«ءبىزدىڭ باسىم مىندەتتەرىمىزدىڭ ءبىرى – الەۋمەتتىك ينفراقۇرىلىمدى دامىتۋ. ولار – وقۋ ورىندارىنىڭ، مەديتسينالىق مەكەمەلەردىڭ، بالاباقشالاردىڭ، ستۋدەنتتەرگە ارنالعان جاتاقحانالاردىڭ، وقۋشىلار سارايلارىنىڭ، قوعامدىق كەڭىستىكتەردىڭ (ساياباقتار، گۇلزارلار، جەلەكجولدار), اۋلالاردىڭ جانە ت.ب. قۇرىلىسى.
ماسەلەن، مەكتەپ تۋرالى ايتار بولساق، 2024 جىلى ءبىلىم وشاعىن 12,5 مىڭنان استام وقۋشى ءتامامدادى. ال سول ۋاقىتتا ءبىرىنشى سىنىپقا 28,5 مىڭنان استام بالا باردى. ءبىرىنشى سىنىپ وقۋشىلارىنىڭ سانى تۇلەكتەر سانىنان 2 ەسەدەن اسىپ تۇسەدى. تيىسىنشە قالادا جىل سايىن مەكتەپتەر سالۋ قاجەت.
قالانى ارالاۋ بارىسىندا م.تولەباەۆ پەن بۋراباي، ش.قۇدايبەردىۇلى داڭعىلى مەن ءى.جانسۇگىروۆ كوشەلەرىنىڭ قيىلىستارىندا، سول سياقتى ەگەمەن قازاقستان، يمانوۆ كوشەلەرىندە ورنالاسقان بىرقاتار مەكتەپتىڭ قۇرىلىس بارىسىمەن تانىستىم.
وزدەرىڭىز بىلەتىندەي، وسى وقۋ جىلىنىڭ باسىنان بەرى 24 وقۋ ورنىن سالىپ، قولدانىسقا بەردىك. بۇل – ەلوردا ءۇشىن رەكورد. اتالعان مەكتەپتەر ەكى اۋىسىمدا 66 مىڭعا جۋىق وقۋشى ورنىن اشۋعا مۇمكىندىك بەردى. 24 وقۋ ورنىنىڭ – 16-سى جايلى مەكتەپ. «جايلى مەكتەپ» ۇلتتىق جوباسى اياسىندا مەملەكەت باسشىسىنىڭ تاپسىرماسى بويىنشا جاڭا فورماتتا 24 مەكتەپ سالىنادى. بۇل جايلى مەكتەپتەر ەكى اۋىسىمدا 90 مىڭعا جۋىق وقۋشى ورنىن اشۋعا مۇمكىندىك بەرەدى.
جاڭا وقۋ جىلىندا تاعى 15 مەكتەپ اشۋدى جوسپارلاپ وتىرمىز. وقۋ ورىندارىنىڭ قۇرىلىسىنا دا جەكە قاراجات تارتامىز.
سونداي-اق، جىل سايىن پەداگوگ ماماندىعىنا گرانتتار بولە وتىرىپ، كادرلار دايارلاۋمەن اينالىسامىز. قازىرگى ۋاقىتتا قالا اكىمدىگىنىڭ گرانتى بويىنشا جوو-دا 2 مىڭ 200-گە جۋىق ادام ءبىلىم الىپ ءجۇر»، - دەپ جازدى جەڭىس قاسىمبەك.