جوبانىڭ وڭىردە جۇزەگە اسۋ بارىسىمەن وقۋ-اعارتۋ ءمينيسترى عاني بەيسەمباەۆ جۇمىس ساپارى اياسىندا تانىستى.
قازىرگى ۋاقىتتا جوسپارلانعان بەس مەكتەپتىڭ ەكەۋى پايدالانۋعا بەرىلدى. قالعان ۇشەۋى جىل سوڭىنا دەيىن اشىلادى. سونىڭ ءبىرى سەمەي قالاسىنداعى حالىق تىعىز قونىستانعان شاعىناۋدانداردىڭ بىرىندە بوي كوتەردى. بۇل مەكتەپتىڭ اشىلۋى وقۋشى ورىن تاپشىلىعىن ازايتىپ، وقۋ پروتسەسىنىڭ قاۋىپسىزدىگىن كۇشەيتۋگە مۇمكىندىك بەرمەك.
جاڭا ۇلگىدەگى ءبىلىم وردالارى وقۋشىلاردىڭ جاس ەرەكشەلىگى مەن قاجەتتىلىكتەرىنە ساي جوبالانعان. باستاۋىش پەن جوعارى سىنىپ وقۋشىلارى بولەك بلوكتارعا ورنالاستىرىلادى. مەكتەپتەر زاماناۋي تەحنيكامەن، ىڭعايلى جيھازبەن جابدىقتالىپ، قاۋىپسىزدىك شارالارى كۇشەيتىلەدى. سونىمەن قاتار «ادال ازامات» تۇجىرىمداماسى شەڭبەرىندە تاربيە باعىتى مەن كاسىپتىك باعدار جۇمىستارى دا قامتىلادى.
«بۇل باستاما ەلىمىزدەگى ءبىلىم ساپاسىن جۇيەلى تۇردە كوتەرۋگە باعىتتالعان. ماقساتىمىز – قاي ايماقتا تۇرسا دا، ءار بالا جاڭا ۇلگىدەگى قاۋىپسىز ءارى ساپالى مەكتەپتە وقۋى كەرەك. سول ءۇشىن جاڭاشا ءادىس-تاسىلدەردى مەڭگەرگەن، بىلىكتى مۇعالىمدەر قاجەت»، – دەدى عاني بەيسەمباەۆ.
جاڭا فورماتتاعى مەكتەپتەردە پەداگوگتەردىڭ كاسىبي وسۋىنە ەرەكشە نازار اۋدارىلادى. مەكتەپ باسقارۋ جۇيەسى تيىمدىلىك پەن اشىقتىق قاعيداتتارىنا سۇيەنەدى. باسشىلىق قۇرامىن ىرىكتەۋدە «ءبىلىم بەرۋدەگى 1000 كوشباسشى» باعدارلاماسىنا قاتىسۋشىلارعا باسىمدىق بەرىلەدى.
«بۇل مەكتەپكە ءبىلىمدى ءارى جاڭاشىل ويلايتىن جاس ماماندار تارتىلىپ جاتىر. ءبىز وڭىرلىك جوعارى وقۋ ورىندارىمەن تىعىز بايلانىس ورناتىپ، تۇراقتى كادرلىق الەۋەتتى قالىپتاستىرۋدى كوزدەپ وتىرمىز»، – دەدى №52 مەكتەپتىڭ ديرەكتورى، «ءبىلىم بەرۋدەگى 1000 كوشباسشى» جوباسىنىڭ قاتىسۋشىسى تلەك ساپىشەۆ.
ايتا كەتەيىك، ۇلتتىق جوبا اياسىندا ەلىمىز بويىنشا 217 مەكتەپ اشۋ جوسپارلانعان. ونىڭ 105-ءى پايدالانۋعا بەرىلدى، قالعان 112-ءسى 2025 جىلدىڭ سوڭىنا دەيىن ىسكە قوسىلادى. جاڭا مەكتەپتەردىڭ 44 پايىزى اۋىلدىق جەرلەردە ورنالاسادى.