سەمينارعا قازاقستان رەسپۋبليكاسى پرەمەر-ءمينيسترىنىڭ ورىنباسارى تامارا دۇيسەنوۆا، پرەمەر-ءمينيستردىڭ كەڭەسشىسى ەرالى توعجانوۆ، «AMANAT» پارتياسىنىڭ حاتشىسى ەرجان جىلقىباەۆ، اۋىلشارۋاشىلىعى ۆيتسە-ءمينيسترى ەربول تاسجۇرەكوۆ، ۇلتتىق ەكونوميكا ۆيتسە-ءمينيسترى باۋىرجان وماربەكوۆ، ەلىمىزدىڭ بارلىق وڭىرلەرىنەن وبلىس اكىمىنىڭ ورىنباسارلارى، اۋىلشارۋاشىلىعى باسقارمالارى مەن الەۋمەتتىك كورپوراتسيالار باسشىلارى، اۋىل اكىمدەرى، بيزنەس وكىلدەرى ارنايى قاتىستى.
باستى ماقسات – ۇكىمەت باسشىسىنىڭ تاپسىرماسىنا سايكەس «اۋىل اماناتى» باعدارلاماسىن قىزىلوردا وبلىسىندا ىسكە اسىرۋ تاجىريبەسىن رەسپۋبليكانىڭ وزگە وڭىرلەرىنە كەڭىنەن تاراتۋ.
سەميناردى وبلىس اكىمى نۇرلىبەك نالىباەۆ جۇرگىزىپ، وڭىردە اتقارىلعان جۇمىستاردى اتاپ ءوتتى.
– مەملەكەت باسشىسى قاسىم-جومارت كەمەلۇلىنىڭ قولداۋىمەن باستاۋ العان «اۋىل اماناتى» باعدارلاماسىن ىسكە اسىرۋ بويىنشا قىزىلوردا وبلىسىندا ۇيىمداستىرىلعان العاشقى رەسپۋبليكالىق سەمينارعا قوش كەلدىڭىزدەر!
اۋىلداردى دامىتۋ – مەملەكەتتىك ساياساتتىڭ ماڭىزدى ستراتەگيالىق ماقساتتارىنىڭ ءبىرى. بۇگىندە وبلىستىڭ 447 مىڭ تۇرعىنى نەمەسە حالىقتىڭ 53 پايىزى اۋىلدا تۇرادى. مەملەكەت باسشىسىنىڭ تاپسىرماسىنا سايكەس ەلىمىزدە «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى، «اۋىل – ەل بەسىگى»، «اۋىل اماناتى»، «ديپلوممەن – اۋىلعا!» مەملەكەتتىك باعدارلامالارى ءساتتى جۇزەگە اسۋدا.
«اۋىل اماناتى» بويىنشا وتكەن جىلى وڭىرىمىزدە 3 ملرد تەڭگەگە 406 جوبا جۇزەگە اسىپ، 713 جاڭا جۇمىس ورنى اشىلدى. بيىل 4 ملرد 600 ملن تەڭگەگە 575 جوبا جوسپارلانعان. بۇگىنگە دەيىن 2 ملرد 500 ملن تەڭگە ءبولىنىپ، 1 ملرد تەڭگەگە 150 جوبا قارجىلاندىرىلدى.
اۋىلدىق ايماقتاردىڭ جاعدايىن جاقسارتۋدا اگروبيزنەس وكىلدەرى اۋقىمدى جۇمىس اتقارۋدا. بۇل باعىتتا «اباي-داۋلەت» جاۋاپكەرشىلىگى شەكتەۋلى سەرىكتەستىگىنىڭ ناتيجەلى جۇمىستارىن ەرەكشە اتاپ ءوتۋ قاجەت. قازىرگى تاڭدا سەرىكتەستىكتىڭ وڭ تاجىريبەسىن كەڭىنەن تاراتىپ، وبلىستىڭ بارلىق اۋىلدارىندا جاڭا ءوندىرىس، ساۋدا نىساندارىن اشۋ بويىنشا بەلسەندى جۇمىستار جۇرگىزىلۋدە، – دەدى وبلىس اكىمى.
سەميناردىڭ العىسوزىندە تامارا دۇيسەنوۆا اۋىل حالقىنىڭ تۇرمىس-تىرشىلىگىن، ءال-اۋقاتىن جاقسارتۋ باعىتىندا جۇزەگە اسىرىلىپ كەلەتىن «اۋىل اماناتى» باعدارلاماسىنىڭ ەل دامۋىنداعى ماڭىزى زور ەكەنىن ايتىپ، بىرقاتار ماسەلەلەرگە توقتالدى.
سونىمەن قاتار، باتىس قازاقستان وبلىسىندا باعدارلامانى ىسكە اسىرۋ بارىسى تۋرالى وبلىس اكىمىنىڭ كەڭەسشىسى الديار حالەلوۆ، «باتىس ءسۇت» اۋىل شارۋاشىلىعى وندىرىستىك كووپەراتيۆىنىڭ باسشىسى سەرگەي كاۆەرين، اۋىل شارۋاشىلىعى ونىمدەرىن تەرەڭ وڭدەۋ جانە وتكىزۋ تۋرالى «داۋلەت بەكەت» سەرىكتەستىگىنىڭ ديرەكتورى سىدىق داۋلەت، شىعىس قازاقستان وبلىسىندا ەكوتۋريزمدى دامىتۋ تۋرالى جەكە كاسىپكەر ناتاليا سۆاحينا بايانداما جاسادى.
قىزىلوردا وبلىسىندا «اۋىل اماناتى» باعدارلاماسىن ىسكە اسىرۋداعى وڭ تاجىريبە تۋرالى وبلىس اكىمىنىڭ ورىنباسارى ارداق زەبەشەۆ ايتتى. ال بيزنەستىڭ الەۋمەتتىك جاۋاپكەرشىلىگى جايىندا «اباي-داۋلەت» سەرىكتەستىگىنىڭ ديرەكتورى مۇرات سارسەنباەۆ ءسوز سويلەدى.
سونىمەن قاتار، تۇركىستان وبلىسى اكىمىنىڭ ورىنباسارى نۇربول تۇراشبەكوۆ، «العا بام» اۋىل شارۋاشىلىعى وندىرىستىك كووپەراتيۆىنىڭ ديرەكتورى سابىرجان دوسجانوۆ، تۇركىستان وبلىسىنىڭ جەكە كاسىپكەرى امانتاي انداسوۆ ءوز ويلارىن ورتاعا سالدى.
رەسپۋبليكالىق سەمينار اياسىندا بىرقاتار تاقىرىپتىق-پانەلدىك سەسسيا وتىرىستارى ۇيىمداستىرىلدى. وندا «اۋىل اماناتى» جوباسى اياسىندا كووپەراتسيانى دامىتۋ، ونىمدەردى قايتا وڭدەۋ جانە وتكىزۋ، اۋىلداردا بيزنەستى وركەندەتۋ، اۋىل اكىمدەرى مەن الەۋمەتتىك-كاسىپكەرلىك كورپوراتسيانىڭ ءرولى جان-جاقتى تالقىلانىپ، قاتىسۋشىلار ءوزارا تاجىريبە الماستى.
ايتا كەتەيىك، جوبا اياسىندا ايماقتاعى ارنايى الەۋمەتتىك كومەك الۋشىلار سانى 65 ادامعا قىسقاردى. اۋىل حالقىنىڭ تابىسى 20% ۇلعايدى، شاعىن كاسىپكەرلىك سانى 275-كە ارتتى، 33 اۋىل شارۋاشىلىعى وندىرىستىك كووپەراتيۆى قۇرىلدى، وڭدەۋ سالاسى بويىنشا 22 كاسىپورىن، كولەمى 1,2 گەكتار 34 جىلىجاي ءوندىرىسى اشىلدى، 1175 باس اسىلتۇقىمدى مال ساتىپ الىندى.
تۇرعىنداردىڭ 65 ءتۇرلى ازىق-تۇلىك تاۋارىن تۇتىنۋ كورسەتكىشتەرىنە قاراساق، وبلىستىڭ 10 ءتۇرلى ونىممەن (كۇرىش، تۇز، سيىر ءسۇتى، قىزاناق، قيار، قاۋىن، قاربىز، اسقاباق، جۇگەرى، نان) 100% قامتاماسىز ەتۋگە، ەكسپورتقا شىعارۋعا مۇمكىندىگى بار. سونداي-اق تۇتىنۋشىلار 10 ءتۇرلى ونىممەن (كارتوپ، سيىر ەتى، ءسابىز، بالىق، پياز، بۇرىش، قىزىلشا، قوي ەتى، قىرىققابات، جىلقى ەتى) 73-21 پايىز ارالىعىندا، 17 ءتۇرلى ونىممەن ءىشىنارا قامتاماسىز ەتىلۋدە (4,2-0,1%). قالعان 28 ءتۇرلى ءونىم، ونىڭ ىشىندە نەگىزگى ءۇش ءونىم، ياعني، قاراقۇمىق، قانت، كۇنباعىس مايى وبلىستا وندىرىلمەيدى. دەگەنمەن، «اۋىل اماناتى» جوباسىن ىسكە اسىرۋ ناتيجەسىندە ازىق-تۇلىكپەن قامتاماسىز ەتۋ دەڭگەيىنىڭ ءوسىمى بايقالۋدا.
مىسالى، قۇس شارۋاشىلىعى باعىتىندا ەكى كووپەراتيۆ قۇرىلىپ، 4500 باس قۇس باعاتىن 6 تيپتىك قۇس فەرماسى (پتيچنيك) جۇمىس جاساۋدا. بۇگىنگى كۇنگە كووپەراتيۆتەر 90 توننادان استام قۇس ەتىن ءوندىردى. قۇس ەتىمەن قامتاماسىز ەتۋ كورسەتكىشى وتكەن جىلمەن سالىستىرعاندا 4,9%-عا ءوستى. تومات پاستاسى مەن كونسەرۆىلەنگەن ونىمدەردى شىعاراتىن كووپەراتيۆ قۇرىلىپ، قامتاماسىز ەتۋ كورسەتكىشى 4,7%-عا، بالىق شارۋاشىلىعى باعىتىندا 20-عا جۋىق جوبا ىسكە اسىرىلىپ، قامتاماسىز ەتۋ دەڭگەيى 7,4%-عا ارتتى، قوي جانە جىلقى ەتىمەن قامتاماسىز ەتۋ دەڭگەيى تيىسىنشە 7,7% جانە 10,7% ۇلعايدى.
وبلىس اكىمدىگىنىڭ ءباسپاسوز قىزمەتى