلمىستارى مەن تۇرمىستىق زورلىق-زومبىلىققا قارسى ءىس-قيمىل ماسەلەلەرىنە نازار اۋدارىلدى. سونىمەن قاتار قۇقىق بۇزۋشىلىقتاردىڭ الدىن الۋدا وتباسىنىڭ، ءبىلىم بەرۋ ۇيىمدارىنىڭ، جۇمىس بەرۋشىلەر مەن قوعامنىڭ ءوزارا ءىس-قيمىلى، سونداي-اق قۇقىق قورعاۋ ورگاندارى قىزمەتكەرلەرىن الەۋمەتتىك قورعاۋ شارالارىنىڭ ماڭىزدىلىعى ايتىلدى.
ءبىرىنشى توپتىڭ كەزدەسۋلەرى قوستاناي قالاسىنداعى №31 جالپى ءبىلىم بەرەتىن مەكتەپتە پەداگوگيكالىق قاۋىمداستىقپەن وتكەن كەزدەسۋمەن قورىتىندىلاندى. پەداگوگتەرگە ءبىلىم بەرۋ سالاسىن دامىتۋعا قاتىستى باسىم مىندەتتەر، مەكتەپ ينفراقۇرىلىمىن جاڭعىرتۋ، ساپالى بىلىمگە تەڭ قولجەتىمدىلىكتى قامتاماسىز ەتۋ، ينكليۋزيۆتى ءبىلىم بەرۋدى دامىتۋ جانە قاۋىپسىز ءبىلىم بەرۋ ورتاسىن قالىپتاستىرۋ باعىتتارى ءتۇسىندىرىلدى. سونداي-اق پەداگوگتەردىڭ اكىمشىلىك جۇكتەمەسىن ازايتۋ، ارتىق ەسەپتىلىكتى قىسقارتۋ جانە مۇعالىمنىڭ كاسىبي مارتەبەسىن نىعايتۋ ماسەلەلەرىنە توقتالدى.
ەكىنشى توپتىڭ قۇرامىندا قازاقستان حالىق كەڭەسىنىڭ مۇشەلەرى ە.ا. ءابىل، ا.س. لاۆرەنتەۆ، گ.گ. شيپوۆسكيح جانە د.ي. پاۆلەنكو، قر ەنەرگەتيكا ۆيتسە-ءمينيسترى س.س. جاركەشوۆ، قر ونەركاسىپ جانە قۇرىلىس مينيسترلىگى ونەركاسىپ كوميتەتىنىڭ توراعاسى ا.س. پانباەۆ بولدى.
العاشقى كەزدەسۋ قوستاناي وبلىسىنىڭ عىلىمي قاۋىمداستىعى وكىلدەرىمەن احمەت بايتۇرسىنۇلى اتىنداعى قوستاناي وڭىرلىك ۋنيۆەرسيتەتىندە ءوتتى. كەزدەسۋ بارىسىندا پرەزيدەنت جولداۋىندا بەلگىلەنگەن عىلىمدى دامىتۋ، عىلىمي الەۋەتتى نىعايتۋ جانە عىلىمي قاۋىمداستىق پەن وندىرىستىك سەكتور اراسىنداعى بايلانىستى كۇشەيتۋ مىندەتتەرى ءتۇسىندىرىلدى.
قازاقستان حالىق كەڭەسىنىڭ مۇشەسى ەركىن ءابىل ءوز سوزىندە «حالىقتىق قۇرىلىس» باستاماسىنىڭ نەگىزگى ماقساتتارى مەن ونى جۇزەگە اسىرۋ تەتىكتەرىنە توقتالدى. ول ينفراقۇرىلىمدى اۋقىمدى جاڭعىرتۋ وتاندىق ءوندىرىستىڭ دامۋىنا، وڭىرلىك كاسىپورىنداردىڭ وندىرىستىك قۋاتىن ارتتىرۋعا جانە جاڭا جۇمىس ورىندارىن اشۋعا ىقپال ەتۋى ءتيىس ەكەنىن اتاپ ءوتتى. سونىمەن قاتار ۇلتتىق قور قاراجاتىن يمپورتتى قارجىلاندىرۋعا ەمەس، ىشكى ەكونوميكانى دامىتۋعا باعىتتاۋدىڭ ماڭىزدىلىعىن ءتۇسىندىردى. بۇدان بولەك، وڭىرلەردىڭ وندىرىستىك مۇمكىندىكتەرىن باعالاۋ، قۇرىلىس ماتەريالدارىنىڭ قۇنىن باقىلاۋ جانە ينفلياتسيالىق تاۋەكەلدەردىڭ الدىن الۋ قاجەتتىگىنە نازار اۋداردى.
قازاقستان حالىق كەڭەسىنىڭ مۇشەسى گەننادي شيپوۆسكيح قازاقستاننىڭ كولىك-لوگيستيكالىق الەۋەتىن دامىتۋعا قاتىستى مىندەتتەردى ءتۇسىندىردى. ول ەلدىڭ ترانزيتتىك مۇمكىندىكتەرىن نىعايتۋدا تەمىرجول ينفراقۇرىلىمىنىڭ ستراتەگيالىق ماڭىزىن اتاپ ءوتتى. اتاپ ايتقاندا، باقتى – اياگوز جاڭا تەمىرجول جەلىسىنىڭ قۇرىلىسى، ونى پايدالانۋعا بەرگەننەن كەيىن جۇك تاسىمالى كولەمىن جىلىنا 20 ملن تونناعا دەيىن ۇلعايتۋ مۇمكىندىگى، تەمىرجول جەلىسىن كەڭەيتۋ، ستانتسيالاردى جاڭعىرتۋ جانە جاڭا تەحنولوگيالاردى ەنگىزۋ باعىتتارىنا توقتالدى. ونىڭ ايتۋىنشا، كولىك سالاسىن دامىتۋ جاڭا جۇمىس ورىندارىن اشۋعا جانە وڭىرلەردىڭ ەكونوميكالىق وسۋىنە قوسىمشا مۇمكىندىكتەر بەرەدى.
كەلەسى كەزدەسۋ «بايان سۇلۋ» اق قىزمەتكەرلەرىمەن كاسىپورىن اۋماعىندا ءوتتى. كەزدەسۋ بارىسىندا وتاندىق ونەركاسىپتى دامىتۋ، وندىرىستىك سەكتوردى قولداۋ جانە كاسىپورىنداردىڭ الەۋەتىن ارتتىرۋ جونىندەگى مەملەكەتتىك ساياساتتىڭ باسىم باعىتتارى ءتۇسىندىرىلدى.
ونەركاسىپ كاسىپورىندارىنىڭ جۇمىسشىلارىمەن قورىتىندى كەزدەسۋ Allur زاۋىتىندا ءوتتى. قاتىسۋشىلارعا ونەركاسىپتى دامىتۋ، كولىك-ەنەرگەتيكالىق ينفراقۇرىلىمدى جەتىلدىرۋ جانە ءوڭىردىڭ وندىرىستىك الەۋەتىن نىعايتۋ باعىتىندا كوزدەلگەن مىندەتتەر مەن ولاردى ىسكە اسىرۋدىڭ ماڭىزدىلىعى جەتكىزىلدى.
وتكىزىلگەن كەزدەسۋلەر پرەزيدەنت جولداۋىنىڭ نەگىزگى باسىمدىقتارىن تۇسىندىرۋگە، مەملەكەتتىك ساياساتتىڭ الداعى مىندەتتەرىن حالىققا جەتكىزۋگە جانە قوعام مەن مەملەكەتتىك ورگاندار اراسىنداعى ءوزارا بايلانىستى نىعايتۋعا باعىتتالدى. كەزدەسۋلەر بارىسىندا زاڭنامالىق رەفورمالار، ازاماتتاردى الەۋمەتتىك قورعاۋ، وتاندىق ءوندىرىستى قولداۋ، كولىك لوگيستيكاسىن دامىتۋ جانە ءبىلىم بەرۋ ينفراقۇرىلىمىن جەتىلدىرۋ سياقتى ەل دامۋى ءۇشىن ماڭىزدى باعىتتار قامتىلدى.
ءباسپاسوز قىزمەتى