ماتىندە بىلاي دەلىنگەن:
"قادىرلى ءباسپاسوز قىزمەتكەرلەرى!
سىزدەردى ۇلتتىق باسىلىم كۇنىمەن قۇتتىقتايمىن!
بۇل مەرەكە – ەلىمىزدى وركەندەتۋ جانە مەملەكەتتىگىمىزدى نىعايتۋ جولىندا ەڭبەك ەتىپ جۇرگەن ءباسپاسوز وكىلدەرىنە دەگەن شىنايى قۇرمەتتىڭ بەلگىسى. قازاق باسىلىمدارى ءاردايىم حالىقتىڭ ءۇنى، ءتول رۋحانياتىمىزدىڭ بەرىك قورعانى سانالعان. ءبىز ونىڭ باي تاريحىن، اعارتۋشىلىق ءداستۇرىن ماقتان تۇتامىز. گازەت-جۋرنالدارىمىز ۇلتتىق سانا-سەزىمدى دامىتۋ ىسىندە ايرىقشا ءرول اتقارادى. زيالى قاۋىم وكىلدەرى قوعامداعى كوكەيكەستى ماسەلەلەرگە قاتىستى وي-پىكىرىن، نەگىزىنەن، مەرزىمدى ءباسپاسوز ارقىلى بىلدىرەدى.
ەلىمىزدە ءتۇرلى كەزەڭدە جارىق كورگەن باسىلىمدار قاشاندا ۇلت مۇددەسىنە ادال قىزمەت ەتكەن. اعا بۋىننىڭ سارا جولىن قازىرگى كاسىبي جۋرناليستەر لايىقتى جالعاستىرىپ كەلەدى. ولار شىنايى اقپارات تاراتىپ، جالپىۇلتتىق قۇندىلىقتاردى كەڭىنەن ناسيحاتتاۋعا بەلسەنە اتسالىسىپ ءجۇر.
گازەت-جۋرنالدارىمىز الداعى ۋاقىتتا دا جاسامپاز باستامالاردى جۇزەگە اسىرۋعا، ۇلتتىڭ جاڭا ساپاسىن قالىپتاستىرۋعا جانە ەل بىرلىگىن نىعايتۋعا زور ۇلەس قوسا بەرەدى دەپ سەنەمىن.
بارشاڭىزعا شىعارماشىلىق شابىت، باق-بەرەكە تىلەيمىن!"