استانادا «تازا قازاقستان» رەسپۋبليكالىق ەكولوگيالىق اكتسياسى اياسىندا اباتتاندىرۋ ەرەجەلەرىنىڭ بۇزىلۋىنا جول بەرمەۋ بويىنشا جۇيەلى جۇمىس جالعاسىپ جاتىر. بۇل باعىتتا پوليتسيا كەشەندى شارالار قابىلداپ، زاماناۋي تسيفرلىق تەحنولوگيالاردى دا قولدانۋدا
قالانىڭ ەكولوگيالىق جاعدايىن جاقسارتۋ جانە سىرتقى كەلبەتىن ساقتاۋ ماقساتىندا ءتارتىپ ساقشىلارى قوعامدىق اۋماقتاردى لاستاۋ فاكتىلەرىن انىقتاۋ جانە اباتتاندىرۋ ەرەجەلەرىنىڭ ساقتالۋىن باقىلاۋ بويىنشا كەشەندى شارالار جۇرگىزىپ جاتىر.
بۇل رەتتە قۇقىق بۇزۋشىلىقتاردى انىقتاۋ ءۇشىن جەدەل باسقارۋ ورتالىعىنىڭ كامەرالارى جانە ۇشقىشسىز ۇشۋ اپپاراتتارى (دروندار) بەلسەندى پايدالانىلادى. ولار زاڭسىز قوقىس ورىندارىن، ونىڭ ىشىندە قالا شەتىندە ورنالاسقان اۋماقتاردا جەدەل انىقتاۋعا مۇمكىندىك بەرەدى.
تۇراقتى تۇردە رەيدتەر مەن پاترۋلدەۋ جۇمىسى جۇرگىزىلەدى. ەڭ ءجيى بۇزۋشىلىقتار قۇرىلىس نىساندارى ماڭىندا تىركەلەدى، مۇندا قۇرىلىس جانە تۇرمىستىق قالدىقتاردىڭ ۋاقىتىلى شىعارىلماي جينالىپ قالۋى بايقالادى.
ماسەلەن، ەلوردانىڭ ءبىر اۋدانىندا، كوكتال كوشەسى بويىندا تۇرعىن جانە وندىرىستىك نىساندار ماڭىندا وسىنداي بىرقاتار پروبلەما انىقتالعان.
ءاربىر دەرەك بويىنشا ءتيىستى شارالار قابىلدانعان.
جىل باسىنان بەرى قالادا اباتتاندىرۋ ەرەجەلەرىن بۇزۋدىڭ شامامەن 19 مىڭ فاكتىسى تىركەلگەن. سونىمەن قاتار، قالدىقتاردى بەلگىلەنبەگەن ورىندارعا تاستاۋ دەرەكتەرى بويىنشا استانا قالاسى ەكولوگيا دەپارتامەنتىنە شامامەن 400 ماتەريال جولدانىپ، ءتيىستى شارا قابىلداۋ ءۇشىن جىبەرىلگەن.
پوليتسيا تۇرعىندارمەن جانە ەكولوگيالىق بەلسەندىلەرمەن بىرلەسىپ، پروفيلاكتيكالىق جۇمىستاردى دا كۇشەيتىپ وتىر.
بۇل ەكولوگياعا جاۋاپكەرشىلىكپەن قاراۋ مادەنيەتىن قالىپتاستىرۋعا باعىتتالعان.
قۇقىق قورعاۋ ورگاندارى اباتتاندىرۋ ەرەجەلەرىن ساقتاۋ ءاربىر تۇرعىننىڭ مىندەتى ەكەنىن ەسكە سالادى. بەلگىلەنگەن نورمالاردى بۇزۋ اكىمشىلىك جاۋاپكەرشىلىككە اكەپ سوعادى.