استانادا ءوتىپ جاتقان «بولاشاق ويىندارى – 2026» حالىقارالىق مۋلتيسپورت ءتۋرنيرى اياسىندا قر تۋريزم جانە سپورت ءمينيسترى ەربول مىرزابوسىنوۆ شەت مەملەكەتتەردىڭ سپورت سالاسىنا جاۋاپتى باسشىلارىمەن بىرقاتار ەكىجاقتى كەزدەسۋ وتكىزدى.
كەزدەسۋلەرگە رەسەي، ءازىربايجان، وزبەكستان، قىرعىزستان، بەلارۋس، تۇرىكمەنستان جانە بىرىككەن اراب امىرلىكتەرىنىڭ سپورت ۆەدومستۆولارىنىڭ جەتەكشىلەرى قاتىستى. تاراپتار سپورت، كيبەرسپورت جانە جاستار ساياساتى باعىتتارىنداعى ىنتىماقتاستىقتى دامىتۋ ماسەلەلەرىن تالقىلادى.
كەلىسسوزدەر بارىسىندا ەربول مىرزابوسىنوۆ رەسەي فەدەراتسياسىنىڭ سپورت ءمينيسترى ميحايل دەگتيارەۆ، ءازىربايجان رەسپۋبليكاسىنىڭ جاستار جانە سپورت ءمينيسترى فاريد گايبوۆ، وزبەكستان رەسپۋبليكاسىنىڭ سپورت ءمينيسترى ادحام يكراموۆ، قىرعىز رەسپۋبليكاسى مينيسترلەر كابينەتى جانىنداعى دەنە شىنىقتىرۋ جانە سپورت جونىندەگى مەملەكەتتىك اگەنتتىكتىڭ ديرەكتورى ۇرمات اسانباەۆ، بەلارۋس رەسپۋبليكاسىنىڭ سپورت ءمينيسترى سەرگەي كوۆالچۋك، بىرىككەن اراب امىرلىكتەرىنىڭ سپورت ءمينيسترى احمەد بەلحۋل ءال فالاسي، سونداي-اق وزگە دە سپورت سالاسىنا جاۋاپتى تۇلعالارمەن كەزدەستى.
تاراپتار سپورت رەزەرۆىن دايارلاۋ، سپورتشىلاردى دايىنداۋدىڭ زاماناۋي ادىستەرىن ەنگىزۋ، سپورت ينفراقۇرىلىمىن دامىتۋ، تاجىريبە الماسۋ جانە سالالىق ۇيىمدار اراسىنداعى ارىپتەستىكتى نىعايتۋ ماسەلەلەرىنە ەرەكشە نازار اۋداردى. سونىمەن قاتار بىرلەسكەن جارىستار وتكىزۋ، جاڭا سپورت تۇرلەرىن دامىتۋ جانە سپورت سالاسىن تسيفرلاندىرۋ باعىتتارى ءسوز بولدى.
كەزدەسۋ قورىتىندىسىندا تاراپتار حالىقارالىق ىنتىماقتاستىقتى ودان ءارى دامىتۋعا، بىرلەسكەن جوبالاردى ىسكە اسىرۋعا جانە حالىقارالىق سپورتتىق ءىس-شارالاردى بىرلەسىپ ۇيىمداستىرۋعا دايىن ەكەنىن جەتكىزدى.
ايتا كەتەيىك، استانادا ءوتىپ جاتقان «بولاشاق ويىندارى – 2026» حالىقارالىق مۋلتيسپورت تۋرنيرىنە الەمنىڭ 30-دان استام ەلىنەن 800-گە جۋىق سپورتشى قاتىسىپ جاتىر.