جامبىل وبلىسىندا 2019-2025 جىلدار ارالىعىندا «اۋىل – ەل بەسىگى» جوباسى اياسىندا 189 اۋىلدا جالپى قۇنى 81,9 ملرد تەڭگەنى قۇرايتىن 1 073 جوبا جۇزەگە اسىرىلدى. بۇل تۋرالى وبلىستىق ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى ساندۋعاش ابدراليەۆا مالىمدەدى.
«اۋىل – ەل بەسىگى» جوباسى 2019 جىلدان بەرى جۇزەگە اسىرىلىپ كەلەدى. جوبانىڭ نەگىزگى ماقساتى – اۋىل تۇرعىندارىنىڭ ءومىر ءسۇرۋ ساپاسى مەن ءال-اۋقاتىن ارتتىرۋ، ەلدى مەكەندەردى تۇراقتى دامىتۋ.
سوڭعى التى جىلدا وڭىردەگى ەلدى مەكەندەردىڭ الەۋمەتتىك جانە ينجەنەرلىك ينفراقۇرىلىم ايتارلىقتاي جاقساردى. اتاپ ايتقاندا، 71 ءبىلىم بەرۋ، 35 دەنساۋلىق ساقتاۋ، 54 مادەنيەت، 51 سپورت جانە 85 كوممۋنالدىق-شارۋاشىلىق نىسانى پايدالانۋعا بەرىلدى. سونىمەن قاتار جالپى ۇزىندىعى 892 شاقىرىمدى قۇرايتىن 776 اۋىلىشىلىك كوشە ورتاشا جوندەۋدەن ءوتتى.
بيىل وتپەلى 19 جوبانى ىسكە اسىرۋ جوسپارلانۋدا.
بايزاق اۋدانىنىڭ قوساق، جامبىل اۋدانىنىڭ توعىزتاراۋ، ت. رىسقۇلوۆ اۋدانىنىڭ قاراقات، شۋ اۋدانىنىڭ تولە بي جانە ەڭبەكشى اۋىلدارىنداعى 7 مەكتەپكە جاپسارلاس عيماراتتار سالىنادى.
سونداي-اق جۋالى اۋدانىنىڭ نۇرلىكەنت، كولتوعان، قاراساز، ت.رىسقۇلوۆ اۋدانىنىڭ قۇلان، قورداي اۋدانىنىڭ ۇلكەن ءسۇلۋتور، شۋ اۋدانىنىڭ جاڭاجول جانە شوقپار اۋىلدارىندا 8 دەنە شىنىقتىرۋ-ساۋىقتىرۋ كەشەنىن پايدالانۋعا بەرۋ كوزدەلىپ وتىر.
بۇدان بولەك، جامبىل اۋدانىنىڭ بەساعاش، تالاس اۋدانىنىڭ ويىق جانە ءۇشارال اۋىلدارىندا 3 مادەنيەت ءۇيى اشىلادى دەپ جوسپارلانۋدا.
كولىك ينفراقۇرىلىمى سالاسىندا دا ءبىر جوبانى جۇزەگە اسىرۋ كوزدەلگەن.
ايتا كەتەيىك، وبلىستاعى 357 ەلدى مەكەندە 1 216,1 مىڭ ادام تۇرادى. ونىڭ ىشىندە 353-ءى اۋىلدىق ەلدى مەكەن بولسا، وندا 678,3 مىڭ ادام نەمەسە ءوڭىر حالقىنىڭ 55,8 پايىزى قونىستانعان.